ತ್ಯಾಜ್ಯ ಘಟಕದಲ್ಲಿ ನಗರಸಭೆ ಸಿಬ್ಬಂದಿ ಕೃಷಿ; 40 ಕ್ವಿಂಟಾಲ್ ಮೆಕ್ಕೆಜೋಳ ಇಳುವರಿ, ಕಟಾವಿನ ನಿರೀಕ್ಷೆಯಲ್ಲಿ ರಾಗಿ

ಗೌರಿಬಿದನೂರು: ನಗರಸಭೆ ಕಸ ಸಂಗ್ರಹಣ ಘಟಕದಲ್ಲಿನ ಖಾಲಿ ಜಾಗದಲ್ಲಿ 40 ಮೂಟೆ ಮೆಕ್ಕೆಜೋಳ ಬೆಳೆಯುವ ಮೂಲಕ ನಗರಸಭೆ ಸಿಬ್ಬಂದಿ ಕಸದಲ್ಲಿ ರಸ ತೆಗೆದು ಪ್ರಶಂಸೆಗೆ ಪಾತ್ರರಾಗಿದ್ದಾರೆ.

ಇಡಗೂರು ಸಮೀಪದ ಮರಳೂರು ದಿನ್ನೆಯಲ್ಲಿರುವ ನಗರಸಭೆ ಕಸ ಸಂಗ್ರಹಣಾ ಘಟಕದ 3 ಎಕರೆಯಲ್ಲಿ ಬೆಳೆಯಲಾಗಿದ್ದ ಮೆಕ್ಕೆಜೋಳ ಹಾಗೂ ರಾಗಿಯಲ್ಲಿ ಮೆಕ್ಕೆಜೋಳ 40 ಮೂಟೆ ಇಳುವರಿ ಬಂದಿದೆ. ಮೆಕ್ಕೆಜೋಳದ ಜತೆಗೆ ರಾಗಿಯನ್ನೂ ಬೆಳೆಯಲಾಗಿದೆ.

3 ಎಕರೆಯಲ್ಲಿ ವಿವಿಧ ಬೆಳೆ ಬೆಳೆಯುವಂತೆ ಜಿಲ್ಲಾಧಿಕಾರಿ ಸೇರಿ ಇತರ ಅಧಿಕಾರಿಗಳು ಸಲಹೆ ನೀಡಿದ್ದರು. ಇದನ್ನು ಗಂಭೀರವಾಗಿ ಸ್ವೀಕರಿಸಿದ ಆಯುಕ್ತರು, ಸಿಬ್ಬಂದಿ ಜತೆಗೂಡಿ ಕೃಷಿ ಕಾರ್ಯಕ್ಕೆ ಚಾಲನೆ ನೀಡಿದ್ದರು. ಸಿಬ್ಬಂದಿ ಭೂಮಿ ಹದಗೊಳಿಸಿ, ಮುಂಗಾರು ಹಂಗಾಮಿನಲ್ಲಿ ಮೆಕ್ಕೆಜೋಳ ಹಾಗೂ ರಾಗಿ ಬಿತ್ತನೆ ಮಾಡಿದ್ದರು. ಈ ಬಾರಿ ಉತ್ತಮ ಮಳೆಯಾಗಿದ್ದರಿಂದ ನೀರಿನ ಕೊರತೆ ಕಾಡಿರಲಿಲ್ಲ. ಸಿಬ್ಬಂದಿ ಶ್ರಮಕ್ಕೆ ಈಗ ಪ್ರತಿಫಲ ದೊರೆತಿದೆ. ಜೋಳ ಕಟಾವು ಮಾಡಲಾಗಿದ್ದು, 40 ಮೂಟೆ ಇಳುವರಿ ಬಂದಿದೆ.

ಪೌರಕಾರ್ಮಿಕರ ಕಲ್ಯಾಣಕ್ಕೆ ಬಳಕೆ: ಜಮೀನನ್ನು ಸುಮ್ಮನೆ ಬಿಟ್ಟಿದ್ದರೆ ಗಿಡ-ಗಂಟಿ ಬೆಳೆಯುತ್ತಿದ್ದವು. ಆದರೆ ನಗರಸಭೆ ಸಿಬ್ಬಂದಿ ಶ್ರಮದಿಂದ ಉತ್ತಮ ಫಸಲು ಬಂದಿದೆ. ಅದರಿಂದ ಬಂದ ಹಣವನ್ನು ಪೌರಕಾರ್ಮಿಕರ ಕುಟುಂಬಗಳ ಕಲ್ಯಾಣಕ್ಕೆ ಬಳಕೆ ಮಾಡಲು ನಿರ್ಧರಿಸಲಾಗಿದೆ.