ದೇಸಾಯಿಯವರೇ, ಮರೆತುಬಿಟ್ರಾ ಹಾಶ್ಮಿನಗರ ...?

ಧಾರವಾಡ: ಇದು ಧಾರವಾಡ 71 ಕ್ಷೇತ್ರದ (ಗ್ರಾಮೀಣ) ಕುಗ್ರಾಮದಂತಿರುವ ಪ್ರದೇಶ. ಹೆಸರು ಹಾಶ್ಮಿನಗರ. ಎಲ್ಲ ವರ್ಗದ ಜನ ವಾಸಿಸುವ ಪ್ರದೇಶ. ಹುಬ್ಬಳ್ಳಿ- ಧಾರವಾಡ ಪಾಲಿಕೆ ವ್ಯಾಪ್ತಿಯಲ್ಲಿದ್ದರೂ ಮೂಲ ಸೌಲಭ್ಯಗಳಿಂದ ವಂಚಿತವಾಗಿದೆ. ಸುಸಜ್ಜಿತ ರಸ್ತೆಗಾಗಿ ಇಲ್ಲಿನ ಜನ ಜನಪ್ರತಿನಿಧಿಗಳಿಗೆ ದುಂಬಾಲು ಬಿದ್ದರೂ ಸಿಕ್ಕಿದ್ದು ಪುಕ್ಕಟೆ ಭರವಸೆಯೇ ಹೊರತು ಅಭಿವೃದ್ಧಿಯಲ್ಲ. ಹಾಗಾಗಿಯೇ ಇಲ್ಲಿನ ನಿವಾಸಿಗಳು, ಅಮೃತ ದೇಸಾಯಿ ಅವರೇ ಹಾಸ್ಮಿನಗರ ಮರೆತುಬಿಟ್ರಾ..? ಎಂದು ಪ್ರಶ್ನಿಸುತ್ತಿದ್ದಾರೆ.

ನಗರದ ಮಾಳಾಪುರದಿಂದ ಎತ್ತಿನಗುಡ್ಡಕ್ಕೆ ಹೋಗುವ ರಸ್ತೆಯಲ್ಲಿ ಹಾಶ್ಮಿನಗರ ಇದೆ. 8 ಅಡ್ಡರಸ್ತೆಗಳಿರುವ ಪ್ರದೇಶದಲ್ಲಿ ಅಂದಾಜು 1,200 ಮನೆಗಳಿವೆ. 24*7 ಕುಡಿಯುವ ನೀರಿನ ಸಂಪರ್ಕ ಇದ್ದು, ತೊಂದರೆ ಇಲ್ಲ. ವಿದ್ಯುತ್ ದೀಪದ ಸಮಸ್ಯೆ ಇಲ್ಲದಿದ್ದರೂ ತಂತಿ ಜೋತು ಬಿದ್ದು ಜನರಿಗೆ ತೊಂದರೆಯಾಗಿದೆ. ಗುಂಡಿಮಯ ಕಚ್ಚಾ ರಸ್ತೆಗಳು ಇಲ್ಲಿನ ನಿವಾಸಿಗಳ ಪ್ರಮುಖ ಸಮಸ್ಯೆಯಾಗಿದೆ.

ಶಾಸಕ ಅಮೃತ ದೇಸಾಯಿ ಪ್ರತಿನಿಧಿಸುವ ಧಾರವಾಡ- 71 (ಗ್ರಾಮೀಣ) ಕ್ಷೇತ್ರದ 8 ವಾರ್ಡ್​ಗಳ ಪೈಕಿ ವಾರ್ಡ್ ನಂ. 4ರಲ್ಲಿದೆ ಹಾಶ್ಮಿನಗರ. 15 ಅಡಿಯ ಕಚ್ಚಾ ರಸ್ತೆಗಳಿದ್ದು, ಮಳೆಗಾಲದಲ್ಲಿ ರಾಡಿಮಯವಾಗುತ್ತವೆ. ರಸ್ತೆ ಪಕ್ಕ ಗಟಾರಗಳಿಲ್ಲದಿರುವುದರಿಂದ ಮಳೆ ನೀರು ರಸ್ತೆಯಲ್ಲೇ ಜಮೆಯಾಗುತ್ತದೆ. ನಿರಂತರ ವಾಹನಗಳ ಸಂಚಾರದಿಂದ ಗುಂಡಿಮಯವಾಗಿದ್ದು, ಮಳೆಗಾಲದಲ್ಲಿ ಜನ ಹಾಗೂ ವಾಹನ ಸಂಚಾರ ಕಷ್ಟದಾಯಕ. ಜನರೇ ಸ್ವಂತ ಹಣ ವ್ಯಯಿಸಿ ಗುಂಡಿಮಯ ರಸ್ತೆಗಳಿಗೆ ಕೆಂಪು ಮಣ್ಣು ಹಾಕಿಸಿ ದುರಸ್ತಿ ಮಾಡಿಸಿಕೊಂಡ ಉದಾಹರಣೆಗಳಿವೆ. ಮಳೆಗಾಲ ಕಳೆಯುತ್ತಿದ್ದಂತೆ ವಾಹನಗಳ ಓಡಾಟದಿಂದ ವಿಪರೀತ ಧೂಳು ಹರಡುತ್ತಿದೆ.

