ಟೊಮ್ಯಾಟೊ ಬೆಲೆ ದಿಢೀರ್​ ಏರಿಕೆ : 15 ಕೆ.ಜಿ ಬಾಕ್ಸ್​ಗೆ 400 - 800 ರೂ., ಪೂರೈಕೆ ಕೊರತೆಯಿಂದ ಬೆಲೆ ಏರಿಕೆ

ಜಿ.ನಾಗರಾಜ್​ ಬೂದಿಕೋಟೆ

ಬೆಲೆ ಹಾಗೂ ಬೇಡಿಕೆ ಇಲ್ಲದೆ ಕಂಗಾಲಾಗಿದ್ದ ಟೊಮ್ಯಾಟೊ ಬೆಳೆಗಾರರಲ್ಲಿ ಸಂತಸ ಮನೆ ಮಾಡಿದೆ. ದಿನೇ ದಿನೆ ಬೆಲೆ ಏರಿಕೆಯಾಗುತ್ತಿರುವುದರಿಂದ ಹೊರ ರಾಜ್ಯಗಳ ವ್ಯಾಪಾರಿಗಳು ಕೋಲಾರ ಮಾರುಕಟ್ಟೆಗೆ ಬರಲಾರಂಭಿಸಿದ್ದಾರೆ.

ಕೋಲಾರ ಜಿಲ್ಲೆ ಟೊಮ್ಯಾಟೊ ಬೆಳೆಗೆ ಹೆಸರುವಾಸಿಯಾಗಿದ್ದು, ಹಲವು ರಾಜ್ಯಗಳಿಗೆ ರಪ್ತು ಆಗುವುದರಿಂದ ಉತ್ತಮ ಬೆಲೆ ಇರುತ್ತಿತ್ತು. ಅಕಾಲಿಕ ಮಳೆ ಹಾಗೂ ಇತರ ಕಾರಣಗಳಿಂದ 4 -5  ತಿಂಗಳುಗಳಿಂದ ಕೇಳುವವರೇ ಇಲ್ಲದೆ ರೈತರು ತೋಟದಲ್ಲಿಯೇ ಬೆಳೆ ಬಿಟ್ಟಿದ್ದರೆ ಇನ್ನೂ ಕೆಲವರು ನಾಶ ಮಾಡಿದ್ದರು. ಈಗ ಏಕಾಏಕಿ ಡಿಮಾಂಡ್​ ಬಂದಿದ್ದು, ಕೋಲಾರದ ಎಪಿಎಂಸಿ ಮಾರುಕಟ್ಟೆಯಲ್ಲಿ 15 ಕೆ.ಜಿ ಬಾಕ್ಸ್​ 400 ರಿಂದ 800 ರೂ.ವರೆಗೂ ಮಾರಾಟವಾಗುತ್ತಿದೆ.

ಬೆಲೆ ಏರಿಕೆಗೆ ಕಾರಣ: ಜಿಲ್ಲೆಯಲ್ಲಿ ಸುರಿದ ಅಕಾಲಿಕ ಮಳೆಯಿಂದ ಹಾಗೂ ಊಜಿ ಕಾಟದಿಂದ ಅಪಾರ ಪ್ರಮಾಣದ ಬೆಳೆ ನಾಶವಾಗಿ ಟೊಮ್ಯಾಟೊ ಗುಣಮಟ್ಟ ಕಳೆದುಕೊಂಡಿತ್ತು. ಇದೇ ಸಮಯಕ್ಕೆ ಹೊರ ರಾಜ್ಯಗಳ ವ್ಯಾಪಾರಸ್ಥರು ಮಾರುಕಟ್ಟೆಗೆ ಬರಲಿಲ್ಲ. ಇದರಿಂದಾಗಿ ಮಾರುಕಟ್ಟೆಯಲ್ಲಿ ಬೆಲೆಯೂ ದಿಢೀರನೆ ಕುಸಿಯಿತು. ಕಂಗಾಲಾದ ಬೆಳೆಗಾರರು ಮುಂದೆ ಇದೇ ಸಮಸ್ಯೆ ಉಂಟಾಗಬಹುದು ಎಂದು ಬೆಳೆ ಬೆಳೆಯಲು ಮುಂದಾಗಲಿಲ್ಲ. ಈಗ ವ್ಯಾಪಾರಸ್ಥರು ಬರುತ್ತಿದ್ದು, ಬೇಡಿಕೆಗೆ ತಕ್ಕಂತೆ ಮಾರುಕಟ್ಟೆಯಲ್ಲಿ ಆವಕ ಇಲ್ಲದ ಕಾರಣ ಬೆಲೆ ದಿನದಿಂದ ದಿನಕ್ಕೆ ಏರಿಕೆ ಕಾಣುತ್ತಿದೆ. ಕೆಲ ತಿಂಗಳುಗಳಿಂದ ಬೆಲೆ ಮತ್ತು ಬೇಡಿಕೆ ಇಲ್ಲದ ಕಾರಣ ರೈತರು ಬೆಳೆ ರಕ್ಷಣೆ ಕಡೆ ಹೆಚ್ಚಾಗಿ ಗಮನಹರಿಸಿರಲಿಲ್ಲ. ಈಗ ಬಂಗಾರದ ಬೆಲೆ ಬರುತ್ತಿರುವುದರಿಂದ ಬೆಳೆ ರಕ್ಷಣೆಗೆ ಮುಂದಾಗಿದ್ದು, ರೋಗಕ್ಕೆ ಒಳಗಾದ ತೋಟಗಳಿಗೂ ಕೀಟನಾಶಕ ಸಿಂಪಡಣೆಗೆ ಮುಂದಾಗಿದ್ದಾರೆ. ಕಟಾವು ಹಂತಕ್ಕೆ ಬಂದಿದ್ದರೂ ಬೆಳೆಯನ್ನು ಬೇಕಾಬಿಟ್ಟಿ ಬಿಟ್ಟಿದ್ದ ರೈತರು ಈಗ ಅಂಬುಗಳನ್ನು ಕಟ್ಟಿ ರಕ್ಷಣೆ ಮಾಡುತ್ತಿದ್ದಾರೆ. ಇದೇ ಬೆಲೆ ಮುಂದಿನ ಎರಡು ಮೂರು ತಿಂಗಳು ಮುಂದುವರಿದರೆ ಉತ್ತಮ ಆದಾಯ ಸಿಗುತ್ತದೆ.