ಸಾಮಾನ್ಯವಾಗಿ ಮಳೆಗಾಲ ಮುಗಿಯುವ ಸೆಪ್ಟೆಂಬರ್ ಅಂತ್ಯಕ್ಕೆ ತುಂಬುತ್ತಿದ್ದ ಕೆರೆಯು ಈ ಬಾರಿ ಜೂನ್ನಲ್ಲೇ ಭರ್ತಿಯಾಗಿ ಕೋಡಿ ಬಿದ್ದಿದೆ. ಮುಂಬರುವ ದಿನಗಳಲ್ಲಿ ಕೆರೆಗೆ ಹೆಚ್ಚಿನ ನೀರು ಹರಿದುಬರುವ ಸಾಧ್ಯತೆಯಿದ್ದು, ವರ್ಷವಿಡೀ ತುಂಬಿ ಹರಿಯುವ ನಿರೀಕ್ಷೆ ಇದೆ. 1,000 ಎಕರೆ ವಿಸ್ತೀರ್ಣದ ರಾಷ್ಟ್ರಕೂಟರ ಕಾಲದ ಕೆರೆಯ ಏರಿ 2021ರಲ್ಲಿ ಬಿರುಕುಬಿಟ್ಟು ಕುಸಿದಿದ್ದರಿಂದ ಅಪಾರ ಪ್ರಮಾಣದ ನೀರು ಪೋಲಾಗಿತ್ತು. 2022ರಲ್ಲಿ ಕೆರೆ ಏರಿಯ ದುರಸ್ತಿ ಕಾಮಗಾರಿ ಮುಗಿದು ನಾಲ್ಕು ತಿಂಗಳ ಬಳಿಕ ಯಗಚಿ ಏತ ನೀರಾವರಿ ಯೋಜನೆಯ ನಾಲೆಯಲ್ಲಿ ನೀರು ಹರಿಸಿ ಕೆರೆಗಳನ್ನು ತುಂಬಿಸಲಾಗಿತ್ತು. ಈ ಬಾರಿ ಮುಂಗಾರು ಪೂರ್ವ ಮಳೆಗೆ ಹಳ್ಳ ಕೊಳ್ಳಗಳು ತುಂಬಿ ಮೇ ತಿಂಗಳಲ್ಲೇ ಕೆರೆಗೆ ಅಪಾರ ಪ್ರಮಾಣದ ನೀರು ಹರಿದು ಬಂದಿದ್ದರಿಂದ ಸಾಮಾನ್ಯ ಅವಧಿಗೂ ಮುನ್ನವೇ ದ್ವಾರಸಮುದ್ರ ಕೆರೆಯು ಭರ್ತಿಯಾಗಿದೆ.
