ದಾವಣದ ಹೊಸಳ್ಳಿ--& ಕಾಮಲಾಪುರ& ಹೊಸೂರು& ದಗ್ಗೇನಹಳ್ಳಿ& ಬರಣಾಪುರ ಮಾರ್ಗವಾಗಿ ತಮ್ಮಡಿಹಳ್ಳಿ&ಕುಪ್ಪೂರು ಮಾರ್ಗದಲ್ಲಿ ಬಸ್ ಸೌಲಭ್ಯ ಒದಗಿಸುವಂತೆ ಸದರಿ ಭಾಗದ ಜನ, ವಿದ್ಯಾರ್ಥಿಗಳು ಸ್ಥಳಿಯ ಶಾಸಕರು, ಕೇಂದ್ರ ಮಂತ್ರಿಗಳು, ಕೆಎಸ್ಆರ್ಟಿಸಿ ಅಧಿಕಾರಿ ಗಳಿಗೆ ಸತತವಾಗಿ ಮನವಿ ಮಾಡುತ್ತಿದ್ದರೂ ಪ್ರಯೋಜನವೇ ಆಗಿಲ್ಲ. ನೆರೆಯ ಹಾಸನ, ಚಿತ್ರದುರ್ಗ ಹಾಗೂ ಚಿಕ್ಕಮಗಳೂರು ಜಿಲ್ಲೆಯ ಗಡಿಗೆ ಹೊಂದಿಕೊಂಡಿರುವ ಹಂದನಕೆರೆ ತುಮಕೂರಿನಿಂದ ಬರೋಬ್ಬರಿ 110ಕಿಮೀ ದೂರದಲ್ಲಿದ್ದು, ಈ ಭಾಗದಲ್ಲಿ ಬಸ್ ಸೌಲಭ್ಯ ನೀಡುವಂತೆ ಕೆಎಸ್ಆರ್ಟಿಸಿ ವಿಭಾಗಾಧಿಕಾರಿಗೆ ಸಾಕಷ್ಟು ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ. ಬೆನಕನಕಟ್ಟೆ, ತಮ್ಮಡಿಹಳ್ಳಿ ಜನ ಚಿಕ್ಕನಾಯಕನಹಳ್ಳಿ ತಲುಪಲು 5ಕಿಮೀ ದೂರದ ಕುಪ್ಪೂರು ತಲುಪಿ ಅಲ್ಲಿಂದ ಬಸ್ ಸೌಲಭ್ಯ ಪಡೆಯಬೇಕು, ತಿಪಟೂರು ಅಥವಾ ಹುಳಿಯಾರು ಕಡೆ ತೆರಳಲು 5ಕಿಮೀ ದೂರದ ಬರಣಾಪುರ ತಲುಪಬೇಕು, ವಿದ್ಯಾರ್ಥಿಗಳು ಶಾಲೆ, ಕಾಲೇಜು ತಲುಪಲು ನೇರವಾಗಿ ಬಸ್ ಸೌಲಭ್ಯವಿಲ್ಲ. ತಾಲೂಕು ಕೇಂದ್ರ ಚಿಕ್ಕನಾಯಕನಹಳ್ಳಿ, ತಿಪಟೂರು ಅಥವಾ ಹುಳಿಯಾರು ತಲುಪಲು ಸಾಹಸಪಡಬೇಕಾದ ಸ್ಥಿತಿಯಿದೆ.
