ಮೇಕೆದಾಟಿನಿಂದ ಕನಕಪುರ-ರಾಮನಗರ-ಬಿಡದಿ, ನಾಯಂಡಹಳ್ಳಿ-ಸಾರಕ್ಕಿ-ಮಾರತ್ತಹಳ್ಳಿ ಮೂಲಕ ಸಾಗಿ ನ್ಯಾಷನಲ್ ಕಾಲೇಜು ಮೈದಾನದಲ್ಲಿ ಪಾದಯಾತ್ರೆ ಸಮಾವೇಶಗೊಳ್ಳಲಿದೆ. ಇದಕ್ಕಾಗಿ 11 ದಿನ ಪಾದಯಾತ್ರೆ ಸಾಗಲಿದೆ. ಆದರೆ ಡಿ.ಕೆ.ಶಿವಕುಮಾರ್ ಕನಕಪುರದಿಂದ ಹಾರೋಹಳ್ಳಿ ಮಾರ್ಗವಾಗಿ ಸಾರಕ್ಕಿ ತಲುಪಿ ಅಲ್ಲಿಂದ ಪಾದಯಾತ್ರೆ ಮುಂದುವರಿಸಬಹುದಿತ್ತು. ಆದರೆ, ಈ ಮಾರ್ಗದಲ್ಲಿ ಸಾಗಿದರೆ ಜೆಡಿಎಸ್ ಭದ್ರಕೋಟೆಗೆ ಲಗ್ಗೆ ಇಡಲು ಸಾಧ್ಯವಿಲ್ಲ ಎನ್ನುವ ಕಾರಣಕ್ಕಾಗಿಯೇ ರಾಮನಗರ-ಬಿಡದಿ ಮಾರ್ಗ ಆಯ್ಕೆ ಮಾಡಿಕೊಂಡಿದ್ದಾರೆ ಎನ್ನುವ ಮಾತುಗಳು ಕಾಂಗ್ರೆಸ್ ವಲಯದಲ್ಲಿಯೇ ಕೇಳಿ ಬಂದಿವೆ. ಕನಕಪುರದಿಂದ ರಾಮನಗರ ಮಾರ್ಗವಾಗಿ ಸಾರಕ್ಕಿ ಸಿಗ್ನಲ್ವರಗೆ ತಲುಪಲು ಸುಮಾರು 72 ಕಿಮೀ ಆಗಲಿದೆ. ಆದರೆ, ಕನಕಪುರದಿಂದ ಹಾರೋಹಳ್ಳಿ ಮಾರ್ಗವಾಗಿ ಸಾಗಿದರೆ 46 ಕಿ.ಮೀ. ಸಾಗಿ ತಲುಪಬಹುದಾಗಿತ್ತು.
