ಚಿತ್ರದುರ್ಗದಲ್ಲಿ ನಕಲಿ ಎಚ್​ಡಿಪಿಇ ಪೈಪ್ ವಶ

ವಿಜಯವಾಣಿ ಸುದ್ದಿಜಾಲ ಹುಬ್ಬಳ್ಳಿ: ಭಾರತೀಯ ಮಾನಕ ಸಂಸ್ಥೆ (ಬಿಐಎಸ್) ಹುಬ್ಬಳ್ಳಿ ಕಚೇರಿಯ ಅಧಿಕಾರಿಗಳು ಇತ್ತೀಚೆಗೆ ಚಿತ್ರದುರ್ಗದಲ್ಲಿ ದಾಳಿ ಕಾರ್ಯಾಚರಣೆ ನಡೆಸಿ ಸುಮಾರು 7500 ಮೀಟರ್ ನಷ್ಟು ನಕಲಿ ಎಚ್​ಡಿಪಿಇ ಪೈಪ್​ಗಳನ್ನು ವಶಪಡಿಸಿಕೊಂಡಿದ್ದಾರೆ.

ಚಿತ್ರದುರ್ಗದ ದಾವಣಗೆರೆ ರಸ್ತೆಯಲ್ಲಿರುವ ಎಎಚ್​ಕೆ ಪೈಪ್ ಇಂಡಿಸ್ಟ್ರೀಸ್​ನ ಮೇಲೆ ದಾಳಿ ನಡೆಸಿದಾಗ ಬಿಐಎಸ್ ಲೈಸನ್ಸ್ ಇಲ್ಲದೇ ಐಎಸ್​ಐ ಮಾರ್ಕ್ ಬಳಸಿ ಎಚ್​ಡಿಪಿಇ ಫೈಪ್ ತಯಾರಿಸುತ್ತಿರುವುದು ಗಮನಕ್ಕೆ ಬಂದಿದೆ. ಇಂಥ ನಕಲಿ ಐಎಸ್​ಐ ಮಾರ್ಕಿನ ಉತ್ಪನ್ನಗಳ ಮಾರಾಟವನ್ನು ತಡೆಯುವ ಉದ್ದೇಶದಿಂದ ಕಾರ್ಯಾಚರಣೆ ನಡೆಸಲಾಗಿದೆ. ಯಾವುದೇ ಉತ್ಪನ್ನಗಳ ಉತ್ಪಾದಕರು ಐಎಸ್​ಐ ಮಾರ್ಕ್ ದುರ್ಬಳಕೆ ಮಾಡಿರುವುದು ಕಂಡು ಬಂದಲ್ಲಿ ಸಾರ್ವಜನಿಕರು ಮಾಹಿತಿ ನೀಡಬೇಕು ಎಂದು ಬಿಐಎಸ್ ಹುಬ್ಬಳ್ಳಿ ಶಾಖೆ ಕಚೇರಿಯ ಅಧಿಕಾರಿ ವಿಜಯವಿರನ್ ಕೆ. ತಿಳಿಸಿದ್ದಾರೆ.