ಕಳೆದ ವರ್ಷ ಕರೊನಾ ನಡುವೆ ಮಾವಿಗೆ ಒಳ್ಳೆಯ ದರ ಸಿಕ್ಕಿತ್ತು, ಬೆಂಗಳೂರಿನಲ್ಲಿ ದಿನಕ್ಕೆ 10ರಿಂದ 15 ಟನ್ ಮಾವು ಮಾರಾಟ ಮಾಡಿದ್ದೆ, ಈ ಬಾರಿ ಕನಿಷ್ಠ 1 ಕೆಜಿ ಮಾರಲೂ ಸಾಧ್ಯವಾಗಿಲ್ಲ. ತೋಟ ಏನಾಗಿದೆಯೋ ದೇವರೇ ಬಲ್ಲ, ಮೇ 25ರಿಂದ ಜೂನ್ 30ರವರೆಗೆ ಮಾರಾಟಕ್ಕೆ ಅವಕಾಶ ಸಿಕ್ಕಿದರೆ ನಷ್ಟದಿಂದ ಪಾರಾಗುತ್ತೇನೆ.
ಅಶೋಕ ರಾಂಪುರ, ಪ್ರಗತಿಪರ ರೈತ, ಕೋಲಾರ
ಮಾವು ಮಂಡಳಿಗೆ ಸರ್ಕಾರ ನೀಡುವ 50 ಲಕ್ಷ ರೂ. ಅನುದಾನದಲ್ಲಿ ಮಂಡಳಿ ಕಚೇರಿಗೆ ಪ್ರತಿವರ್ಷ 25 ಲಕ್ಷ ರೂ. ಬಾಡಿಗೆಗೆ ಭರಿಸಲಾಗುತ್ತಿದೆ, ಆಡಳಿತಾತ್ಮಕ ವೆಚ್ಚ ಬೇರೆ, ಇದರಿಂದ ರೈತರಿಗೆ ಯಾವುದೇ ಪ್ರಯೋಜನವಿಲ್ಲ, ಮಂಡಳಿ ಸರ್ಕಾರದ ಮೇಲೆ ಒತ್ತಡ ತಂದು ಮಾವು ಬೆಳೆಗೆ ಪ್ರತಿ ಟನ್ಗೆ 10 ಸಾವಿರ ಇಲ್ಲವೇ 1 ಎಕರೆಗೆ 50 ಸಾವಿರ ರೂ. ಪರಿಹಾರ ಕೊಡಿಸಿದರೆ ಮಾತ್ರ ರೈತನಿಗೆ ಒಳ್ಳೆಯದಾಗುತ್ತದೆ, ಸರ್ಕಾರ ಮಾವು ಬೆಳೆಗಾರರನ್ನು ನಿರ್ಲಕ್ಷಿಸುವುದು ಸರಿಯಲ್ಲ.
ನೀಲಟೂರು ಚಿನ್ನಪ್ಪರೆಡ್ಡಿ, ಅಧ್ಯಕ್ಷ, ಮಾವು ಬೆಳೆಗಾರರ ಸಂಘ, ಶ್ರೀನಿವಾಸಪುರ
ಹತ್ತಾರು ವರ್ಷಗಳಿಂದ ತೋಟಕ್ಕೆ ಬರುವ ಖರೀದಿದಾರರಿಗೆ ಮಾವು ಮಾರಾಟ ಮಾಡುತ್ತಿರುವೆ, ಕಳೆದ ವರ್ಷವೂ ಖರೀದಿದಾರರು ನಿರೀಕ್ಷಿತ ಪ್ರಮಾಣದಲ್ಲಿ ಬರಲಿಲ್ಲ, ಈ ಬಾರಿ ಲಾಕ್ಡೌನ್ ಕಠಿಣವಾಗಿರುವುದರಿಂದ ಸ್ಥಳೀಯರೂ ಸಹ ತೋಟಕ್ಕೆ ಬರದಂತಾಗಿದೆ, ಸರ್ಕಾರ ಮಾವು ಬೆಳೆಗಾರರ ನೆರವಿಗೆ ಧಾವಿಸಬೇಕು.
ನೆಲಮನಹಳ್ಳಿ ಚಂದ್ರಶೇಖರ್, ಪ್ರಗತಿಪರ ರೈತ, ಕೋಲಾರ
ಹೂವು-ಹಣ್ಣು ಬೆಳೆಗಾರರಿಗೆ ಹೆಕ್ಟೇರ್ಗೆ 10 ಸಾವಿರ ರೂ. ಪರಿಹಾರ ನಿಗದಿ ಮಾಡಲಾಗಿದೆ. ಮಾವು ಬೆಳೆಗಾರರಿಗೆ ಯಾವುದೇ ಪ್ಯಾಕೇಜ್ ಘೋಷಣೆ ಆಗಿಲ್ಲ, ಮೇ 24ರಂದು ತೋಟಗಾರಿಕೆ ಸಚಿವರನ್ನು ಭೇಟಿಯಾಗಲು ಅವಕಾಶ ಕೋರಲಾಗಿದೆ, ಸಚಿವರು ಲಭ್ಯವಾದರೆ ಮಾವು ಬೆಳೆಗಾರರಿಗೆ ಎಕರೆಗೆ ಕನಿಷ್ಠ 10 ಸಾವಿರ ರೂ. ಪರಿಹಾರ ಕೊಡಿಸಲು ಮನವಿ ಮಾಡುವೆ, ಮಾವು ಮಂಡಳಿಗೆ ಸರ್ಕಾರದಿಂದ ಸಿಗುವ ಅನುದಾನ ಕಡಿಮೆಯಾದ್ದರಿಂದ ರೈತರಿಗೆ ಸಹಾಯ ಮಾಡಲು ಆಗುತ್ತಿಲ್ಲ.
ಕೆ.ವಿ.ನಾಗರಾಜ, ಅಧ್ಯಕ್ಷ, ಮಾವು ಅಭಿವೃದ್ಧಿ ಮಂಡಳಿ, ಬೆಂಗಳೂರು
