ಜನನ-ಮರಣ ನೋಂದಣಿ ತಿದ್ದುಪಡಿ ರದ್ದು ಮಾಡಿ

ತರೀಕೆರೆ: ಜನನ ಮತ್ತು ಮರಣ ನೋಂದಣಿಗೆ ತಂದಿರುವ ತಿದ್ದುಪಡಿ ರದ್ದು ಮಾಡುವಂತೆ ಒತ್ತಾಯಿಸಿ ವಕೀಲರ ಸಂಘದ ಪದಾಧಿಕಾರಿಗಳು ಮಂಗಳವಾರ ತಾಲೂಕು ಕಚೇರಿಯಲ್ಲಿ ತಹಸೀಲ್ದಾರ್ ಸಿ.ಎಸ್.ಪೂರ್ಣಿಮಾ ಮೂಲಕ ಸರ್ಕಾರಕ್ಕೆ ಮನವಿ ಸಲ್ಲಿಸಿದರು.

ವಕೀಲರ ಸಂಘದ ಅಧ್ಯಕ್ಷ ಎಸ್.ಸುರೇಶ್​ಚಂದ್ರ ಮಾತನಾಡಿ, ಕರ್ನಾಟಕ ಜನನ ಮತ್ತು ಮರಣ ನೋಂದಣಿಯನ್ನು 3ನೇ ಹಂತದ ಮ್ಯಾಜಿಸ್ಟ್ರೇಟ್ ನ್ಯಾಯಾಧಿಕರಣ ವ್ಯಾಪ್ತಿ ಬದಲಿಸಿ ಉಪವಿಭಾಗಾಧಿಕಾರಿಗೆ ನೀಡಿರುವುದು ಸರಿಯಿಲ್ಲ. ಉಪವಿಭಾಗದಲ್ಲಿ 4 ತಾಲೂಕುಗಳು ಇರಲಿದ್ದು ಆಯಾ ತಾಲೂಕಿನ ಸಾರ್ವಜನಿಕರು ಜನನ ಮತ್ತು ಮರಣ ಪತ್ರ ಪಡೆಯಲು ದೂರದ ಉಪ ವಿಭಾಗಾಧಿಕಾರಿ ಕಚೇರಿಗೆ ಅಲೆದಾಡುವಂತಾಗಿದೆ ಎಂದು ದೂರಿದರು.

ಸಾರ್ವಜನಿಕರ ಹಿತದೃಷ್ಟಿಯಿಂದ ಜನನ ಮತ್ತು ಮರಣ ನೋಂದಣಿ ಮಾಡಿರುವ ತಿದ್ದುಪಡಿ ರದ್ದುಪಡಿಸಿ ಈ ಹಿಂದಿನ ವ್ಯವಸ್ಥೆಯನ್ನೇ ಮುಂದುವರಿಸಬೇಕು. ಸಾರ್ವಜನಿಕರ ಅನಗತ್ಯ ಅಲೆದಾಟ ತಪ್ಪಿಸಲು ಸಂಬಂಧಿತ ಪ್ರಕರಣಗಳನ್ನು ಆಯಾ ಜೆಎಂಎಫ್​ಸಿ ನ್ಯಾಯಾಲಯದಲ್ಲೇ ಇತ್ಯರ್ಥಪಡಿಸಿಕೊಳ್ಳಲು ಆದೇಶಿಸಬೇಕು ಎಂದು ಒತ್ತಾಯಿಸಿದರು.

ಸಂಘದ ಸಲಹೆಗಾರ ಜೆ.ಟಿ.ಜಗದೀಶ್, ಸಹ ಕಾರ್ಯದರ್ಶಿ ರಜನೀಶ್, ವಕೀಲರರಾದ ಶಶಿಧರ್, ವಿನಯ್ ಮತ್ತಿತರರಿದ್ದರು.