ನೆರ್ನಹಳ್ಳಿ ರೈತ ನಾರಾಯಣಪ್ಪ 50 ಸಾವಿರ ರೂ. ಖರ್ಚು ಮಾಡಿ 1 ಎಕರೆಯಲ್ಲಿ ಚೆಂಡು ಹೂವು ಬೆಳೆದಿದ್ದರು. ಆದರೆ ಮಾರುಕಟ್ಟೆಯಲ್ಲಿ ಬೆಲೆ ಕುಸಿದಿದ್ದು, ಬುಧವಾರ ಪ್ರತಿ ಕೆಜಿಗೆ 10 ರೂ. ಬೆಲೆಗೆ ಮಾರಾಟವಾಗುತ್ತಿತ್ತು. ನಾರಾಯಣಪ್ಪ ಅವರು ಹೂವು ಕಿತ್ತು ಮಾರುಕಟ್ಟೆಗೆ ಸಾಗಿಸಿದ್ದು, ಬೇಡಿಕೆ ಇರದ ಕಾರಣ ಹೂವು ಮಾರಾಟವಾಗಲಿಲ್ಲ. ಇದರಿಂದ ಬೇಸರಗೊಂಡ ರೈತ ಹೂವನ್ನು ಮನೆಗೆ ವಾಪಸ್ ತೆಗೆದುಕೊಂಡು ಹೋಗದೆ ಕೋಲಾರ&ಬಂಗಾರಪೇಟೆ ಮಾರ್ಗದ ರಸ್ತೆಯ ಬದಿ ಸುರಿದು ಹೋಗಿದ್ದಾರೆ. ಸಾಲುಸಾಲು ಹಬ್ಬಗಳು ಮುಗಿದು, ಕಾರ್ತಿಕ ಮಾಸದ ಪೂಜೆ ಪುನಸ್ಕಾರಗಳು ನಡೆಯುತ್ತಿರುವ ಸಮಯದಲ್ಲೂ ಹೂವಿನ ಬೆಲೆ ಕುಸಿತ ಕಂಡಿರುವುದು ಬೆಳೆಗಾರರಲ್ಲಿ ಆತಂಕ ಮೂಡಿಸಿದೆ. ಕಾರ್ತಿಕ ಮಾಸದಲ್ಲಿ ದೇವಾಲಯಗಳಲ್ಲಿ ವಿಶೇಷ ಪೂಜೆಗಳಲ್ಲದೇ ಮದುವೆ, ಶುಭಸಮಾರಂಭಗಳಂತಹ ಶುಭಕಾರ್ಯಗಳೂ ಹೆಚ್ಚಿನ ಪ್ರಮಾಣದಲ್ಲಿ ನಡೆಯುವ ಕಾರಣ ಹೂವಿನಿಂದ ನಾಲ್ಕು ಕಾಸು ಸಂಪಾದನೆ ಮಾಡಬಹುದು ಎಂಬ ಆಸೆ ಸದ್ಯ ಕಮರಿದಂತಾಗಿದೆ.
