ತಾಲೂಕಿನ ಪಂಚವಳ್ಳಿ ಗ್ರಾಮದಲ್ಲಿ ರಿಯಾಜ್ ಪಾಷಾ ಎಂಬಾತ ಗುಜರಿ ತೆರೆದು ವಹಿವಾಟು ನಡೆಸುತ್ತಿದ್ದು, ಗುಜರಿಯಲ್ಲಿ ಕೆಲಸ ಮಾಡಲು ದೂರದ ಅಸ್ಸಾಂನಿಂದ 9 ಮಹಿಳೆಯರು ಸೇರಿ 20ಕ್ಕೂ ಹೆಚ್ಚು ಕಾರ್ಮಿಕರಿಗೆ ಮುಂಗಡ ಹಣ ನೀಡಿ ಕರೆತಂದಿದ್ದ. ಅವರೊಂದಿಗೆ ಪುಟ್ಟ ಮಕ್ಕಳು ಸಹ ಇವೆ. ಕೂಲಿಕಾರ್ಮಿಕರು ಉಳಿದುಕೊಳ್ಳಲು ತಾಲೂಕಿನ ಪಂಚವಳ್ಳಿ ಸಮೀಪದ ಮುದ್ದನಹಳ್ಳಿ ಗ್ರಾಮದಲ್ಲಿ ಎರಡು ಬಾಡಿಗೆ ಮನೆ ಮಾಡಿಕೊಟ್ಟಿದ್ದು, ಪುರುಷರಿಗೆ 500 ರೂ. ಮತ್ತು ಮಹಿಳೆಯರಿಗೆ 400 ರೂ. ದಿನಗೂಲಿ ನೀಡುವುದಾಗಿ ತಿಳಿಸಿದ್ದ. ಆದರೆ ಎರಡು ತಿಂಗಳಿನಿಂದ ಸರಿಯಾಗಿ ಕೂಲಿ ಹಣ ನೀಡದೆ ಸತಾಯಿಸಿದ್ದಾನೆ. ಜು. 6ರಂದು ಗುಜರಿಯಲ್ಲಿದ್ದ ಪದಾರ್ಥಗಳನ್ನೆಲ್ಲ ಮಾರಾಟ ಮಾಡಿ, ಹಣ ತರುವುದಾಗಿ ತೆರಳಿದ್ದ ರಿಯಾಜ್ ಪಾಷಾ ವಾರವಾದರೂ ಹಿಂದಿರುಗಿಲ್ಲ. ಇದರಿಂದ ಊಟಕ್ಕೂ ಹಣವಿಲ್ಲದೆ ಪರದಾಡುತ್ತಿದ್ದ ಕೂಲಿಕಾರ್ಮಿಕರು ಜು.14ರಂದು ಪಿರಿಯಾಪಟ್ಟಣ ತಾಲೂಕು ಕಚೇರಿಗೆ ತೆರಳಿ ಕಾರ್ಮಿಕ ಇಲಾಖೆ ಅಧಿಕಾರಿಗಳಿಗೆ ಮೌಖಿಕವಾಗಿ ದೂರು ನೀಡಿದ್ದರು. ಆದರೆ ಇವರ ದೂರನ್ನು ಗಂಭೀರವಾಗಿ ಪರಿಗಣಿಸದ ಕಾರ್ಮಿಕ ಇಲಾಖೆ ಸಿಬ್ಬಂದಿ, ಗ್ರಾಮಕ್ಕೆ ಬಂದು ಪರಿಶೀಲನೆ ನಡೆಸುವುದಾಗಿ ಹೇಳಿ ಕಾರ್ಮಿಕರನ್ನು ಅಲ್ಲಿಂದ ಸಾಗಹಾಕಿದ್ದರು.
