ಮನಮೋಹಕ ಜಲಪಾತಗಳು: ಸುಂದರವಾಗಿ ನಾಜುಕಿನಿಂದ ಕಲ್ಲು ಬಂಡೆಗಳನ್ನು ಸೀಳಿಕೊಂಡು ಅಂಕು ಡೊಂಕಾಗಿ ನರ್ತಿಸುವ ಮಾದರಿಯಲ್ಲಿ ಹರಿಯುತ್ತಿರುವ ಕೃಷ್ಣೆಯ ರಮಣೀಯ ದೃಶ್ಯ ಸವಿಯಲು ಪ್ರವಾಸಿಗರು ಛಾಯಾ ಭಗವತಿಯತ್ತ ಹೆಜ್ಜೆ ಹಾಕುತ್ತಿದ್ದಾರೆ. ಕೆಲವೆಡೆ ಕೃಷ್ಣೆ ವೇಗದಿಂದ ಸಾಗಿದರೆ ಸಮತಟ್ಟಾದ ಪ್ರದೇಶದಲ್ಲಿ ಶಾಂತವಾಗಿ ಹರಿಯುತ್ತಾಳೆ.
ಕೆನೆ ಭರಿತ ಹಾಲಿನಂತೆ ಧಬ ಧಬನೆ ಕೆಳಗೆ ಬಿಳುತ್ತಿರವ ನೋಟ ಕಣ್ಣಿಗೆ ತಂಪೆರೆಯುತ್ತಿದೆ. ಇನ್ನು ಕೆಲವು ಕಡೆಗಳಲ್ಲಿ ನೀರು ಹನಿ ಹನಿಯಾಗಿ ಬೀಳುತ್ತಿರುವುದು ಮುತ್ತಿನ ಹನಿಗಳೇ ಬೀಳುತ್ತಿವೆ ಎಂದು ಭಾಸವಾಗುತ್ತಿದೆ. ದಕ್ಷಿಣ ಕಾಶಿಯೆಂದೆ ಕರೆಯಲ್ಪಡುವ ಕಲ್ಲು ಬಂಡೆಗಳ ಮಧ್ಯೆ ಛಾಯಾ ಭಗವತಿ ಕೃಷ್ಣೆತಟದಲ್ಲಿ ನೆಲೆಸಿದ್ದು, ಸುತ್ತಲು ಹಸಿರು ಗಿಡಗಳಿಂದ ಆವರಿಸಿಕೊಂಡಿದೆ. ಮೈದುಂಬಿಕೊಂಡು ಹರಿಯುವ ಕೃಷ್ಣೆ ಇಲ್ಲಿ ಎರಡು ಕವಲುಗಳಾಗಿ ಟಿಸಿಲೊಡೆದು ಸಾಗುವ ದೃಶ್ಯ ಗಮನ ಸೆಳೆಯುವಂತಿದೆ. ಪ್ರವಾಸಿಗರಿಗೆ ಜಲಾಶಯದೊಳಗಡೆ ಪ್ರವೇಶ ನಿಷೇಧಿಸಿರುವ ಕಾರಣ ಪ್ರವಾಸಿಗರು ಕಳೆದ 20 ದಿನಗಳಿಂದ ನೇರವಾಗಿ ಛಾಯಾ ಭಗವತಿಗೆ ಬಂದು ಇಲ್ಲಿನ ಪ್ರಕೃತಿ ಸೌಂದರ್ಯ ಸವಿಯುತ್ತಾ ಕೃಷ್ಣೆಯ ಸೊಬಗನ್ನು ಕಣ್ತುಂಬಿಕೊಳ್ಳುತ್ತಿದ್ದಾರೆ.
