ತಾಯಿ ಓದಿದ ಹಳ್ಳಿಗೆ ಶಾಲೆ ನಿರ್ಮಿಸಿಕೊಟ್ಟ ಮಗ : ಕೋರಾದಲ್ಲಿ ಸರ್ಕಾರಿ ಹೈಟೆಕ್​ ಶಾಲೆ

ಸೋರಲಮಾವು ಶ್ರೀಹರ್ಷ ತುಮಕೂರು

ತಾಯಿ ಒಂದೆರಡು ವರ್ಷ ಓದಿದ ಶಾಲೆ ಎಂಬ ಕಾರಣಕ್ಕೆ ಬಹುವರ್ಷದ ನಂತರ ಅವರ ಮಗ ಸರ್ಕಾರಿ ಶಾಲೆಗೆ 2 ಕೋಟಿ ರೂ. ವೆಚ್ಚದಲ್ಲಿ ಸುಸಜ್ಜಿತ ಕಟ್ಟಡ ನಿರ್ಮಿಸಿಕೊಟ್ಟಿರುವ ಸಾರ್ಥಕ ಕೆಲಸ ತಾಲೂಕಿನ ಕೋರಾದಲ್ಲಿ ನಡೆದಿದೆ.

ಬೆಂಗಳೂರಿನಲ್ಲಿ ಖಾಸಗಿ ಉದ್ಯಮ ನಡೆಸುತ್ತಿರುವ ಹರ್ಷ ಎಚ್​.ಮಠ್​ ಅವರ ತಾಯಿ ಸರ್ವಮಂಗಳಾ ನಾಗಯ್ಯ ಅವರ ನೆನಪಿಗೆ ಕೋರಾ ಸರ್ಕಾರಿ ಶಾಲೆಯನ್ನು ನಿರ್ಮಿಸಿಕೊಟ್ಟಿದ್ದು ಗ್ರಾಮೀಣ ಮಕ್ಕಳಿಗೆ ಅನುಕೂಲವಾಗಲಿದೆ.

ಶಿರಾಗೆ ತೆರಳುವ ಮಾರ್ಗದಲ್ಲಿ ತುಮಕೂರು ಹೊರವಲಯದಲ್ಲಿರುವ ಕೋರಾ ಹೋಬಳಿ ಕೇಂದ್ರವಾಗಿದ್ದು, ರಾಷ್ಟ್ರೀಯ ಹೆದ್ದಾರಿ 48ರ ವಿಸ್ತರಣೆ ಕಾರಣಕ್ಕೆ ಗ್ರಾಮದ ಶಾಲೆ ಕಟ್ಟಡ ಕೆಡವಲಾಗಿತ್ತು.

2 ವರ್ಷದ ಹಿಂದೆ ಕಾರ್ಯನಿಮಿತ್ತ ರಾಷ್ಟ್ರೀಯ ಹೆದ್ದಾರಿಯಲ್ಲಿ ತೆರಳುವ ಮಾರ್ಗದಲ್ಲಿ "ಕೋರಾ' ಎಂಬ ಹೆಸರು ಕಂಡು ತಾಯಿಯ ಊರು ಎಂಬ ಅಭಿಮಾನದಿಂದ ಕಾರು ನಿಲ್ಲಿಸಿ ಇಳಿದಿದ್ದು, ಈ ಸತ್ಕಾರ್ಯಕ್ಕೆ ಕಾರಣವಾಗಿದೆ. ಊರಿನ ಮೊಮ್ಮಗ, ದಾನಿ ಹರ್ಷ ಎಚ್​.ಮಠ್​ ಅವರ ಬಗ್ಗೆ ಇಲ್ಲಿನ ಜನರಲ್ಲಿ ಅಭಿಮಾನವೇ ಮೂಡಿದೆ.

ಗ್ರಾಮಸ್ಥರ ಬಹುದಿನದ ಕನಸು: ರಾಷ್ಟ್ರೀಯ ಹೆದ್ದಾರಿ 48ರ ಪಕ್ಕದಲ್ಲಿಯೇ ಇರುವ ಕೋರಾ ಸರ್ಕಾರಿ ಶಾಲೆಯ ವಾತಾವರಣ ಕಲಿಕೆಗೆ ಪೂರಕವಾಗಿರಲಿಲ್ಲ, ಸದಾ ವಾಹನಗಳ ಶಬ್ಧ ಹಾಗೂ ಮಕ್ಕಳು ರಸ್ತೆ ದಾಟುವಾಗ ಅಪಘಾತ ಕೂಡ ಸಂಭವಿಸಿದ್ದೂ ಸಾಕಷ್ಟಿದೆ. ಇದೆಲ್ಲಾ ಆತಂಕದ ನಡುವೆ ಹೊಸ ಕಟ್ಟಡ ನಿರ್ಮಿಸಬೇಕು ಎಂಬ ಬೇಡಿಕೆ ಈ ಗ್ರಾಮದ ಬಹುದಿನ ಬೇಡಿಕೆಯಾಗಿತ್ತು.

ನಾಳೆ ಶಾಲಾ ಕಟ್ಟಡ ಉದ್ಘಾಟನೆ: ಹರ್ಷ ಎಚ್​.ಮಠ್​ ಅವರ ನೆರವಿನಿಂದ ಕೋರಾ ಗ್ರಾಮದಲ್ಲಿ 2ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣವಾಗಿರುವ 14 ಕೊಠಡಿಗಳಿರುವ ಸುಸಜ್ಜಿತ ಹೈಟೆಕ್​ ಶಾಲೆ ಉದ್ಘಾಟನಾ ಸಮಾರಂಭ ಏ.20ರಂದು ಬೆಳಗ್ಗೆ 11ಕ್ಕೆ ನಡೆಯಲಿದೆ.

ತಾಯಿಯ ಊರಿನೊಂದಿಗೆ ಸಂಪರ್ಕದಲ್ಲಿರುವ ತುಡಿತದಿಂದ, ಆಕೆಯ ನೆನಪಿಗಾಗಿ ಬಡ ಮಕ್ಕಳಿಗೆ ಅನುಕೂಲವಾಗುವಂತೆ ಸಾರ್ಥಕ ಕೆಲಸ ಮಾಡಿರುವ ಶ್ರೀಮಮತಾ ಮತ್ತು ಹರ್ಷ ಎಚ್​.ಮಠ್​ ದಂಪತಿಗೆ ಗ್ರಾಮಸ್ಥರೇ ಸನ್ಮಾನ ಏರ್ಪಡಿಸಿದ್ದು, ಗ್ರಾಮದಲ್ಲಿ ಹಬ್ಬದ ಕಳೆ ಮೂಡಿದೆ. ಶಾಲೆಯ ಹಿರಿಯ, ಕಿರಿಯ ವಿದ್ಯಾರ್ಥಿಗಳು, ಗ್ರಾಮಸ್ಥರು, ಜನಪ್ರತಿನಿಧಿಗಳು ಹಾಗೂ ಶಿಕ್ಷಣ ಇಲಾಖೆ ಅಧಿಕಾರಿಗಳು ಈ ಸಂಭ್ರಮದಲ್ಲಿ ಭಾಗಿಯಾಗಲಿದ್ದಾರೆ.