ಪಾಂಡವಪುರ ಕ್ಷೇತ್ರದಿಂದ ಆಗಮಿಸಿದ ಕನ್ನಡದ ರಥವನ್ನು ತಾಲೂಕಿನ ಗಡಿಗ್ರಾಮ ದರಸಗುಪ್ಪೆ ಗ್ರಾಮದಲ್ಲಿ ಬ್ಯಾಂಡ್ ವಾದನ ಹಾಗೂ ಕನ್ನಡ ಗೀತೆಗಳೊಂದಿಗೆ ಪುಷ್ಪಾರ್ಚನೆ ಮಾಡಿ ಬರಮಾಡಿಕೊಂಡಿದ್ದು ವಿಶೇಷವಾಗಿತ್ತು. ತಹಸೀಲ್ದಾರ್ ಪರಶುರಾಮ ಸತ್ತಿಗೇರಿ, ತಾಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ ವೇಣು, ಬಿಇಒ ಮಹೇಶ್, ಕಸಾಪ ತಾಲೂಕು ಅಧ್ಯಕ್ಷ ಸಿದ್ದಲಿಂಗು ಹಾಗೂ ದಸರಗುಪ್ಪೆ ಗ್ರಾಪಂ ಅಧ್ಯಕ್ಷ ಮುರಳಿ ಅವರ ನೇತೃತ್ವದಲ್ಲಿ ಕನ್ನಡದ ಕಟ್ಟಾಳುಗಳು ಹಾಗೂ ವಿವಿಧ ಇಲಾಖೆಗಳ ಅಧಿಕಾರಿಗಳು, ಸಂಘಟನೆಗಳ ಹೋರಾಟಗಾರರು ತಾಯಿ ಭುವನೇಶ್ವರಿದೇವಿಗೆ ಪೂಜೆ ಅರ್ಪಿಸಿದರು. ಶಾಲಾ ಮಕ್ಕಳು ಸೇರಿದಂತೆ ಕ್ಕಿಕ್ಕಿರಿದು ನೆರೆದಿದ್ದ ಗ್ರಾಮದ ಜನರು ಕನ್ನಡಾಂಬೆಗೆ ಜಯಕಾರ ಹಾಕಿದರು. ಅರುಣೋದಯ ಕಲಾತಂಡದ ಮಂಜುಳಾ ನೇತೃತ್ವದ ಕಲಾವಿದರು ಕನ್ನಡ ಗೀತೆಗಳನ್ನು ಹಾಡಿ ಕುಣಿದು ನೆರೆದವರನ್ನು ರಂಜಿಸಿದರು. ಈ ವೇಳೆ ನಾಡಧ್ವಜಗಳು ರಾರಾಜಿಸಿದವು.