ಜನಪ್ರತಿನಿಧಿಗಳಿಗೆ ದುಂಬಾಲು:

ಲೋಕಸಭೆ ಚುನಾವಣೆಗೂ ಮೊದಲು ಸಂಸದ ಪ್ರಲ್ಹಾದ ಜೋಶಿ ಹಾಗೂ ಶಾಸಕ ಅಮೃತ ದೇಸಾಯಿ ಹಾಶ್ಮಿನಗರಕ್ಕೆ ಭೇಟಿ ನೀಡಿದ್ದರು. 8 ಅಡ್ಡ ರಸ್ತೆಗಳಿಗೆ ಕಚ್ಚಾ ರಸ್ತೆ ನಿರ್ವಣಕ್ಕೆ ಭೂಮಿಪೂಜೆ ನೆರವೇರಿಸಿದ್ದರು. ಮುಂದಿನ ದಿನಗಳಲ್ಲಿ ಪಕ್ಕಾ ಸಿಮೆಂಟ್ ರಸ್ತೆ ನಿರ್ವಿುಸಿಕೊಡುವ ಭರವಸೆ ನೀಡಿದ್ದರು. ಆದರೆ ವರ್ಷಗಳೇ ಕಳೆದರೂ ರಸ್ತೆ ನಿರ್ವಣದ ಭರವಸೆ ಈಡೇರಿಲ್ಲ. ಈ ಬಗ್ಗೆ ಶಾಸಕ, ಸಂಸದ ಸೇರಿದಂತೆ ಪಾಲಿಕೆ ಅಧಿಕಾರಿಗಳಿಗೆ ಇಲ್ಲಿನ ನಿವಾಸಿಗಳು ಹಲವು ಬಾರಿ ಮನವಿ ಸಲ್ಲಿಸಿದ್ದಾರೆ. ಆದರೆ ಸಿಮೆಂಟ್ ರಸ್ತೆ, ಗಟಾರ ನಿರ್ವಣದ ಭರವಸೆ ಸಿಕ್ಕರೂ ಕಾಮಗಾರಿ ಕೈಗೊಳ್ಳುತ್ತಿಲ್ಲ ಎಂಬುದು ನಿವಾಸಿಗಳ ದೂರು.

ಎತ್ತಿನಗುಡ್ಡ ಮುಖ್ಯರಸ್ತೆ ಅರೆಬರೆ:

ಮತ್ತೊಂದೆಡೆ ಮಾಳಾಪುರದಿಂದ ಎತ್ತಿನಗುಡ್ಡಕ್ಕೆ ಹೋಗುವ ಮುಖ್ಯ ರಸ್ತೆಯ ಕಾಂಕ್ರೀಟೀಕರಣ ಕಾಮಗಾರಿ ಪ್ರಗತಿಯಲ್ಲಿದೆ. ಇದ್ದ ಡಾಂಬರ್ ರಸ್ತೆ ಕಿತ್ತು ಕಲ್ಲು- ಕಡಿ ಹಾಕಿ ಹಾಗೇ ಬಿಡಲಾಗಿದೆ. ಇದರಿಂದ ವಾಹನಗಳ ಸಂಚಾರಕ್ಕೆ ತೊಂದರೆಯಾಗುತ್ತಿದೆ. ಧೂಳು ತಡೆಗೆ ಆಗೊಮ್ಮೆ ಈಗೊಮ್ಮೆ ಟ್ಯಾಂಕರ್ ನೀರು ಸಿಂಪಡಿಸುತ್ತಿರುವುದು ಸಮಾಧಾನಕರ ಸಂಗತಿ.

ಕಸ ವಿಲೇವಾರಿ ಸಮಸ್ಯೆ:

ಹಾಶ್ಮಿನಗರದಲ್ಲಿ ನಿಯಮಿತ ಕಸ ವಿಲೇವಾರಿಯಾಗದಿರುವುದು ಮತ್ತೊಂದು ಸಮಸ್ಯೆ. ಜನ ಎತ್ತಿನಗುಡ್ಡ ಮುಖ್ಯರಸ್ತೆಯ ಪಕ್ಕ ಕಸ ಹಾಕುತ್ತಿದ್ದಾರೆ. ಆದರೆ, 4 ದಿನಗಳಿಗೊಮ್ಮೆ ಕಸ ವಿಲೇವಾರಿಯಾಗುತ್ತಿದೆ. ಹೀಗಾಗಿ ಕೆಲವೊಮ್ಮೆ ಕಸಕ್ಕೆ ಬೆಂಕಿ ಹಾಕಿ ಸುಡುವುದೂ ಇಲ್ಲಿ ಸಾಮಾನ್ಯವಾಗಿದೆ.