ವಿದೇಶದಿಂದ ಬಂದ ರೋಗ: ವಿದೇಶದಿಂದ ಹಬ್ಬಿದ ಕರೊನಾ ಮಹಾಮಾರಿ ಮಾನವ ಸಮೂಹಕ್ಕೆ ಆಘಾತ ಉಂಟು ಮಾಡಿತ್ತು. ಇದೇ ಕಾಲದಲ್ಲಿ ಆಫ್ರಿಕಾದ ದೇಶಗಳಲ್ಲಿ ಪತ್ತೆಯಾಗಿದ್ದ ಜಾನುವಾರುಗಳ ಚರ್ಮದ ಈ ಕಾಯಿಲೆಯು ನಿಧಾನವಾಗಿ ಉತ್ತರ ಭಾರತದಲ್ಲಿ ಕಾಣಿಸಿಕೊಂಡಿತ್ತು. ಅಲ್ಲಿಂದ ರಾಜ್ಯದ ಗಡಿ ಜಿಲ್ಲೆಗಳ ಮೂಲಕ ಉತ್ತರ ಕನ್ನಡ ಜಿಲ್ಲೆಗೆ ಲಗ್ಗೆ ಇಟ್ಟಿತ್ತು. ಹಳಿಯಾಳ, ಮುಂಡಗೋಡ ಮತ್ತು ಯಲ್ಲಾಪುರ ತಾಲೂಕುಗಳಲ್ಲಿ ಅತಿ ಹೆಚ್ಚು ಜಾನುವಾರುಗಳು ಈ ರೋಗಕ್ಕೆ ತುತ್ತಾಗಿದ್ದವು. ಅಂಕೋಲಾ, ಶಿರಸಿ, ಕಾರವಾರ ತಾಲೂಕುಗಳಲ್ಲೂ ಬಹು ಬೇಗನೇ ರೋಗ ವ್ಯಾಪಿಸಿ ಜಾನುವಾರುಗಳ ಮಾಲೀಕರ ನಿದ್ದೆಗೆಡಿಸಿತ್ತು. ಮೂರು ತಿಂಗಳಲ್ಲಿ ಜಿಲ್ಲೆಯಲ್ಲಿ 6,800ಕ್ಕೂ ಅಧಿಕ ಜಾನುವಾರುಗಳು ಈಗಾಗಲೇ ಈ ಚರ್ಮ ರೋಗ ಪೀಡಿತವಾಗಿದ್ದವು.
