ಕಲಬುರಗಿ: ಅಭಿವೃದ್ಧಿ ಕೆಲಸಗಳಿಗಾಗಿ 2019-20ರಲ್ಲಿ ಲಿಂಕ್ ಡಾಕುಮೆಂಟ್ ಪ್ರಕಾರ ಹಂಚಿಕೆಯಾಗಿದ್ದ 9.81 ಕೋಟಿ ರೂ. ಮತ್ತು ತಾಲೂಕು ಪಂಚಾಯಿತಿಗಳ ಅನುದಾನ ಲ್ಯಾಪ್ಸ್ ಆಗಿರುವುದು ಮಂಗಳವಾರ ನಡೆದ ಜಿಲ್ಲಾ ಪಂಚಾಯಿತಿ 18ನೇ ಸಾಮಾನ್ಯ ಸಭೆಯಲ್ಲಿ ಪ್ರತಿಧ್ವನಿಸಿ ಗರ್ಮಾ ಗರಂ ಚರ್ಚೆಗೆ ಕಾರಣವಾಯಿತು. ಹಣ ಬಳಸಿಕೊಳ್ಳುವಲ್ಲಿ ವಿಫಲಗೊಂಡಿರುವ ಅಧಿಕಾರಿಗಳಿಗೆ ನೋಟಿಸ್ ನೀಡಲು ಸಭೆ ನಿರ್ಧರಿಸಿತು.
ಈ ವಿಷಯ ಪ್ರಸ್ತಾಪಿಸಿದ ಪ್ರತಿಪಕ್ಷ ನಾಯಕ ಶಿವಾನಂದ ಪಾಟೀಲ್, ನಮ್ಮ ಭಾಗಕ್ಕೆ ಅನುದಾನ ಬರುವುದೇ ಕಷ್ಟ. ಬಂದಿರುವ ಅನುದಾನವೂ ಲ್ಯಾಪ್ಸ್ ಆಗುತ್ತದೆ ಎಂದರೆ ಏನರ್ಥ ಎಂದು ಪ್ರಶ್ನಿಸಿ ಲ್ಯಾಪ್ಸ್ ಆಗಿರುವ ಅನುದಾನ ಮರಳಿ ಪಡೆಯಲು ಸರ್ಕಾರದ ಬಳಿ ನಿಯೋಗ ಕೊಂಡೊಯ್ಯುವಂತೆ ಸಲಹೆ ನೀಡಿದರು. ಇವರ ಮಾತಿಗೆ ಗೌತಮ ಪಾಟೀಲ್, ಸಿದ್ದರಾಮ ಪ್ಯಾಟಿ, ರೇವಣಸಿದ್ದಪ್ಪ ಸಂಕಾಲಿ, ದಂಡಪ್ಪ ಸಾಹು, ಹರ್ಷಾನಂದ ಗುತ್ತೇದಾರ್, ಶರಣಬಸಪ್ಪ ಪಾಟೀಲ್ ಇತರರು ಪಕ್ಷಭೇದ ಮರೆತು ಧ್ವನಿಗೂಡಿಸಿದರು. ಯಾರ ತಪ್ಪಿನಿಂದ ಹಣ ಲ್ಯಾಪ್ಸ್ ಆಗಿದೆ ಎಂಬುದನ್ನು ಸ್ಪಷ್ಟಪಡಿಸಬೇಕು. ಅಂಥವರನ್ನು ಗುರುತಿಸಿ ನೊಟೀಸ್ ನೀಡಿ ಕ್ರಮ ಕೈಗೊಳ್ಳಬೇಕೆಂದು ಸದಸ್ಯರು ಆಗ್ರಹಿಸಿದರು. ಇದಕ್ಕೆ ಸಿಇಒ ಡಾ.ರಾಜಾ ಸಮ್ಮತಿ ಸೂಚಿಸಿದರು.
ಜಿಪಂನಿಂದ ಲೋಪಗಳಾಗಿಲ್ಲ. ಲಿಂಕ್ ಡಾಕುಮೆಂಟ್ನಲ್ಲಿ 8.68 ಕೋಟಿ ರೂ. ಹಾಗೂ ಇತರ ಖಾತೆಯಡಿ 1.18 ಕೋಟಿ ರೂ. ಸೇರಿ 9.81 ಕೋಟಿ ರೂ. ಲ್ಯಾಪ್ಸ್ ಆಗಿದೆ. ಏಳು ತಾಪಂಗಳಲ್ಲಿ ಅನಿರ್ಬಂಧಿತ ಅನುದಾನದಡಿ 7.64 ಕೋಟಿ ರೂ. ಲ್ಯಾಪ್ಸ್ ಆಗಿದೆ ಎಂದು ಮುಖ್ಯ ಹಣಕಾಸು ಅಧಿಕಾರಿ ರಾಮಣ್ಣ ಅಥಣಿ ವಿವರಿಸಿದರು.
ಅಧ್ಯಕ್ಷೆ ಸುವರ್ಣ ಮಲಾಜಿ ಅಧ್ಯಕ್ಷತೆಯ ಸಭೆಯಲ್ಲಿ ಉಪಾಧ್ಯಕ್ಷೆ ಶೋಭಾ ಸಿರಸಗಿ, ಯೋಜನಾಧಿಕಾರಿ ಕಿಶೋರಕುಮಾರ ದುಬೆ, ಸಹಾಯಕ ಕಾರ್ಯದರ್ಶಿ ಮಹಾದೇವ ಬಂಬೂಳಗಿ ಇತರರಿದ್ದರು.
