ನೀರಿನ ಸಮರ್ಪಕ ಬಳಕೆ ಹೇಗೆ?
ನೀರಿನ ಸುರಕ್ಷತೆ ಮತ್ತು ಸಮರ್ಪಕ ಬಳಕೆ ಸಾಧಿಸಲು ರಿಲಾಯನ್ಸ್ ಫೌಂಡೇಷನ್ ಹಾಗೂ ಸರ್ಕಾರದ ವಿವಿಧ ಇಲಾಖೆಗಳ ಮಾರ್ಗದರ್ಶನದಲ್ಲಿ ಗ್ರಾಪಂ ಹಲವು ಕಾರ್ಯಕ್ರಮ ರೂಪಿಸಿ ಜಾರಿಗೆ ತಂದಿದೆ. ಗ್ರಾಪಂ ವ್ಯಾಪ್ತಿಯ ಜೋಜನಾ, ನಂದಿನಾಗೂರ, ಲಿಂಗದಳ್ಳಿ, ನಾಗೂರ(ಎಂ), ಬೋರ್ಗಿ ಗ್ರಾಮಗಳಲ್ಲಿ 2014ರಿಂದ ಸ್ಥಳೀಯ ರೈತ ಸಂಘಗಳ ಮೂಲಕ ನೀರಿನ ಬಜೆಟ್ ರೂಪಿಸಲಾಗಿದೆ. ಹೊಲಗಳಲ್ಲಿ 343 ಕೃಷಿ ಕೊಳ, 258 ಎಕರೆ ಜಮೀನಿನಲ್ಲಿ ಅಣೆಕಟ್ಟು ನಿರ್ಮಿಸಿ ಮಳೆ ನೀರು ಪೋಲಾಗದಂತೆ ಸೂಕ್ಷ್ಮ ನೀರಾವರಿ ವಿಧಾನ ಯಶಸ್ವಿಯಾಗಿ ಅಳವಡಿಸಲಾಗಿದೆ. ಗ್ರಾಪಂ ವ್ಯಾಪ್ತಿಯ 1246 ಎಕರೆ ಬರಡು ಭೂಮಿಗೆ ನೀರಾವರಿ ಸೌಲಭ್ಯ ಕಲ್ಪಿಸಿ ತೋಟಗಾರಿಕೆ ಗದ್ದೆಗಳಾಗಿ ಪರಿವರ್ತಿಸಲಾಗಿದೆ. ರೈತರು ಕೃಷಿಯಲ್ಲಿ ಆಧುನಿಕ ವಿಧಾನ ಅಳವಡಿಸಿಕೊಳ್ಳಲು ರಿಲಾಯನ್ಸ್ ಸಲಹೆ ನೀಡಿ, ಹೊಲಗಳ ನಾಲಾ ಕೆಲಸ ಅಭಿವೃದ್ಧಿ ಮಾಡಿದೆ. ಹೀಗಾಗಿ ಗ್ರಾಪಂ ವ್ಯಾಪ್ತಿಯ ಮಳೆಯಾಶ್ರಿತ ಜಮೀನುಗಳಿಗೆ ನೀರಾವರಿ ಸೌಲಭ್ಯ ದೊರಕಿ ಹೆಚ್ಚಿನ ಇಳುವರಿ ಪಡೆಯಲು ಸಾಧ್ಯವಾಗುತ್ತಿದೆ. ಈ ಎಲ್ಲ ಜಲ ಕ್ರಾಂತಿ ಫಲವಾಗಿ ಪ್ರಶಸ್ತಿ ಲಭಿಸಿದೆ. ಕಳೆದ ವರ್ಷ ಪ್ರಶಸ್ತಿಗಾಗಿ ಗ್ರಾಪಂ ಮತ್ತು ರಿಲಾಯನ್ಸ್ ಫೌಂಡೇಷನ್ ಸಹಯೋಗದಲ್ಲಿ ಅರ್ಜಿ ಸಲ್ಲಿಸಿದ ನಂತರ ಕೇಂದ್ರದ ಅಂತರ್ಜಲ ಮಂಡಳಿ ಮತ್ತು ಜಲಸಂಪನ್ಮೂಲ ಇಲಾಖೆ ವಿಜ್ಞಾನಿ ಡಾ.ಎಸ್.ಎಸ್. ವಿಠ್ಠಲ್ ನೇತೃತ್ವದ ನಿಯೋಗ ಜೋಜನಾ ಗ್ರಾಪಂಗೆ ಭೇಟಿ ನೀಡಿ ಎಲ್ಲ ಮಾಹಿತಿ ಕಲೆ ಹಾಕಿತ್ತು.
