ಬೆಳ್ಳಂಬೆಳಗ್ಗೆ ಆಸ್ಪತ್ರೆಗೆ ಬಂದರೂ ರೋಗಿಗಳು ವೈದ್ಯರನ್ನು ಭೇಟಿ ಮಾಡಲು ಭಾರೀ ಸಾಹಸ ಮಾಡಬೇಕಾಗಿದೆ. ಸದಾ ಜನಗಳಿಂದ ಗಿಜಿಗುಟ್ಟುವ ಒಪಿಡಿ ಚೀಟಿ ಕೊಡುವ ಕೌಂಟರಿನಲ್ಲಿ ಕೇವಲ ಇಬ್ಬರು ಸಿಬ್ಬಂದಿಯನ್ನು ನಿಯೋಜಿಸಲಾಗಿದ್ದು, ಸದಾ ಕಾಲವೂ ಸರ್ವರ್ ಬಿಜಿ ಮುಂತಾದ ಸಮಸ್ಯೆಗಳಿಂದ ಚೀಟಿ ಕೊಡುವುದು ತುಂಬಾ ತಡವಾಗುತ್ತಿದೆ. ಒಪಿಡಿ ಚೀಟಿ ಪಡೆದರೂ ಹನ್ನೊಂದು ಗಂಟೆಯಾದರೂ ವೈದ್ಯರು ಆಸ್ಪತ್ರೆಯತ್ತ ಸುಳಿಯದ ಪರಿಣಾಮ ವೈದ್ಯರಿಗಾಗಿ ಬಹಳ ಹೊತ್ತು ಕಾಯಬೇಕಾಗಿದೆ.
ವೈದ್ಯರ ಕೊಠಡಿಗೆ ಹೋದರೆ ಅಲ್ಲಿಯೂ ಸರದಿಯಲ್ಲಿ ನಿಂತರೋಗಿಗಳನ್ನು ನೋಡುವವರೆಗೆ ಕಾಯುತ್ತಾ ನಿಲ್ಲುವ ಜತೆಗೆ ರಕ್ತ, ಮಲಮೂತ್ರ, ಮೂಳೆ ಮುರಿತಗಳಿಗೆ ಎಕ್ಸ್ರೇ, ನಾನಾ ಭಾಗಗಳಲ್ಲಿನ ಸಮಸ್ಯೆಗಳ ಪತ್ತೆಗೆ ಸ್ಕ್ಯಾನಿಂಗ್ ಅಥವಾ ಇನ್ನಾವುದೇ ಪರೀಕ್ಷೆಗಳಿಗೆ ಶಿಫಾರಸ್ಸು ಮಾಡಿದರೆ ಇಡೀ ದಿನ ಮುಗಿದೇ ಹೋಗುತ್ತಿದೆ. ಪರೀಕ್ಷೆಗೆ ಅಗತ್ಯವಾದ ಹಣವನ್ನು ಕೌಂಟರಿನಲ್ಲಿ ಕಟ್ಟಿ ಚೀಟಿ ಪಡೆದುಕೊಳ್ಳುವವರೆಗೆ ಮಧ್ಯಾಹ್ನವಾಗುವುದರಿಂದ 3 ಗಂಟೆವರೆಗೆ ಬಾಗಿಲು ಮುಚ್ಚಲಾಗುತ್ತದೆ. ಮಧ್ಯಾಹ್ನದ ನಂತರ ವಿದ್ಯುತ್ ಕೈಕೊಟ್ಟರಂತೂ ಯಾವುದೇ ಪರೀಕ್ಷೆಗಳನ್ನು ಮಾಡಿಸಲು ಆಗದೆ ದುಬಾರಿ ಬೆಲೆ ತೆತ್ತು ಖಾಸಗಿ ಪ್ರಯೋಗಾಲಯಗಳಲ್ಲಿ ಪರೀಕ್ಷೆ ಮಾಡಿಸಿಕೊಳ್ಳುವಂತಾಗಿದೆ.
