ಚಾಮರಾಗನಗರ-ಗುಂಡ್ಲುಪೇಟೆ ರಸ್ತೆ ಬದಿಯಲ್ಲಿರುವ ತಮ್ಮ 8 ಎಕರೆ ಜಮೀನಿಗೆ ಹೆಚ್ಚು ಬೇಡಿಕೆಯಿದ್ದರೂ ಪಿತ್ರಾರ್ಜಿತ ಆಸ್ತಿಯನ್ನು ಮಾರಾಟ ಮಾಡದೆ ಇಳಿ ವಯಸ್ಸಿನಲ್ಲಿಯೂ ಕೃಷಿ ಚಟುವಟಿಕೆಯಲ್ಲಿ ತೊಡಗಿಸಿಕೊಂಡಿದ್ದಾರೆ. ಜಮೀನಲ್ಲಿ 2 ಕೊಳವೆ ಬಾವಿ ಕೊರೆಸಿದರಾದರೂ ನದಿ ಮೂಲದಿಂದ ತಾಲೂಕಿನ ಕೆರೆಗಳಿಗೆ ನೀರು ತುಂಬಿಸುವ ಯೋಜನೆ ಜಾರಿಗೆ ಬರುವ ಮೊದಲು ಇವುಗಳಲ್ಲಿ ನೀರಿನ ಲಭ್ಯತೆ ತುಂಬಾ ಕಡಿಮೆಯಾಗಿತ್ತು. ಒಂದರಲ್ಲಿ ನೀರು ಸಂಪೂರ್ಣ ಬತ್ತಿಹೋಗಿದ್ದರಿಂದ ಯಾವುದೇ ಬೆಳೆ ಬೆಳೆಯಲು ಸಾಧ್ಯವಾಗದಂತಾಗಿತ್ತು. ಇಂತಹ ಸಂದರ್ಭದಲ್ಲಿ ತೋಟಗಾರಿಕೆ ಬೆಳೆಗಳನ್ನು ಬೆಳೆಯಲು ಮುಂದಾಗಿದ್ದರು. ಆಗ ನೆಟ್ಟಿದ್ದ 50 ತೆಂಗಿನ ಮರಗಳು, 1 ಹಲಸು, 3 ಮಾವು ಹಾಗೂ ದಾಳಿಂಬೆ, ಸಪೋಟಾ ಹಾಗೂ ಹುಣಿಸೆ ಮರಗಳು ಈಗ ಫಲ ನೀಡುತ್ತಿವೆ. ಸದ್ಯ ಎರಡೂ ಬಾವಿಗಳಲ್ಲಿಯೂ ಸಮೃದ್ಧವಾಗಿ ನೀರು ದೊರಕುತ್ತಿದ್ದು 2 ಎಕರೆ ಪ್ರದೇಶದಲ್ಲಿ ನೇಂದ್ರ ಬಾಳೆ, 2 ಎಕರೆ ಏಲಕ್ಕಿ ಬಾಳೆ, ಒಂದು ಎಕರೆ ಈರುಳ್ಳಿ ಬೆಳೆದಿದ್ದು ಎರಡು ಎಕರೆಯಲ್ಲಿ ಇತ್ತೀಚೆಗೆ ಆಲೂಗಡ್ಡೆ ಬಿತ್ತನೆ ಮಾಡಿಸಿದ್ದಾರೆ. ಹಿಂದಿನಿಂದಲೂ ಕೃಷಿಯೊಂದಿಗೆ ನಾಲ್ಕು ಹಸುಗಳನ್ನು ಸಾಕಿ ಹಾಲು ಮಾರಾಟ ಮಾಡುತ್ತಿದ್ದ ಗುರುಸ್ವಾಮಿ ದಂಪತಿ ಇತ್ತೀಚೆಗೆ ಇವುಗಳನ್ನು ಮಾರಾಟ ಮಾಡಿದ್ದಾರೆ. ಕಾರ್ಮಿಕರ ಕೊರತೆಯಿಂದ ದೊಡ್ಡ ಯೋಜನೆಗಳನ್ನು ಜಾರಿಗೊಳಿಸಲು ಸಾಧ್ಯವಾಗದಿದ್ದರೂ ಗಂಡ ಹೆಂಡತಿಯೇ ತಮ್ಮ ಜಮೀನಿನ ಕೆಲಸಗಳನ್ನು ಮಾಡಿಕೊಳ್ಳುತ್ತಿದ್ದಾರೆ.
