ಈ ಜಗತ್ತು ವಿಶಿಷ್ಟ. ಚಲಿಸದ ವಸ್ತು ಪೂರ್ಣ ಆಗಿರುತ್ತದೆ. ಅಲ್ಲಿ ಗುಣ, ರೂಪ ಯಾವುದೂ ಇರುವುದಿಲ್ಲ. ಯಾವ ವಸ್ತು ಚಲನೆ ಮಾಡುತ್ತದೋ ಅದಕ್ಕೆ ರೂಪ, ಗುಣ, ಅಂದ ಚೆಂದ ಇರುತ್ತದೆ. ಯಾವುದಕ್ಕೆ ‘ಪೂರ್ಣತೆ’ ಇರುತ್ತದೆಯೋ ಅದಕ್ಕೆ ನಮ್ಮ ಋಷಿಗಳು ಬಯಲು ಅಂತ ಹೆಸರಿಟ್ಟರು. ಸದಾ ಸತ್ಯ, ಅನಂತ, ದೇವರು ಅಂತ ಹೆಸರು ಕೊಟ್ಟರು. ಯಾವುದೇ ವಸ್ತು ತೆಗೆದುಕೊಳ್ಳಿ, ನಿಲ್ಲಿಸಲು ಸಾಧ್ಯವಿಲ್ಲ. ನಾವು ತಿಳಿದುಕೊಳ್ಳುವುದು ಏನೆಂದರೆ: ನಾವು ಯಾವುದನ್ನೂ ನಿಲ್ಲಿಸಲು ಸಾಧ್ಯವಿಲ್ಲ ಅಂತ ಅರಿತರೆ ನಾವು ಸಂತೋಷದಿಂದ ಇರಬಹುದು. ನಾವು ಶಾಶ್ವತ ಅಲ್ಲ ಎನ್ನುವುದನ್ನು ಅರಿಯಬೇಕು. ನಮ್ಮ ದೇಹ ಚಲಿಸುತ್ತದೆ ಎಂದು ಅರಿತುಕೊಳ್ಳಬೇಕು. ಹುಟ್ಟಿದ ಮೇಲೆ ಸಾಯಲೇಬೇಕು ಎನ್ನುವುದನ್ನು ಅರಿಯಬೇಕು.
