ಖಾಸಗಿ ಪ್ಲೇಹೋಂಗಳಿಗೆ ಸೆಡ್ಡು: ಅಂಗನವಾಡಿಗಳೆಂದರೆ ಮೂಲಸೌಕರ್ಯವಿಲ್ಲದೆ ಹಾಳು ಕಟ್ಟಡವೊಂದರಲ್ಲಿ ನಡೆಯುವ ಕಾಟಾಚಾರದ ಶಿಕ್ಷಣವೆಂಬ ಭಾವನೆ ಸಾಮಾನ್ಯವಾಗಿದೆ. ಆರ್ಥಿಕವಾಗಿ ತೀರ ಹಿಂದುಳಿದ ಪಾಲಕರು ಗತ್ಯಂತರವಿಲ್ಲದೆ ಅಂಗನವಾಡಿಗಳಿಗೆ ಸೇರಿಸುತ್ತಾರೆ ಎಂಬ ಮಾತು ಸಹಜವಾಗಿದೆ. ಆದರೆ ಇದಕ್ಕೆ ವ್ಯತಿರಿಕ್ತ ಎಂಬಂತೆ ಜಿಲ್ಲೆಯಲ್ಲಿ ಖಾಸಗಿ ಪ್ಲೇಹೋಂಗಳಿಗೆ ಕಡಿಮೆ ಇಲ್ಲದಂತೆ ಮಾದರಿ ಅಂಗನವಾಡಿ ನಿರ್ಮಾಣವಾಗುತ್ತಿದೆ. ಗುಹೆ ಮಾದರಿಯಲ್ಲಿ ಸುಸಜ್ಜಿತ ಕಟ್ಟಡ, ಸುತ್ತಲೂ ಗಾಳಿ ಬೆಳಕಿಗೆ ಕೊರತೆಯಿಲ್ಲದಂತೆ ಕಿಟಕಿಗಳ ನಿರ್ಮಾಣ, ತಂಪಾದ ವಾತಾವರಣ ಸೃಷ್ಟಿಸುವ ತಾಂತ್ರಿಕತೆ ಬಳಕೆ, ಪ್ರತ್ಯೇಕ ಅಡುಗೆ ಕೊಠಡಿ, ಕಲಿಕಾ ಸಾಮಗ್ರಿಗಳ ದಾಸ್ತಾನು ಕೊಠಡಿ, ಶೌಚಗೃಹ ಸೇರಿ ಎಲ್ಲವನ್ನು ಒಂದೇ ಸೂರಿನಡಿ ತರುವ ಪ್ರಯತ್ನ ಇದಾಗಿದೆ.
