ಧ್ವಜ ಹಿಡಿದೇ ಗಡಿ ತಲುಪಿದೆವು

ಕೋಲಾರ: ನಗರದ ಎಪಿಎಂಸಿ ನೌಕರ ಮುನಿರಾಜು ಸಹೋದರ ರಾಜ್​ಕುಮಾರ್​, ಸುಕನ್ಯಾ ದಂಪತಿ ಪುತ್ರಿ ಮೋನಿಷಾ ಪ್ರಿಯಾ ಶನಿವಾರ ರಾತ್ರಿ ಉಕ್ರೇನ್​ನಿಂದ ವಾಪಸಾಗಿದ್ದು, ಕೇಂದ್ರ ಸರ್ಕಾರ ಹಾಗೂ ರಾಯಭಾರ ಕಚೇರಿ ನೆರವಿಗೆ ಧನ್ಯವಾದ ಸಲ್ಲಿಸಿದರು.

ಬಂಕರ್​ ಹಾಗೂ ಮೆಟ್ರೋ ನಿಲ್ದಾಣಗಳಲ್ಲಿ ತಂಗಿದ್ದ ನಾವು ಅತ್ಯಂತ ಕಷ್ಟದ ದಿನಗಳನ್ನು ನೋಡಬೇಕಾಯಿತು. ನಾವಿದ್ದ ಹಾಸ್ಟೆಲ್​ಗೂ ಭಾರತದ ಧ್ವಜ ಕಟ್ಟಿದ್ದು, ಧ್ವಜ ಹಿಡಿದೇ ಗಡಿ ತಲುಪಿದ್ದು ನಮಗೆ ನೆರವಾಯಿತು ಎಂದರು.

ಉಕ್ರೇನ್​ನೊಳಗೆ ನಮ್ಮ ದೇಶದ ವಿಮಾನಗಳು ಬರುವ ಹಾಗಿರಲಿಲ್ಲ. ವಿಮಾನ ನಿಲ್ದಾಣಗಳು ಧ್ವಂಸಗೊಂಡಿದ್ದವು. ಕಷ್ಟಪಟ್ಟು ಗಡಿ ತಲುಪುವಂತೆ ನಮ್ಮ ರಾಯಭಾರ ಕಚೇರಿ ನಿರ್ದೇಶನ ನೀಡಿತ್ತು. ರೈಲುಗಳಲ್ಲಿ ಬರುವಾಗಲೂ ಅಲ್ಲಲ್ಲಿ ಬಾಂಬ್​ ಸದ್ದು ಕೇಳಿಸುತ್ತಿದ್ದುದರಿಂದ ದೇವರನ್ನು ನೆನೆಯುತ್ತಾ ಗಡಿ ತಲುಪಿದೆವು ಎಂದರು.