ಪೊಲೀಸ್ ಠಾಣೆಗೆ ಹಾಜರಿ ಹಾಕಿದ ಖಾಸನೀಸ್ ಸಹೋದರರು

ಕಲಘಟಗಿ: ನಾಲ್ಕು ವರ್ಷಗಳಿಂದ ಜೈಲಿನಲ್ಲಿದ್ದ ಖಾಸನೀಸ್ ಸಹೋದರರಿಗೆ ಇತ್ತೀಚೆಗೆ ನ್ಯಾಯಾಲಯ ಷರತ್ತುಬದ್ಧ ಜಾಮೀನು ನೀಡಿದೆ. ಈ ಹಿನ್ನೆಲೆಯಲ್ಲಿ ಅವರು ಕಲಘಟಗಿ ಪೊಲೀಸ್ ಠಾಣೆಗೆ ಮಂಗಳವಾರ ಆಗಮಿಸಿ ಹಾಜರಿ ಹಾಕಿದರು. ಹೀಗಾಗಿ, ತಮ್ಮ ಹಣ ಇನ್ನಾದರೂ ಕೈ ಸೇರುತ್ತದೆಯೋ, ಇಲ್ಲವೋ ಎಂಬ ಜಿಜ್ಞಾಸೆ ಹೂಡಿಕೆದಾರರಲ್ಲಿ ಮತ್ತೆ ಶುರುವಾಗಿದೆ.

ಹೆಚ್ಚಿನ ಬಡ್ಡಿ ನೀಡುವ ಆಮಿಷವೊಡ್ಡಿ ಜನರಿಂದ ನೂರಾರು ಕೋಟಿ ರೂಪಾಯಿ ಹೂಡಿಕೆ ಮಾಡಿಸಿಕೊಂಡು ವಂಚನೆಗೈದ ಕುರಿತು ಸಾರ್ವಜನಿಕರ ದೂರಿನನ್ವಯ ರಾಜ್ಯ ಸರ್ಕಾರ 2017ರಲ್ಲಿ ಮೂವರು ಖಾಸನೀಸ್ ಸಹೋದರರ ವಿರುದ್ಧ ಕಲಘಟಗಿ ಠಾಣೆಯಲ್ಲಿ ಪ್ರಕರಣ ದಾಖಲಿಸಿ, ತನಿಖೆಯನ್ನು ಸಿಐಡಿಗೆ ವಹಿಸಿತ್ತು. ಹಲವು ವರ್ಷಗಳಿಂದ ಕಲಘಟಗಿಯಲ್ಲಿ ಹರ್ಷ ಎಂಟರ್​ಟೇನ್​ವೆುಂಟ್ ಸಂಸ್ಥೆ ಸ್ಥಾಪಿಸಿ ರಾಜ್ಯಹಾಗೂ ಹೊರ ರಾಜ್ಯಗಳಿಂದ ಸಾವಿರಾರು ಗ್ರಾಹಕರನ್ನು ನಂಬಿಸಿ ಹಣ ಹೂಡಿಕೆ ಮಾಡಿಸಿಕೊಂಡಿದ್ದರು ಎಂಬ ಆರೋಪ ಖಾಸನೀಸ್ ಸಹೋದರರ ಮೇಲಿದೆ.

ಖಾಸನೀಸ್ ಸಹೋದರರಿಗೆ ಇತ್ತೀಚೆಗಷ್ಟೆ ನ್ಯಾಯಾಲಯವು ಷರತ್ತುಬದ್ಧ ಜಾಮೀನು ನೀಡಿದೆ. ಠಾಣೆಯಲ್ಲಿ ಜಾಮೀನು ನೀಡಲು ಜನರು ಲಭ್ಯವಾಗುವಲ್ಲಿ ವಿಳಂಬವಾಗಿತ್ತು ಎನ್ನಲಾಗಿದೆ.

ಮಂಗಳವಾರ ಇಲ್ಲಿನ ಪೊಲೀಸ್ ಠಾಣೆಗೆ ಬಂದ ಹರ್ಷ ಉರ್ಫ್ ಸತ್ಯಬೋಧ ಖಾಸನೀಸ್, ಶ್ರೀಕಾಂತ, ಸಂಜೀವ ಖಾಸನೀಸ್ ಅವರನ್ನು ಹಲವು ಗ್ರಾಹಕರು ತಾವು ಹೂಡಿಕೆ ಮಾಡಿದ ಹಣದ ಕುರಿತು ಪ್ರಶ್ನೆಗಳನ್ನು ಕೇಳುತ್ತಿದ್ದಂತೆ ಹರ್ಷ ಸಹೋದರರು ‘ನಮ್ಮ ಪ್ರಕರಣಕ್ಕೆ ನ್ಯಾಯಾಲಯದಿಂದ ಜಾಮೀನು ಸಿಕ್ಕಿದೆ. ನಮ್ಮ ಬಳಿ ಹೂಡಿಕೆಯಾಗಿರುವ ಗ್ರಾಹಕರ ಹಣ ಅಂದಾಜು 65 ಕೋಟಿ ಮಾತ್ರ. ನಮ್ಮ ಮುಟ್ಟುಗೋಲಾದ ಆಸ್ತಿಯಿಂದ ಗ್ರಾಹಕರಿಗೆ ಹಣವನ್ನು ನೀಡುತ್ತೇವೆ. ಜನರು ಸಾವಿರಾರು ಕೋಟಿ ರೂಪಾಯಿ ಹೂಡಿಕೆ ಮಾಡಿದ್ದೇವೆ ಎಂದು ಹೇಳುವುದು ಸರಿಯಲ್ಲ, ನಮ್ಮಲ್ಲಿ ದಾಖಲೆಗಳು ಇವೆ’ ಎಂದರು.

‘ಮತ್ತಷ್ಟು ಹಣವನ್ನು ಚಿತ್ರರಂಗಕ್ಕೆ ಹೂಡಿಕೆ ಮಾಡಿದ್ದು, ಚಿತ್ರಗಳ ನಿರ್ಮಾಣ ಕಾರ್ಯ ಮುಗಿದು ಬಿಡುಗಡೆಯಾದ ನಂತರ ಅದರಿಂದ ಬಂದ ಹಣವನ್ನು ಗ್ರಾಹಕರಿಗೆ ನೀಡುತ್ತೇವೆ. ಯಾರಿಗೂ ಮೋಸ ಮಾಡುವುದಿಲ್ಲ. ಪ್ರಕರಣ ನ್ಯಾಯಾಲಯದಲ್ಲಿ ಇರುವುದರಿಂದ ವಿಳಂಬವಾಗುತ್ತಿದೆ. ನಾವು ಎಲ್ಲಿಯೂ ಓಡಿ ಹೋಗುವುದಿಲ್ಲ, ಜಿಲ್ಲೆಯಲ್ಲಿಯೇ ಇರುತ್ತೇವೆ’ ಎಂದು ಹೇಳಿ ಹೊರಟು ಹೋದರು ಎಂದು ವಂಚನೆಗೊಳಗಾದ ಗ್ರಾಹಕರು ವಿಜಯವಾಣಿಗೆ ತಿಳಿಸಿದರು.