ಪಟ್ಟಣದ ತಾಲೂಕು ಪಂಚಾಯಿತಿ ಕಚೇರಿ ಆವರಣದಲ್ಲಿ ಪ್ರತಿಭಟನೆ ನಡೆಸಿ, ಮಾತನಾಡಿದ ನಾಗಭೂಷಣರೆಡ್ಡಿ, ಪೊನ್ನಸಮುದ್ರ ಗ್ರಾಪಂನಲ್ಲಿ ನಾಲ್ಕು ವರ್ಷದಿಂದ ಪಿಡಿಒ ಶಿವಾನಂದ ಸಾತಿಹಾಲ್ ಕಾರ್ಯನಿರ್ವಹಿಸುತ್ತಿದ್ದು. ನರೇಗಾ ಕಾಮಗಾರಿಯಲ್ಲಿ ಗ್ರಾಮದ ಕೆರೆ ಕಟ್ಟೆ, ಗೋಮಾಳ, ನೈರ್ಮಲ್ಯ ಕಾಪಾಡದೇ ಇಷ್ಟ ಬಂದಂತೆ ಬಿಲ್ಗಳನ್ನು ಪರಿಚಯಸ್ಥ ಗುತ್ತಿಗೆದಾರರ ಹೆಸರಿನಲ್ಲಿ ಪಾಸ್ ಮಾಡುತ್ತಿದ್ದಾರೆ. ನರೇಗಾ ಕಾಮಗಾರಿಗಳನ್ನು ಮಾಡದೆಯೇ ಜಾಬ್ ಕಾರ್ಡಗಳಿಗೆ ಹಣ ಪಾವತಿ ಮಾಡಿ, ಸಾಮಗ್ರಿ ಮೊತ್ತದ ಹಣವನ್ನು ಖಾಸಗಿ ವ್ಯಕ್ತಿಗಳ ಖಾತೆಗೆ ಬಿಲ್ ಮಾಡಿಕೊಂಡಿದ್ದಾರೆ. ಈ ಸಂಬಂಧ ತಾಪಂ ಇಒ ಗಮನಕ್ಕೂ ತಂದಿದ್ದು, ಲೋಕಾಯುಕ್ತಕ್ಕೂ ದೂರು ನೀಡಿದ್ದೇನೆ ಎಂದರು. ಮಾಹಿತಿ ಹಕ್ಕು ಕಾರ್ಯಕರ್ತ ಗೋವಿಂದಪ್ಪ ಮಾತನಾಡಿ, ಪೊನ್ನಸಮುದ್ರ ಗ್ರಾಮ ಪಂಚಾಯಿತಿಯಲ್ಲಿ ಭ್ರಷ್ಟಾಚಾರ ಆರೋಪದ ಹಿನ್ನೆಲೆಯಲ್ಲಿ ಮಾಹಿತಿ ಹಕ್ಕಿನಲ್ಲಿ ಮಾಹಿತಿ ಕೇಳಿದರೆ ಮೇಲಧಿಕಾರಿಗಳ ಗಮನಕ್ಕೂ ತಾರದೆ 90 ಕಿ.ಮೀ ದೂರದ ತಿಪಟೂರಿನ ಶ್ರೀರಂಗ ಎಂಟರ್ ಪೆಸಸ್ನಲ್ಲಿ ಸಾಮಗ್ರಿ ಖರಿದಿಸಿದ 39.16 ಲಕ್ಷ ರೂ. ಬಿಲ್ ತೋರಿಸುತ್ತಾರೆ ಎಂದು ಆರೋಪಿಸಿದರು.
