ದಾವಣಗೆರೆಯಲ್ಲಿ ಸ್ಕಿಜೋಫ್ರೀನಿಯಾ ದಿನಾಚರಣೆ

ಜಿಲ್ಲಾ ಮಾನಸಿಕ ಆರೋಗ್ಯ ಕಾರ್ಯಕ್ರಮ, ಭಾರತೀಯ ಕಲಾ ಸಾಂಸ್ಕೃತಿಕ ಅಕಾಡೆಮಿ ಸಹಯೋಗದಲ್ಲಿ ಇಲ್ಲಿನ ಮಾನಸಧಾರ- ಸಮುದಾಯ ಮಾನಸಿಕ ಆರೋಗ್ಯ ಕೇಂದ್ರದಲ್ಲಿ ಗುರುವಾರ ಹಮ್ಮಿಕೊಂಡಿದ್ದ ವಿಶ್ವ ಸ್ಕಿಜೋಫ್ರೀನಿಯಾ ಜಾಗೃತಿ ದಿನಾಚರಣೆ ಕಾರ್ಯಕ್ರಮದಲ್ಲಿ ಮಾತನಾಡಿದರು. ಕೆಲವು ಮಾನಸಿಕ ಕಾಯಿಲೆಗೆ ಮನೋವೈದ್ಯರು ನಿದ್ರೆ ಮಾತ್ರೆ ನೀಡುವುದು ಸಹಜ. ಕೆಲವರ ಮಿದುಳನ್ನು ಶಾಂತಸ್ಥಿತಿಗೆ ತರಲು ನಿದ್ರೆ ಮಾತ್ರೆ ಕೆಲಸ ಮಾಡಲಿದೆ. ಕೆಲವರು ರಾತ್ರೋರಾತ್ರಿ ಓಡಾಡುತ್ತಾರೆ. ಕಲ್ಲಿನಿಂದ ಹೊಡೆಯುತ್ತಿರುತ್ತಾರೆ. ಇಂಥವರನ್ನು ಹತೋಟಿಗೆ ತರಲು ನಿದ್ರೆ ಮಾತ್ರೆ ಬಳಸಲಾಗುತ್ತದೆ ಎಂದು ಸಮರ್ಥಿಸಿಕೊಂಡರು. ಯಾರೋ ನನ್ನನ್ನು ಗಮನಿಸುತ್ತಿದ್ದಾರೆ. ನನ್ನ ಬಗ್ಗೆ ಮಾತನಾಡಿಕೊಳ್ಳುತ್ತಿದ್ದಾರೆ ಎಂಬ ಶಂಕೆ ಸ್ಕಿಜೋಫ್ರೀನಿಯಾ ರೋಗಿಗಳಲ್ಲಿ ಇರುತ್ತದೆ. 25-35 ರ ವಯೋಮಾನದಲ್ಲಿ ಇದು ಕಂಡುಬರಲಿದೆ. ಶೇ.15ರಷ್ಟು ಜನರಲ್ಲಿ ಅನುವಂಶೀಯವಾಗಿ ಬರಲಿದೆ. ಖಿನ್ನತೆಯಲ್ಲಿರುವ ಈ ಕಾಯಿಲೆಪೀಡಿತರು ದೈನಂದಿನ ಚಟುವಟಿಕೆಗಳಲ್ಲಿ ತೊಡಗುವುದಿಲ್ಲ ಎಂದರು. 1950 ರಿಂದೀಚೆಗೆ ಮಾನಸಿಕ ಕಾಯಿಲೆಗೆ ಚಿಕಿತ್ಸೆಗಳು ಬಂದಿವೆ. ಶೇ.70-75ರಷ್ಟು ಮಾನಸಿಕ ರೋಗಿಗಳು ಗುಣಮುಖರಾಗಿ ಸಹಜ ಜೀವನ ನಡೆಸುತ್ತಿದ್ದಾರೆ. ನಮ್ಮ ಮನಸ್ಸು ಸದೃಢವಾಗಿದ್ದಲ್ಲಿ ಸ್ಕಿಜೋಫ್ರೀನಿಯಾವಲ್ಲದೆ ಯಾವುದೇ ಕಾಯಿಲೆಯನ್ನೂ ದೂರ ಮಾಡಬಹುದು ಎಂದು ತಿಳಿಸಿದರು. ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಪಾಲಿಕೆ ಸದಸ್ಯ ಎಸ್.