ಧಾರವಾಡ ಜಿಲ್ಲೆಯು ಎಲ್ಲ ವಲಯಗಳಲ್ಲಿ ಅಭಿವೃದ್ಧಿ ಹೊಂದುತ್ತಿದೆ. ಆದರೆ, ಇಲ್ಲೊಂದು ಆಕ್ಸಿಜನ್ ಉತ್ಪಾದನೆ ಘಟಕ ಇದುವರೆಗೂ ಆಗಲೇ ಇಲ್ಲ. ಕೈಗಾರಿಕೆ ಉದ್ದೇಶಕ್ಕೆ ಮಾತ್ರ ಹೆಚ್ಚಿನ ಪ್ರಮಾಣದಲ್ಲಿ ಆಕ್ಸಿಜನ್ ಈ ಮೊದಲು ಬಳಸಲಾಗುತ್ತಿತ್ತು. ಆದರೆ, ಇದೀಗ ಕರೊನಾ ಎಲ್ಲೆಡೆ ತನ್ನ ಅಟ್ಟಹಾಸ ಮೆರೆಯುತ್ತಿರುವುದರಿಂದ ವೈದ್ಯಕೀಯ ಚಿಕಿತ್ಸೆ ಸಲುವಾಗಿ ಆಕ್ಸಿಜನ್ ಹೆಚ್ಚು ಬೇಕಾಗಿದೆ. ಸದ್ಯ ಜಿಲ್ಲೆಯಲ್ಲಿ ರೀ ಫಿಲ್ಲಿಂಗ್ ಘಟಕಗಳಿವೆ. ಸಿಲಿಂಡರ್ಗೆ ತುಂಬಿ ಮಾರಾಟ ಮಾಡುತ್ತವೆ. ಧಾರವಾಡ ಜಿಲ್ಲೆಯ ಬೇಲೂರಲ್ಲಿರುವ ಪ್ರಾಕ್ಸಿ ಕಂಪನಿ, ಸತ್ತೂರಲ್ಲಿನ ಕರ್ನಾಟಕ ಇಂಡಸ್ಟ್ರಿಯಲ್ ಗ್ಯಾಸ್ ಹಾಗೂ ತಾರಿಹಾಳದಲ್ಲಿರುವ ಸದರ್ನ್ ಗ್ಯಾಸ್ ಈ ಕಂಪನಿಗಳು ಪ್ರಸ್ತುತ ಧಾರವಾಡ ಜಿಲ್ಲೆಯ ಜತೆಗೆ ಅಕ್ಕಪಕ್ಕದ ಜಿಲ್ಲೆಗಳಿಗೂ ಆಕ್ಸಿಜನ್ ಸಿಲಿಂಡರ್ ರೀ ಫಿಲ್ ಮಾಡಿ ಪೂರೈಕೆ ಮಾಡುತ್ತಿವೆ. ಇದಕ್ಕಾಗಿ ತೋರಣಗಲ್ಲಿನಿಂದ ದ್ರವರೂಪದ ಆಕ್ಸಿಜನ್ ತರಲಾಗುತ್ತದೆ.
