ಹಾಸನ: ಜಿಲ್ಲೆಯ ವಿವಿಧೆಡೆ ನಡೆದಿರುವ ಮೂರು ಕಳವು ಪ್ರಕರಣಗಳಲ್ಲಿ ನಾಲ್ಕೂವರೆ ಲಕ್ಷ ರೂ. ಮೌಲ್ಯದ ಚಿನ್ನಾಭರಣ ಕಳವು ಮಾಡಳಾಗಿದೆ.
ಬಟ್ಟೆ ತೊಳೆಯುತ್ತಾ ಕುಳಿತಿದ್ದ ಮಹಿಳೆ ಕುತ್ತಿಗೆಯಲ್ಲಿದ್ದ ಚಿನ್ನದ ಮಾಂಗಲ್ಯ ಸರ ಕಿತ್ತುಕೊಂಡು ಅಪರಿಚಿತ ಪರಾರಿಯಾಗಿರುವ ಘಟನೆ ಅರಸೀಕೆರೆ ತಾಲೂಕಿನ ಹೆಬ್ಬರನಹಳ್ಳಿ ಗ್ರಾಮದಲ್ಲಿ ನಡೆದಿದೆ.
ಗ್ರಾಮದ ಶಾಂತಮ್ಮ ಎಂಬುವರು ಬುಧವಾರ ಸಂಜೆ ಮನೆಯ ಮುಂದೆ ಕಾಂಪೌಂಡ್ ಒಳಗೆ ಬಟ್ಟೆ ತೊಳೆಯುತ್ತಾ ಕುಳಿತಿದ್ದರು.
4.15 ರ ಸುಮಾರಿಗೆ 25-30 ವರ್ಷ ವಯಸ್ಸಿನ ಅಪರಿಚಿತ ವ್ಯಕ್ತಿ ಬೈಕಿನಲ್ಲಿ ಬಂದು ನಂಜೇಗೌಡ ಅವರ ಮನೆ ಯಾವುದು ಎಂದು ಕೇಳಿದ್ದಾನೆ. ಮುಂದೆ ಊರಿನ ಒಳಗೆ ಹೋಗಿ ಕೇಳಿ ಎಂದು ಹೇಳಿದಾಗ ಸ್ವಲ್ಪ ದೂರ ಹೋಗಿ ವಾಪಸ್ ಬಂದವನೇ ಮೊಬೈಲ್ನಲ್ಲಿ ಫೋಟೋ ತೋರಿಸಿ, ಇವರ ಮನೆ ಎಲ್ಲಿ ಬರುತ್ತದೆಂದು ಕೇಳುವ ನಾಟಕವಾಡಿ ಏಕಾಏಕಿ ಮಹಿಳೆ ಕೊರಳಿನಲ್ಲಿದ್ದ 2 ಎಳೆಯ ಚಿನ್ನದ ಮಾಂಗಲ್ಯ ಸರ ಕಿತ್ತು ಬಂದ ಬೈಕಿನಲ್ಲಿ ಪರಾರಿಯಾಗಿದ್ದಾನೆ.ಮಾಂಗಲ್ಯ ಸುಮಾರು 60 ಗ್ರಾಂ ತೂಕವುಳ್ಳದ್ದಾಗಿದ್ದು, ಅಂದಾಜು 3 ಲಕ್ಷ ಬೆಲೆಬಾಳಲಿದೆ ಎನ್ನಲಾಗಿದೆ. ಈ ಸಂಬಂಧ ಗ್ರಾಮಾಂತರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
