ಗಣೇಶ ಚತುರ್ಥಿಗೆ ದಿನಗಣನೆ ಶುರುವಾಗಿದ್ದು, ಗೌರಿ, ಗಣೇಶ ಮೂರ್ತಿಗಳು ವಾರುಕಟ್ಟೆಗೆ ಲಗ್ಗೆ ಇಟ್ಟಿವೆ. ಈ ನಡುವೆ ಪರಿಸರಕ್ಕೆ ಮಾರಕವಾಗಿರುವ ಪಿಒಪಿ ಮೂರ್ತಿಗಳ ತಯಾರಿ, ಮಾರಾಟ ನಿಷೇಧಿಸಿ ಸರ್ಕಾರ ಆದೇಶ ಹೊರಡಿಸಿದ್ದರೂ ಕೆಲ ತಯಾರಕರು, ವ್ಯಾಪಾರಸ್ಥರು ಪಿಒಪಿ ಮೂರ್ತಿಗಳ ಮಾರಾಟ ಮಾಡುತ್ತಿದ್ದಾರೆ ಎನ್ನಲಾಗಿದ್ದು, ಅಧಿಕಾರಿಗಳು ಕಂಡೂ ಕಾಣದಂತಿದ್ದಾರೆ.
ಮಣ್ಣಿನಿಂದ ಮಾಡಿರುವ ಪರಿಸರ ಸ್ನೇಹಿ ಗಣಪತಿ ಮೂರ್ತಿಗಳಿಗೆ ಮಾರುಕಟ್ಟೆಯಲ್ಲಿ ಬೇಡಿಕೆ ಕಡಿಮೆ ಎಂಬ ಕಾರಣಕ್ಕೆ ಪಿಒಪಿ ಮೂರ್ತಿಗಳ ಮಾರಾಟ ಮುಂದುವರಿದಿದೆ ಎನ್ನುತ್ತಾರೆ ಕೆಲ ಮೂರ್ತಿ ತಯಾರಕರು.
ಸ್ಥಳೀಯ ಕೆರೆಗಳಲ್ಲಿ ನೀರು ಇರುವ ಕಾರಣ ಮಣ್ಣು ತೆಗೆಯಲು ಸಾಧ್ಯವಾಗದೆ, ದೂರದ ಕೆರೆಗಳಿಂದ ಮಣ್ಣನ್ನು ತಂದು ಈ ಬಾರಿ ವಿಶೇಷವಾಗಿ ರಾಮಲಲ್ಲಾ ಗಣಪತಿ, ನಂದಿವಾಹನ ಗಣಪತಿ, ಸಾಯಿಬಾಬ ಗಣಪತಿ, ಕುದುರೆ ಸಿಂಹಾಸನ ಗಣಪತಿ, ದೇವಿ ಗಣಪ, ಚಂದ್ರ ಗಣಪ, ಆಂಜಿನೇಯ ಪರ್ವತ ಗಣಪ, ಸನ್ಪ್ಲವರ್ ಗಣಪ ಹಾಗೂ ಅನೇಕ ರೀತಿಯ ಗಣಪತಿಗಳನ್ನ ಮಾಡಿದ್ದು, ಜನ ಯಾವುದಕ್ಕೆ ಆಸಕ್ತಿ ತೋರುತ್ತಾರೆ ನೋಡಬೇಕಿದೆ ಎನ್ನುತ್ತಾರೆ ಮೂರ್ತಿ ತಯಾರಕರು. ಹಬ್ಬದ ಸಂದರ್ಭದಲ್ಲಿ ಮೂರ್ತಿಗಳನ್ನು ಮಾರಾಟ ಮಾಡಲು ಸರಿಯಾದ ಸ್ಥಳಾವಕಾಶ ಇಲ್ಲದೆ ಪರದಾಡುವಂತಾಗಿದ್ದು, ಹೊಸಕೋಟೆ ತಾಲೂಕು ನಂದಗುಡಿ, ತಾವರೆಕೆರೆ, ಚಿಕ್ಕನಹಳ್ಳಿ ಗೇಟ್ ಮುಂತಾದ ಕಡೆ ರಸ್ತೆ ಬದಿ ಅಂಗಡಿಗಳಲ್ಲಿ ಮಾರಾಟಕ್ಕೆ ಸಿದ್ಧವಾಗಿರುವ ಮಣ್ಣಿನ ಗಣೇಶ ಮೂರ್ತಿಗಳಿಗೆ ಸ್ಥಳಾವಕಾಶ ಕಲ್ಪಿಸಬೇಕಿದೆ.
