‘ಚಾಲಕನ ಮೇಲೆ ಹಲ್ಲೆ’ ಬಸ್ ಸಂಚಾರ ನಿಲುಗಡೆ

ಯಳಂದೂರು: ಕೆಎಸ್‌ಆರ್‌ಟಿಸಿ ಬಸ್ ಚಾಲಕನ ಮೇಲೆ ಇಬ್ಬರು ಮಾರಣಾಂತಿಕ ಹಲ್ಲೆ ನಡೆಸಿದ ಹಿನ್ನೆಲೆಯಲ್ಲಿ ಇರಸವಾಡಿ, ಮಸಣಾಪುರ, ಹೊಂಗನೂರು, ಕಾಗಲವಾಡಿ ಮಾರ್ಗವಾಗಿ ಚಾಮರಾಜನಗರಕ್ಕೆ ತೆರಳುವ ಕೆಎಸ್ಸಾರ್ಟಿಸಿ ಬಸ್‌ಗಳನ್ನು ತಾತ್ಕಾಲಿಕವಾಗಿ ನಿಲ್ಲಿಸಲಾಗಿದ್ದು ಸಾರ್ವಜನಿಕರು ಪರದಾಡುವ ಸ್ಥಿತಿ ನಿರ್ಮಾಣವಾಗಿದೆ.

ಇತ್ತೀಚೆಗೆ ಯಳಂದೂರು ಪಟ್ಟಣದ ಬಳೇಪೇಟೆಯ ಸ್ವಾಗತ ಕಮಾನಿನ ಬಳಿ ಇರಸವಾಡಿ ಗ್ರಾಮದ ಇಬ್ಬರು ತಮ್ಮ ಗ್ರಾಮದಲ್ಲಿ ಕೈ ತೋರಿದರೂ ಬಸ್ ನಿಲ್ಲಿಸಲಿಲ್ಲ ಎಂಬ ಕಾರಣಕ್ಕೆ ಬಸ್‌ನ್ನು ಅಡ್ಡಗಟ್ಟಿ, ಚಾಲಕನನ್ನು ಕೆಳಕ್ಕೆ ಎಳೆದು ಆತನ ಮುಖಕ್ಕೆ ಕೊಡಲಿಯಿಂದ ಮಾರಣಾಂತಿಕ ಹಲ್ಲೆ ನಡೆಸಿದ್ದರು. ಈ ಹಿನ್ನೆಲೆಯಲ್ಲಿ ಪೊಲೀಸರು ಇಬ್ಬರನ್ನು ಬಂಧಿಸಿದ್ದಾರೆ. ಆದರೆ ಈ ಮಾರ್ಗವಾಗಿ ಏಕಾಏಕಿ ಬಸ್ ಸೇವೆಯನ್ನು ಸ್ಥಗಿತಗೊಳಿಸಲಾಗಿದೆ. ಇಲ್ಲಿಗೆ ಕೇವಲ ಖಾಸಗಿ ಬಸ್‌ಗಳು ಮಾತ್ರ ತೆರಳುತ್ತಿವೆ. ಯಳಂದೂರು ಮಾರ್ಗವಾಗಿ ವೈ.ಕೆ.ಮೋಳೆ, ಇರಸವಾಡಿ, ಚಾಟೀಪುರ, ಮಸಣಾಪುರ, ಹೊಂಗನೂರು, ಕಾಗಲವಾಡಿ, ಆಲೂರು, ಸರಗೂರು, ಚಂದಕವಾಡಿ ಗ್ರಾಮಗಳ ಮೂಲಕ ಚಾಮರಾಜನಗರಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆ ಇದಾಗಿದೆ. ಪ್ರತಿನಿತ್ಯ ಇಲ್ಲಿಂದ ಸಾವಿರಾರು ಜನರು ಬಸ್‌ಗಳಲ್ಲಿ ಇಲ್ಲಿಂದ ಸಂಚರಿಸುತ್ತಾರೆ. ಯಳಂದೂರು ಪಟ್ಟಣದಲ್ಲೇ ವ್ಯವಹರಿಸುತ್ತಾರೆ. ಅಲ್ಲದೆ ಈ ಮಾರ್ಗದ ಮೂಲಕವೇ ಕೊಳ್ಳೇಗಾಲ, ಮೈಸೂರು ಮಾರ್ಗವಾಗಿ ಇಲ್ಲಿಂದ ಸಂಚರಿಸುತ್ತಾರೆ. ಶಕ್ತಿ ಯೋಜನೆಯಡಿಯಲ್ಲಿ ಇಲ್ಲಿಂದ ನಿತ್ಯ ನೂರಾರು ಮಹಿಳೆಯರು ಪ್ರಯಾಣ ಮಾಡುತ್ತಿದ್ದರು. ಆದರೆ ಈಗ ಅದೂ ಇಲ್ಲವಾಗಿದೆ. ಇಲ್ಲಿಗೆ ಖಾಸಗಿ ಬಸ್‌ಗಳ ಸಂಖ್ಯೆಯೂ ಕಡಿಮೆ ಇದೆ. ಹಾಗಾಗಿ ಆಟೋಗಳಲ್ಲಿ ಜನರನ್ನು ಕುರಿಗಳಂತೆ ತುಂಬಿಕೊಂಡ ಹೋಗಲಾಗುತ್ತಿದೆ.