ಜಿಲ್ಲೆಯ ಮಕ್ಕಳ ರಕ್ಷಣಾ ಘಟಕ ನೀಡಿರುವ ಮಾಹಿತಿಯ ಪ್ರಕಾರ 2022-23 ನೇ ಸಾಲಿನಲ್ಲಿ ಚಾಮರಾಜನಗರ 17, ಗುಂಡ್ಲುಪೇಟೆ 8, ಯಳಂದೂರು 1 ಹಾಗೂ ಹನೂರು-ಕೊಳ್ಳೇಗಾಲ ವ್ಯಾಪ್ತಿಯಲ್ಲಿ 22 ದೂರುಗಳನ್ನು ಒಳಗೊಂಡಂತೆ ಒಟ್ಟು 48 ಬಾಲ್ಯವಿವಾಹ ದೂರುಗಳು ದಾಖಲಾಗಿದೆ. ಅದರಲ್ಲಿ 45 ಬಾಲ್ಯವಿವಾಹಗಳನ್ನು ತಡೆಯಲಾಗಿದ್ದು, 3 ರಲ್ಲಿ ೆಕ್ಸೋ ಕಾಯ್ದೆಯಡಿ ಪ್ರಕರಣ ದಾಖಲಾಗಿದೆ. 2023-24 ನೇ ಸಾಲಿನಲ್ಲಿ ಚಾಮರಾಜನಗರ 21, ಗುಂಡ್ಲುಪೇಟೆ 71, ಯಳಂದೂರು 6 ಹಾಗೂ ಹನೂರು-ಕೊಳ್ಳೇಗಾಲ ವ್ಯಾಪ್ತಿಯಲ್ಲಿ 48 ದೂರುಗಳನ್ನು ಒಳಗೊಂಡಂತೆ ಒಟ್ಟು 146 ದೂರುಗಳು ದಾಖಲಾಗಿದೆ. ಅದರಲ್ಲಿ 142 ಪ್ರಕರಣಗಳಲ್ಲಿ ಬಾಲ್ಯವಿವಾಹ ತಡೆಯಲಾಗಿದ್ದು, 4 ರಲ್ಲಿ ಬಾಲ್ಯವಿವಾಹ ನಿಷೇಧ ಕಾಯ್ದೆಯಡಿ ಪ್ರಕರಣ ದಾಖಲಾಗಿದೆ. 2024-25 ನೇ ಸಾಲಿನಲ್ಲಿ ಈ ವರಗೆ ಚಾಮರಾಜನಗರ ತಾಲೂಕಿನಲ್ಲಿ 36, ಗುಂಡ್ಲುಪೇಟೆ 22, ಯಳಂದೂರು 11, ಕೊಳ್ಳೇಗಾಲ 20 ಹಾಗೂ ಹನೂರು 9 ಪ್ರಕರಣಗಳು ಕಂಡುಬಂದಿದೆ. ಒಟ್ಟಾರೆ 98 ಪ್ರಕರಣಗಳಲ್ಲಿ 97 ಬಾಲ್ಯವಿವಾಹಗಳನ್ನು ತಡೆದಿದ್ದು, 1 ಪ್ರಕರಣದಲ್ಲಿ ಪ್ರಕರಣ ದಾಖಲಾಗಿದೆ. ಅದಾಗ್ಯೂ ಗ್ರಾಮೀಣ ಪ್ರದೇಶದಲ್ಲಿ ಬೆಳಕಿಗೆ ಬರದೇ ಎಷ್ಟೋ ಬಾಲ್ಯವಿವಾಹಗಳು ನಡೆದುಹೋಗುತ್ತದೆ. ಈ ಸಂಬಂಧ ಹಲವಾರು ಜಾಗೃತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಂಡು ತಳಹಂತದಲ್ಲಿ ಜಾಗೃತಿ ಮೂಡಿಸುತ್ತಿದ್ದರೂ, ಬಾಲ್ಯವಿವಾಹಗಳು ನಡೆಯುತ್ತಲೇ ಇದೆ. ಈ ನಿಟ್ಟಿನಲ್ಲಿ ಜಿಲ್ಲಾಡಳಿತ ವಿಶೇಷ ಆಸಕ್ತಿಯನ್ನು ವಹಿಸಿ ಇನ್ನೂ ಹೆಚ್ಚಿನ ಜಾಗೃತಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದೇ ಇದಕ್ಕೆ ಮದ್ದಾಗಿದೆ.
