ಅಪಾರ ಬೆಳೆ ಹಾನಿ, ರೈತರಿಗೆ ನಷ್ಟ

ಪಾಂಡವಪುರ: ತಾಲೂಕಿನಾದ್ಯಂತ ಸೋಮವಾರ ರಾತ್ರಿ ಸುರಿದ ಧಾರಾಕಾರ ಮಳೆ ಹಾಗೂ ಗಾಳಿಗೆ ಅಪಾರ ಬೆಳೆ ನಾಶವಾಗಿದ್ದು, ಮನೆಗಳ ಛಾವಣಿ ಹಾರಿಹೋಗಿವೆ. ಕಾರಿನ ಮೇಲೆ ಮರ ಬಿದ್ದು ನಷ್ಟವಾಗಿದೆ.

ರಾತ್ರಿ 8 ಗಂಟೆ ಸುಮಾರಿಗೆ ಗುಡುಗು, ಸಿಡಿಲು, ಬಿರುಗಾಳಿ ಸಹಿತ ಸುರಿದ ವರ್ಷಧಾರೆಗೆ ಶಂಭೂವಿನಹಳ್ಳಿ, ಆಗನಹಳ್ಳಿ, ಅಲ್ಪಹಳ್ಳಿ, ಮೊರಸನಹಳ್ಳಿ, ಹರವು, ಹೊಸಕನ್ನಂಬಾಡಿ, ಹಾರೋಹಳ್ಳಿ ಇತರೆಡೆ ಬಾಳೆ, ಟೊಮ್ಯಾಟೊ, ಬೀನ್ಸ್ ಮತ್ತಿತರ ಬೆಳೆಗಳು ನಾಶವಾಗಿವೆ.

ಆಗನಹಳ್ಳಿಯ ಶಿವಕುಮಾರ್ ಎಂಬುವರು 2 ಎಕರೆ ಜಮೀನಿನಲ್ಲಿ ಬೆಳೆದಿದ್ದ ಬಾಳೆ ಹಾಗೂ ಕಾಯಿ ಕಚ್ಚಿದ್ದ ಟೊಮ್ಯಾಟೊ ಗಿಡಗಳು ನೆಲ ಕಚ್ಚಿವೆ. ಶಂಭೂವಿನಹಳ್ಳಿಯಲ್ಲಿ ಮನೆಯ ಛಾವಣಿ ಹಾರಿಹೋಗಿದೆ. ರಸ್ತೆ ಪಕ್ಕದಲ್ಲಿ ನಿಲ್ಲಿಸಿದ್ದ ಕಾರಿನ ಮೇಲೆ ಗೊಬ್ಬಳಿ ಮರ ಬಿದ್ದು ಜಖಂಗೊಂಡಿದೆ. ಅಲ್ಲಲ್ಲಿ ವಿದ್ಯುತ್ ಕಂಬಗಳು ಧರೆಗುರುಳಿವೆ.

ಆಲಿಕಲ್ಲು ಮಳೆ: ಹಲವು ಗ್ರಾಮಗಳಲ್ಲಿ ಆಲಿಕಲ್ಲು ಮಳೆ ಬಿದ್ದಿದ್ದು, ಅದರ ರಭಸಕ್ಕೆ ತರಕಾರಿ, ಹೂವು ಬೆಳೆಗಳು ನಾಶವಾಗಿವೆ. ಕಾಯಿ ಕಚ್ಚಿದ್ದ ಗಿಡಗಳ ಮೇಲೆ ಆಲಿಕಲ್ಲು ಬಿದ್ದ ಪರಿಣಾಮ ಕಾಯಿಗಳು ಉದುರಿ ಹೋಗಿ ರೈತರಿಗೆ ಅಪಾರ ನಷ್ಟ ಉಂಟಾಗಿದೆ.

ಅಧಿಕಾರಿಗಳ ಭೇಟಿ: ಮಳೆಯಿಂದ ಹಾನಿಗೊಳಗಾದ ಮನೆಗಳಿಗೆ ತಹಸೀಲ್ದಾರ್ ಪ್ರಮೋದ್ ಎಲ್.ಪಾಟೀಲ್, ಕಂದಾಯ ಅಧಿಕಾರಿಗಳು ಭೇಟಿ ನೀಡಿ ನಷ್ಟದ ಪ್ರಮಾಣ ಅಂದಾಜಿಸಿದ್ದಾರೆ. ರೈತರ ಜಮೀನು ಮತ್ತು ತೋಟಗಳಿಗೆ ತೋಟಗಾರಿಕೆ ಇಲಾಖೆ ಸಹಾಯಕ ನಿರ್ದೇಶಕಿ ಎಸ್.ಪಿ.ಸೌಮ್ಯಾ ಮತ್ತವರ ತಂಡ ಭೇಟಿ ನೀಡಿ, ಪರಿಶೀಲನೆ ನಡೆಸಿ ಮಾಹಿತಿ ಸಂಗ್ರಹಿಸಿದ್ದಾರೆ.