ಕಲಬುರಗಿ: ಬೆಂಗಳೂರಿನ ಪರಪ್ಪನ ಅಗ್ರಹಾರ ಜೈಲಿನಲ್ಲಿ ನಟ ದರ್ಶನ್ಗೆ ರಾಜ್ಯಾತಿಥ್ಯ ನೀಡಿದ ಪ್ರಕರಣ ಮರೆಮಾಚುವ ಮುನ್ನವೇ ನಗರದ ಹೊರವಲಯದಲ್ಲಿರುವ ಕೇಂದ್ರ ಕಾರಾಗೃಹದಲ್ಲೂ ಅಪರಾಧಿಗಳು ಐಶಾರಾಮಿ ಜೀವನ, ಗಾಂಜಾ ಸೇದುತ್ತಿರುವ ವಿಡಿಯೋ ವೈರಲ್ ಆಗಿದೆ.
ಪುಡಿ ರೌಡಿಗಳು ವಿಡಿಯೋ ಕಾಲ್ನಲ್ಲಿ ಮಾತನಾಡುವ ದೃಶ್ಯ ಹರಿದಾಡುತ್ತಿದ್ದು, ಅಪರಾಧಿಗಳ ಬಳಿ ಸ್ಮಾರ್ಟ್ ಫೋನ್, ಇಯರ್ ಫೋನ್, ಮದ್ಯ, ಗಾಂಜಾ ಕಂಡು ಬಂದಿದೆ. ವಿಡಿಯೋದಲ್ಲಿರುವುದು ಕೊಲೆ ಸೇರಿ ವಿವಿಧ ಪ್ರಕರಣಗಳಲ್ಲಿನ ಅಪರಾಧಿಗಳಾಗಿರುವ ವಿಶಾಲ, ಸಾಗರ, ಸೋನು ಎಂದು ತಿಳಿದು ಬಂದಿದೆ. ಜೈಲಿನಲ್ಲಿ ಐಶಾರಾಮಿ ಜೀವನ ನಡೆಸುತ್ತಿದ್ದೇವೆ ಎಂದು ತಿಳಿಸಲು ಹೊರಗೆ ಇರುವವರಿಗೆ ವಿಡಿಯೋ ಕಾಲ್ ಮಾಡಿದ್ದಾರೆ ಎನ್ನಲಾಗಿದೆ. ಸೆ.17ರಂದೇ ದೃಶ್ಯ ಸೆರೆಯಾಗಿರುವ ಬಗ್ಗೆ ವಿಡಿಯೋದಲ್ಲಿ ತಿಳಿಯುತ್ತಿದ್ದು, ವಾಟ್ಸ್ಪ್ ಕಾಲ್ ಮೂಲಕ ಹೊರಗೆ ಇರುವ ರೌಡಿಗಳು, ಸಂಬಂಧಿಕರನ್ನು ಮಾತನಾಡಿಸುತ್ತಿದ್ದಾರೆ. ಮಾತನಾಡುವ ವೇಳೆಯಲ್ಲೇ ಮದ್ಯಪಾನ, ಗಾಂಜಾ ಸೇವನೆ ನಡೆಯುತ್ತಿದೆ.
