ಎರಡರಿಂದ ಐದು ವರ್ಷದವರೆಗಿನ ಮಕ್ಕಳಿಗಾಗಿ ಆಯೋಜಿಸಿದ್ದ ಸ್ಪರ್ಧೆಯಲ್ಲಿ 80ಕ್ಕೂ ಹೆಚ್ಚು ಮಕ್ಕಳು ರಾಧಾ- ಕೃಷ್ಣ ವೇಷಧಾರಿಯಾಗಿ ಭಾಗವಹಿಸಿದ್ದರು. ಪಾಲಕರು ಮಕ್ಕಳನ್ನು ಕೃಷ್ಣವೇಷ ತೊಡಿಸಿ, ರಾಧೆಯಾಗಿ ಸಿಂಗರಿಸಿ ಸಂಭ್ರಮಿಸಿ ಸ್ಪರ್ಧೆಗಿಳಿಸಿದ್ದರು. ಸಿಂಗಾರಗೊಂಡ ಮಕ್ಕಳಲ್ಲಿ ಕೆಲ ಮಕ್ಕಳು ಚೂಟಿಯಾಗಿ ವೇದಿಕೆಯಲ್ಲಿ ಕೊಳಲನ್ನು ಬೀಸುತ್ತ ನಿಂತರೆ, ಮತ್ತೆ ಕೆಲ ಪುಟಾಣಿಗಳು ಅಮ್ಮನನ್ನು ನೋಡುತ್ತ ಅಳುತ್ತಲೇ ಕೈಬೀಸುತ್ತಿದ್ದ ದೃಶ್ಯ ಮನಮೋಹಕವಾಗಿತ್ತು. ಕೃಷ್ಣವರ್ಣದ ಕೃಷ್ಣ, ರಾಧೆಯೊಂದಿಗೆ ಸರಸ ಸಲ್ಲಾಪದಲ್ಲಿರುವ ಕೃಷ್ಣ, ಕಡೆಗೋಲು ಹಿಡಿದು ಬಂದ ಬಾಲಕೃಷ್ಣ, ಬೆಣ್ಣೆ ಕದ್ದು ತಿನ್ನುವ ಕೃಷ್ಣ, ಕಾಳಿಂಗಮರ್ದನ ಮಾಡಿ ಹೆಮ್ಮೆಯಿಂದ ಬೀಗಿದ ಕೃಷ್ಣ… ಹೀಗೆ ಬಾಲಕೃಷ್ಣನ ವೇಷಧಾರಿಗಳು ವೇದಿಕೆಯ ಅಂದವನ್ನು ಹೆಚ್ಚಿಸಿದರು.
