ವಿಜಯವಾಣಿ ಸುದ್ದಿಜಾಲ ನಂದಗುಡಿ
ನಂದಗುಡಿ ಟೌನ್ಶಿಪ್ಗಾಗಿ 18,500 ಸಾವಿರ ಎಕರೆ ಭೂಮಿ ವಶಕ್ಕೆ ಪಡೆಯಲು ಮುಂದಾಗಿರುವ ರಾಜ್ಯ ಸರ್ಕಾರದ ವಿರುದ್ಧ ಹೋರಾಟಕ್ಕೆ ರೂಪುರೇಷೆ ಸಿದ್ಧಪಡಿಸಲು ರೈತರು ಹೊಸಕೋಟೆ ತಾಲೂಕು ನಂದಗುಡಿಯ ಶ್ರೀಕಾಡುಮಲ್ಲೇಶ್ವರ ಸ್ವಾಮಿ ದೇವಾಲಯದ ಆವರಣದಲ್ಲಿ ಇತ್ತೀಚೆಗೆ ಸಭೆ ನಡೆಸಿದರು.
ಭೂ ಸ್ವಾಧೀನ ವಿರೋಧಿ ಹೋರಾಟ ಸಮಿತಿ ಅಧ್ಯಕ್ಷ ಕೆಂಚೇಗೌಡ ಮಾತನಾಡಿ, ಬೆಂಗಳೂರು ಮಹಾನಗರ ಪ್ರದೇಶಾಭಿವೃದ್ಧಿ ಪ್ರಾಧಿಕಾರ ಟೌನ್ಶಿಪ್ಗಾಗಿ ನಂದಗುಡಿ ಭಾಗದ ಸುತ್ತಮುತ್ತಲ 36 ಗ್ರಾಮಗಳ 18,500 ಸಾವಿರ ಎಕರೆ ಜಮೀನು ವಶಕ್ಕೆ ಪಡೆದು, ಅಭಿವೃದ್ಧಿಪಡಿಸಿದ ಭೂಮಿಯಲ್ಲಿ ಪ್ರತಿ ಎಕರೆಯೊಂದಕ್ಕೆ 8 ಗುಂಟೆ ಭೂಮಿಯನ್ನು ರೈತರಿಗೆ ಕೊಡಲು ಮುಂದಾಗಿದೆ. ಯಾರೋ ಹೂಡಿಕೆದಾರರನ್ನು ನಂಬಿಕೊಂಡು ಸರ್ಕಾರ ನೋಟಿಫಿಕೇಷನ್ ಹೊರಡಿಸುತ್ತಿದ್ದು, ಹೂಡಿಕೆದಾರರೇ ಬರದಿದ್ದರೆ ಕೃಷಿ ನೆಚ್ಚಿಕೊಂಡು ಜೀವನ ಸಾಗಿಸುತ್ತಿದ್ದ ರೈತರು ಏನು ಮಾಡಬೇಕು. ಅಧಿಕಾರ ಇದೆ ಅಂತ ರೈತರ ಕಣ್ಣಿಗೆ ಮಣ್ಣೆರೆಚುವ ಕೆಲಸಕ್ಕೆ ಮುಂದಾದರೆ, ರಕ್ತ ಹರಿಸಿಯಾದರೂ ಸರಿಯೇ ಭೂಮಿಯನ್ನು ರಕ್ಷಿಸಿಕೊಳ್ಳುತ್ತೇವೆ ಎಂದರು.
