ತೆರಿಗೆ ಪಾವತಿಗೆ ನಗರಸಭೆಯಲ್ಲೇ ಕೌಂಟರ್

ಗೌರಿಬಿದನೂರು: ವಿವಿಧ ಕಂದಾಯಗಳ ಪಾವತಿಗಾಗಿ ಬ್ಯಾಂಕ್‌ಗೆ ಅಲೆದಾಡಬೇಕಾಗಿದ್ದ ನಗರದ ಜನತೆ ಇನ್ನು ಮುಂದೆ ನಗರಸಭೆಯಲ್ಲೇ ಪಾವತಿಗೆ ವ್ಯವಸ್ಥೆ ಕಲ್ಪಿಸಲು ಅಡಳಿತ ಮಂಡಳಿ ಮುಂದಾಗಿದೆ.

ಜನರು ಮನೆ ಕಂದಾಯ, ನೀರಿನ ಕಂದಾಯ, ಆಸ್ತಿ ಕಂದಾಯ ಪಾವತಿಸಬೇಕಾದ್ರೆ ಬ್ಯಾಂಕ್‌ಗೆ ತೆರಳಿ ಗಂಟೆಗಟ್ಟಲೆ ಸರದಿ ಸಾಲಲ್ಲಿ ನಿಲ್ಲಬೇಕಿತ್ತು. ಇದರಿಂದ ವೃದ್ಧರು ಮಹಿಳೆಯರು ನರಕ ಯಾತನೆ ಅನುಭವಿಸಬೇಕಿತ್ತು. ಈ ಸಮಸ್ಯೆಗೆ ಪರಿಹಾರ ಸೂಚಿಸುವ ನಿಟ್ಟಿನಲ್ಲಿ ನಗರಸಭೆ ಮಹತ್ವದ ಹೆಜ್ಜೆಯಿರಿಸಿದ್ದು, ಕಚೇರಿಯಲ್ಲೇ ಬ್ಯಾಂಕ್ ಕೌಂಟರ್ ತೆರೆಯುವ ನಿಲುವನ್ನು ಕೈಗೊಂಡಿದೆ.

ನಗರದ ಕೊಟಕ್ ಮಹೀಂದ್ರಾ ಬ್ಯಾಂಕ್ ಕೌಂಟರ್ ತೆರೆಯಲು ಮುಂದೆ ಬಂದಿದ್ದು, ಬುಧವಾರ ಬ್ಯಾಂಕಿನ ವ್ಯವಸ್ಥಾಪಕ ಶ್ರೀನಿವಾಸರೆಡ್ಡಿ ನಗರಸಭೆಗೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ಬೆಳಗ್ಗೆಯಿಂದ ಮಧ್ಯಾಹ್ನದ ಕಚೇರಿ ವೇಳೆಯಲ್ಲಿ ನಾಗರೀಕರು ಕಂದಾಯ ಪಾವತಿಸಲು ವ್ಯವಸ್ಥೆ ಕಲ್ಪಿಸಲು ನಗರಸಭೆಯಿಂದ ಅಗತ್ಯ ಸಿಬ್ಬಂದಿ ನೇಮಿಸಲಾಗುತ್ತಿದೆ. ಇದರಿಂದ ಒಂದೇ ಮಳಿಗೆಯಲ್ಲಿ ವಿವಿಧ ರೀತಿಯ ಕಂದಾಯಗಳನ್ನು ಪಾವತಿಸಲು ಸಹಕಾರಿಯಾಗಿರುವುದರಿಂದ ಜನರ ಪರದಾಟಕ್ಕೆ ಮುಕ್ತಿ ಸಿಗಲಿದೆ.