ಟಿ.ವೀರೇಶ್ ಮನೋರೋಗಿಗಳ ಸೇವೆ ಮಾಡುವ ಮಾನಸಧಾರ ಕೇಂದ್ರದ ಸಿಬ್ಬಂದಿ ಕೆಲಸ ಉಳಿದೆಲ್ಲ ವೃತ್ತಿಗಿಂತಲೂ ಪುಣ್ಯವಾದುದು. ಮಾನಸಿಕ ರೋಗಿಗಳಿಗೆ ಜಿಲ್ಲೆಯಲ್ಲೇ ಏಕೈಕ ಚಿಕಿತ್ಸಾ ಕೇಂದ್ರಕ್ಕೆ ನಗರಪಾಲಿಕೆ ಮತ್ತು ಇತರೆ ವಿಧದ ನೆರವು ಕಲ್ಪಿಸಲಾಗುವದು ಎಂದು ಭರವಸೆ ನೀಡಿದರು. ವಕೀಲರ ಸಂಘದ ಜಿಲ್ಲಾಧ್ಯಕ್ಷ ಎಲ್.ಎಚ್.ಅರುಣಕುಮಾರ್ ಮಾತನಾಡಿ ಬಹುತೇಕ ಜನರಿಗೆ ಸ್ಕಿಜೋಫ್ರೀನಿಯಾ ಕಾಯಿಲೆ ಚಿಕಿತ್ಸೆ ಇರುವ ಬಗ್ಗೆ ಅರಿವಿಲ್ಲ. ಒತ್ತಡದ ಕಾರಣಕ್ಕೆ ಹಲವರು ಖಿನ್ನತೆಗೆ ಒಳಗಾಗುತ್ತಾರೆ. ಮನೋವೈದ್ಯರನ್ನು ಸಂಪರ್ಕಿಸಿ ಚಿಕಿತ್ಸೆ ಪಡೆದರೆ ಗುಣಮುಖರಾಗಬಹುದು ಎಂದರು. ಜಿಲ್ಲಾ ಮಾನಸಿಕ ಆರೋಗ್ಯ ಕಾರ್ಯಕ್ರಮದ ಮನಶ್ಯಾಸ್ತ್ರಜ್ಞ ಎಸ್. ವಿಜಯಕುಮಾರ್ ಮಾತನಾಡಿ ಸಿಜೋಫ್ರೀನಿಯಾ ಕಾಯಿಲೆಗೆ ತುತ್ತಾಗಿ ಗುಣಮುಖರಾದವರಲ್ಲಿ ಶೇ.6ರಷ್ಟು ಮಂದಿ ಸಹಜ ಜೀವನಕ್ಕೆ ಮರಳಿದರೆ, ಶೇ.3ರಷ್ಟು ಜನರಿಗೆ ಇತರರ ನೆರವು ಬೇಕು. ಕೆಲವರು ಆತ್ಮಹತ್ಯೆಗೆ ತುತ್ತಾಗುತ್ತಿದ್ದಾರೆ. ಸಮುದಾಯದಲ್ಲಿ ಮಾನಸಿಕ ಸಮಸ್ಯೆಗೆ ಒಳಗಾದವರಿಗೆ ಚಿಕಿತ್ಸೆ ಕೊಡಿಸಲು ಮುಂದಾಗಬೇಕು ಎಂದು ತಿಳಿಸಿದರು. ಸಂಸ್ಥೆಯ ಅಧ್ಯಕ್ಷ ಎನ್.ಮಲ್ಲೇಶಪ್ಪ, ಪತ್ರಕರ್ತ ಡಿ.ಎಂ.ಮಹೇಶ್, ನಾಗರಿಕ ಹಿತರಕ್ಷಣಾ ಸಮಿತಿ ಅಧ್ಯಕ್ಷ ಕಾಂತರಾಜ್, ಕೃಷಿಕ ರಾಮಾಂಜನೇಯ, ಎಂ. ಸೋಷಿಯಲ್ ವರ್ಕರ್ ಸಂತೋಷ್‌ಕುಮಾರ್ ಇದ್ದರು. ಎಪಿಡಿ ಸಂಸ್ಥೆಯ ಸಿಬ್ಬಂದಿ ನಾಗಮ್ಮ, ಶಂಕ್ರಮ್ಮ, ಯಲ್ಲಮ್ಮ ಅವರನ್ನು ಇದೇ ವೇಳೆ ಸನ್ಮಾನಿಸಲಾಯಿತು.