ಕೈ ಕೊಟ್ಟ ಮಳೆ: ತಾಲೂಕಿನಲ್ಲಿ ಏಪ್ರಿಲ್ ಹಾಗೂ ಮೇ ತಿಂಗಳಲ್ಲಿ ದ್ವಿದಳ ಧಾನ್ಯಗಳನ್ನು ರೈತರು ಬಿತ್ತುವ ಪರಿಪಾಠವಿದೆ. ಈ ಸಂದರ್ಭದಲ್ಲಿ ಮಳೆಯಾಶ್ರಿತ ಪ್ರದೇಶಗಳ ರೈತರು ಬಿತ್ತನೆ ಮಾಡಿದ್ದಾರೆ. ಈಗಾಗಲೇ ಹೆಸರುಕಾಳು, ಉದ್ದು, ಹುರುಳಿ, ಅಲಸಂದೆಯ ಬಿತ್ತನೆಯನ್ನು ಮಾಡಿ 15 ರಿಂದ 20 ದಿನ ಕಳೆದಿವೆ. ಕೆಲವೆಡೆ ಮೊಳಕೆಯೊಡೆದು ಗಿಡಗಳು ಚಿಗುರೊಡೆದಿದೆ. ಆದರೆ ಕಳೆದ ಒಂದು ವಾರದಿಂದ ತಾಲೂಕಿನಲ್ಲಿ ಬಿಸಿಲ ಬೇಗೆ ಹೆಚ್ಚಾಗಿದೆ. ತಾಪಮಾನ 35 ರಿಂದ 36 ಡಿಗ್ರಿ ಸೆಲ್ಸಿಯಸ್ಗೂ ಹೆಚ್ಚು ಮೀರಿದೆ. ಈ ರಣ ಬಿಸಿಲಿಗೆ ಮೊಳಕೆಯ ಚಿಗುರು ಬಾಡತೊಡಗಿದೆ. ಪಂಪ್ಸೆಟ್ ಇರುವ ರೈತರು ಅಲ್ಪ ಪ್ರಮಾಣದಲ್ಲಿ ನೀರು ಹಾಯಿಸಿದರೂ ಬೇಸಿಗೆಯಿಂದ ಈ ನೀರಿನ ಪ್ರಮಾಣವೂ ಕಡಿಮೆಯಾಗಿದೆ. ಅಲ್ಲದೆ ವಿದ್ಯುತ್ ವ್ಯತ್ಯಯದಿಂದಲೂ ಸಂಪೂರ್ಣವಾಗಿ ನೀರುಣಿಸಲು ಸಾಧ್ಯವಾಗುತ್ತಿಲ್ಲ. ಬಹುತೇಕ ರೈತರು ಸಣ್ಣ ಹಿಡುವಳಿದಾರರಾಗಿದ್ದು ಮಳೆಯಾಶ್ರಿತರಾಗಿದ್ದಾರೆ. ಭೂಮಿ ಹದ ಮಾಡಿ ಬಿತ್ತನೆ ಕಾಳನ್ನು ತಂದು ಬಿತ್ತಿದ್ದರೂ ಮಳೆರಾಯ ಕೈಕೊಟ್ಟಿರುವುದರಿಂದ ಸಾಲ ಮಾಡಿ ಫಸಲು ಬೆಳೆಯುವ ಆಸೆ ಹೊಂದಿದ್ದ ರೈತ ಕೈಕಟ್ಟಿ ಕೂರುವ ಸ್ಥಿತಿ ನಿರ್ಮಾಣವಾಗಿದೆ.
