ತ್ರಿದುರ್ಗ: ತಾಲೂಕಿನ ವಿವಿಧ ಭಾಗದ 500ಕ್ಕೂ ಹೆಚ್ಚು ಕಾಂಗ್ರೆಸ್ ಮುಖಂಡರು ಮಾಜಿ ಸಂಸದ ಎಸ್.ಪಿ. ಮುದ್ದಹನುಮೇಗೌಡ ಸಮ್ಮುಖದಲ್ಲಿ ಬಿಜೆಪಿ ಸೇರ್ಪಡೆಯಾಗಿದ್ದು, ಕುಣಿಗಲ್ ತಾಲೂಕಿನ ರಾಜಕೀಯ ವಲಯದಲ್ಲಿ ಸಂಚಲನ ಮೂಡಿಸಿದೆ.
ತಾಲೂಕಿನ ಅಂಚೇಪಾಳ್ಯ ಸಮೀಪದ ಖಾಸಗಿ ಕಲ್ಯಾಣ ಮಂಟಪದಲ್ಲಿ ಭಾನುವಾರ ಹಮ್ಮಿಕೊಂಡಿದ್ದ ಪಕ್ಷ ಸೇರ್ಪಡೆ ಸಮಾರಂಭದಲ್ಲಿ ಜಿಪಂ ಮಾಜಿ ಸದಸ್ಯೆ ಭಾಗ್ಯಮ್ಮ, ಕೆಂಪೀರೇಗೌಡ, ತಾಪಂ ಮಾಜಿ ಅಧ್ಯಕ್ಷ ಕೆಂಪೇಗೌಡ, ಬೈರೇಗೌಡ, ಸೇರಿದಂತೆ ತಾಲೂಕಿನ ಪ್ರಮುಖ ಕಾಂಗ್ರೆಸ್ ಮುಖಂಡರು ಬಿಜೆಪಿಗೆ ಸೇರ್ಪಡೆಯಾದರು.
ಮಾಜಿ ಸಂಸದ ಎಸ್.ಪಿ.ಮುದ್ದಹನುಮೇಗೌಡ ಮಾತನಾಡಿ, ಕುಣಿಗಲ್ನಲ್ಲಿ ಕಾಂಗ್ರೆಸ್ ಖಾಲಿಯಾಗಲು ಡಿಕೆ ಸಹೋದರರೇ ಕಾರಣ, ಅವರ ದುಷ್ಟ ರಾಜಕಾರಣಕ್ಕೆ ಬೇಸತ್ತು ಕಾರ್ಯಕರ್ತರು, ಮುಖಂಡರು ಸಾಮೂಹಿಕವಾಗಿ ಬಿಜೆಪಿ ಸೇರ್ಪಡೆಯಾಗುತ್ತಿದ್ದಾರೆ ಎಂದರು.
ನಾನು ನ್ಯಾಯಾಧೀಶನ ಹುದ್ದೆ ತೊರೆದು ರಾಜಕಾರಣ ಆರಂಭಿಸಿದಾಗ ಕಾಂಗ್ರೆಸ್ ಕಟ್ಟಲು ಎದುರಿಸಿದ್ದು ಹಿರಿಯ ಮುಖಂಡ ಜನತಾದಳದ ವೈ.ಕೆ.ರಾಮಯ್ಯ ಅಂತಹ ಧೀಮಂತ ನಾಯಕನ ವಿರುದ್ಧ. ಕಾಂಗ್ರೆಸ್ ಕಟ್ಟಲು ನಾನೂ ಸೇರಿದಂತೆ ಸಾವಿರಾರು ಕಾರ್ಯಕರ್ತರ ಬೆವರು ಇದೆ. ಆದರೆ, ಇಂದು ಡಿಕೆ ಕುಟುಂಬದ ಪಕ್ಷವಾಗಿದೆ ಎಂದರು.
ನನ್ನ ರಾಜಕೀಯದ ಮೊದಲ ಚುನಾವಣೆಯಲ್ಲಿಯೇ ಕೊಟ್ಟ ಬಿ.ಫಾರಂ ಕಿತ್ತುಕೊಂಡು ಕೆ.ಲಕ್ಕಪ್ಪ ಅವರಿಗೆ ಸಿ.ಫಾರಂ ಕೊಟ್ಟರು. ನಂತರ 10 ವರ್ಷ ಶಾಸಕನಾಗಿ, ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷನಾಗಿ ಕೆಲಸ ಮಾಡಿದ್ದರೂ ನನಗೆ 2008ರಲ್ಲಿ ಕುಣಿಗಲ್ ಹಾಗೂ ತುಮಕೂರು ಗ್ರಾಮೀಣ ಕ್ಷೇತ್ರದಲ್ಲಿ ಟಿಕೆಟ್ ಕೇಳಿದರೂ ಕೊಡಲಿಲ್ಲ ಎಂದರು.
ಜೆಡಿಎಸ್ ಸೇರ್ಪಡೆಯಾದಾಗ 2009ರಲ್ಲಿ ಸಂಸತ್ ಚುನಾವಣೆಯಲ್ಲಿ ಸ್ಪರ್ಧಿಸಿದ್ದೆ, 2013ರಲ್ಲಿ ನನಗೆ ಬಿ.ಫಾರಂ ನೀಡಿದ್ದ ನಂತರ ಬೇರೊಬ್ಬರಿಗೆ ಸಿ.ಫಾರಂ ಕೊಟ್ಟು ನನಗೆ ಅಲ್ಲೂ ವಂಚಿಸಲಾಯಿತು. 2014ರಲ್ಲಿ ಕಾಂಗ್ರೆಸ್ ಮುಖಂಡರು ಸಹಕಾರದಿಂದ ಸಂಸತ್ ಸದಸ್ಯನಾಗಿ ಕ್ರಿಯಾಶೀಲವಾಗಿ ಕೆಲಸ ಮಾಡಿದರೂ ಕುತಂತ್ರ ಮಾಡಿದರು ಎಂದು ಆಕ್ರೋಶ ಹೊರಹಾಕಿದರು.
ನನ್ನ ರಾಜಕೀಯ ಜೀವನದಲ್ಲಿ ಸದಾ ಕಿರುಕುಳ ನೀಡುತ್ತಲೇ ಬಂದಿದ್ದಾರೆ. ನಾನು ನನ್ನ ಪಾಡಿಗೆ ಕೆಲಸ ಮಾಡಿಕೊಂಡಿದ್ದೆ, ಇವರ ಸಿಎಂ ಕುರ್ಚಿಗೆ ಅಡ್ಡಗಾಲಾಗಿರಲಿಲ್ಲ ಎಂದು ಭಾವುಕರಾದರು.
ಬಿಜೆಪಿ ರಾಜ್ಯ ಉಪಾಧ್ಯಕ್ಷ ಎಂ.ಬಿ.ನಂದೀಶ್, ಮಾಜಿ ಶಾಸಕ ಬಿ.ಸುರೇಶ್ಗೌಡ, ಜಿಪಂ ಮಾಜಿ ಅಧ್ಯಕ್ಷ ವೈ.ಎಚ್.ಹುಚ್ಚಯ್ಯ, ಮುಖಂಡರಾದ ಎಚ್.ಡಿ.ರಾಜೇಶ್ಗೌಡ, ಬಲರಾಮ್ ಮತ್ತಿತರರು ಇದ್ದರು.
