ಚಿತ್ರದುರ್ಗ: ಚಿತ್ರದುರ್ಗ ತಾಲೂಕು ಸಿದ್ದಾಪುರದ ಶ್ರೀ ನೂತನ್ ಎಜುಕೇಶನ್ ಆ್ಯಂಡ್ ರೂರಲ್ ಡೆವಲೆಪ್ಮೆಂಟ್ ಸೊಸೈಟಿ, ವಿಶೇಷವಾಗಿ ಗ್ರಾಮೀಣ ಮಕ್ಕಳ ವಿದ್ಯಾಭ್ಯಾಸಕ್ಕೆ ಪೂರಕವಾಗಿ ಹೆಜ್ಜೆ ಹಾಕುತ್ತಿದೆ. ಐಟಿಐ ಕಾಲೇಜು, ಎಲ್ಕೆಜಿ, ಯುಕೆಜಿಯೊಂದಿಗೆ 2009ರಲ್ಲಿ ಪ್ರಾರಂಭವಾದ ಈ ಅನುದಾನ ರಹಿತ ಸಂಸ್ಥೆ ಇವತ್ತು ಪಿಯು ಕಾಲೇಜುವರೆಗೆ ಬೆಳೆದಿದೆ.
ಆರಂಭದ ಕೆಲವು ವರ್ಷಗಳ ಯಶಸ್ಸಿನ ಬಳಿಕ 2014 ರ ಆಸುಪಾಸಿನ ವರ್ಷಗಳಲ್ಲಿ ಎದುರಾದ ಕೆಲವು ಸಮಸ್ಯೆಗಳಿಂದ ಕುಗ್ಗದೆ ದಿಟ್ಟತನದಿಂದ ಸಂಸ್ಥೆಯನ್ನು ಮುನ್ನಡೆಸುತ್ತಿದ್ದಾರೆ ಅದರ ಸ್ಥಾಪಕ ಅಧ್ಯಕ್ಷ ಜಿ.ರಾಘವೇಂದ್ರ.
ಗ್ರಾಮೀಣರು, ಅದರಲ್ಲೂ ಕಡು ಬಡವರಿಗೆ ಶಿಕ್ಷಣ ಸಿಗಬೇಕು, ಪ್ರತಿಭಾವಂತ ವಿದ್ಯಾರ್ಥಿಗಳಿಗೆ ನೆರವಾಗಬೇಕೆಂಬ ಉದ್ದೇಶದಿಂದ ರಾಘವೇಂದ್ರ ಅವರು, ಸಿದ್ದಾಪುರ ಭೀಮಸಮುದ್ರ ರಸ್ತೆಯಲ್ಲಿರುವ ಎರಡೂವರೆ ಎಕರೆ ಜಾಗದಲ್ಲಿ ಇಂಗ್ಲಿಷ್ ಮೀಡಿಯಂ ಶಾಲಾ, ಕಾಲೇಜು ಸ್ಥಾಪಿಸಿದ್ದಾರೆ. ಮುಂದಿನ ವರ್ಷದಿಂದ ಪಿಯು 50 ವಿದ್ಯಾರ್ಥಿ ಸಾಮರ್ಥ್ಯದ ರೆಸಿಡೆನ್ಶಿಯಲ್ ಕಾಲೇಜು ಸ್ಥಾಪನೆ ಆಗಲಿದೆ.
ಆರಂಭದ ಹಲವು ವರ್ಷಗಳಲ್ಲಿ ಎಲ್ಕೆಜಿಯಿಂದ 10 ನೇ ತರಗತಿ ಹಾಗೂ ಐಟಿಐ ಕಾಲೇಜು ಸೇರಿ 800 ಕ್ಕೂ ಹೆಚ್ಚಿದ್ದ ವಿದ್ಯಾರ್ಥಿಗಳ ಸಂಖ್ಯೆ, ನಂತರದ ಕೆಲವು ವರ್ಷಗಳಲ್ಲಿ 68ಕ್ಕೆ ಕುಸಿದಿತ್ತು. ಆದರೆ, ಅದಕ್ಕೆ ಅಂಜದೆ ವಿದ್ಯಾರ್ಥಿಗಳ ಸಂಖ್ಯೆಯನ್ನು 600 ಕ್ಕೆ ತಲುಪುವಂತೆ ಹಾಗೂ 2022-23ನೇ ಸಾಲಿನಿಂದ ಪಿಯುಸಿ ಸೈನ್ಸ್ ಮತ್ತು ಕಾಮರ್ಸ್ ಕಾಲೇಜನ್ನೂ ಸ್ಥಾಪಿಸುವಲ್ಲಿ ರಾಘವೇಂದ್ರ ಯಶಸ್ವಿಯಾಗಿದ್ದಾರೆ.
