ಬೀದರ್: ಜೈ ಭಾರತ ಮಾತಾ ರಾಷ್ಟ್ರೀಯ ಸೇವಾ ಸಮಿತಿ ವತಿಯಿಂದ ಮಾ. 23 ರಂದು ಬೆಳಿಗ್ಗೆ 11ಕ್ಕೆ ಪಂಜಾಬ್- ಪಾಕಿಸ್ತಾನ್ ಗಡಿಯಲ್ಲಿನ ಖಟಕರ್ ಕಲನ್ ರೋಡ್ನ ಶಹೀದ್-ಎ-ಆಝಂ ಭಗತ್ಸಿಂಗ್ ಮ್ಯೂಸಿಯಂ ಸಮೀಪ ಅಮರ ಬಲಿದಾನ ದಿನಾಚರಣೆ ನಡೆಯಲಿದೆ.
ಸಮಿತಿಯ ರಾಷ್ಟ್ರೀಯ ಅಧ್ಯಕ್ಷ ಹವಾ ಮಲ್ಲಿನಾಥ ಮಹಾರಾಜರ ಸಾನಿಧ್ಯದಲ್ಲಿ ನಡೆಯಲಿರುವ ಕಾರ್ಯಕ್ರಮದಲ್ಲಿ ದೇಶದ ವಿವಿಧ ರಾಜ್ಯಗಳ ಸಮಿತಿ ಸದಸ್ಯರು ಹಾಗೂ ದೇಶ ಭಕ್ತರು ಅಪಾರ ಸಂಖ್ಯೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದು ಜೈ ಭಾರತ ಮಾತಾ ರಾಷ್ಟ್ರೀಯ ಸೇವಾ ಸಮಿತಿಯ ಭಾಲ್ಕಿ ತಾಲ್ಲೂಕು ಘಟಕದ ಅಧ್ಯಕ್ಷ ಪಪ್ಪು ಪಾಟೀಲ ಖಾನಾಪುರ ತಿಳಿಸಿದ್ದಾರೆ.
ಅಮರ ಬಲಿದಾನ ದಿನಾಚರಣೆ ಪ್ರಯುಕ್ತ ಹವಾ ಮಲ್ಲಿನಾಥ ಮಹಾರಾಜರ ನೇತೃತ್ವದಲ್ಲಿ ಆಳಂದದ ಜೈ ಭಾರತ ಮಾತಾ ಮಂದಿರದಿಂದ ಆರಂಭಗೊಂಡ ದೇಶ ಭಕ್ತರ ಯಾತ್ರೆ ಕಲಬುರಗಿ, ಹುಮನಾಬಾದ್, ಬಸವಕಲ್ಯಾಣ, ಉಮ್ಮರ್ಗಾ, ತುಳಜಾಪುರ, ಸೋಲಾಪುರ, ಶಿರಡಿ, ಮಧ್ಯಪ್ರದೇಶದ ಉಜ್ಜಯನಿ, ಮಹಾಕಾಲ, ಜೈಪುರ, ರಾಜಸ್ತಾನ್, ಹರಿಯಾಣ ಮಾರ್ಗವಾಗಿ ಪಂಜಾಬ್ಗೆ ಹೊರಟಿದೆ ಎಂದು ಹೇಳಿದ್ದಾರೆ.
ಯಾತ್ರೆ ದೇಶ ಭಕ್ತಿ, ದೇಶಾಭಿಮಾನ ಜಾಗೃತಗೊಳಿಸಿದೆ. ಮಾರ್ಗ ಮಧ್ಯದಲ್ಲಿ ದೇಶ ಭಕ್ತರು ಸಿಡಿಮದ್ದು ಸಿಡಿಸಿ, ಜೆಸಿಬಿ ಮೂಲಕ ಹೂಮಳೆ ಸುರಿಸಿ ಯಾತ್ರೆಗೆ ಭವ್ಯ ಸ್ವಾಗತ ಕೋರಿ ಬರಮಾಡಿಕೊಳ್ಳುತ್ತಿದ್ದಾರೆ ಎಂದು ತಿಳಿಸಿದ್ದಾರೆ.
