ಹಳೇಪಾಳ್ಯಕ್ಕೆ ಸಂಪರ್ಕ ರಸ್ತೆ ನಿರ್ಮಿಸಿದ ಬಳಿಕ ಕೆರೆಯ ಒಂದು ಭಾಗವನ್ನು ವಿವಿಧ ಇಲಾಖೆಗಳ ಕೋರಿಕೆ ಮೇರೆಗೆ ಕೆಎಸ್ಆರ್ಟಿಸಿ ಬಸ್ ಡಿಪೋ, ಮತ್ತು ನೌಕರರ ವಸತಿ ಗೃಹ ನಿರ್ಮಾಣಕ್ಕೆಂದು 6 ಎಕರೆ, ರೈತ ಬಜಾರ್ ನಿರ್ಮಿಸಲು ಎಪಿಎಂಸಿಗೆ 2 ಎಕರೆ, ಖಾಸಗಿ ಬಸ್ ನಿಲ್ದಾಣ ನಿರ್ಮಿಸಲು ನಗರಸಭೆಗೆ 3 ಎಕರೆ, ಸಣ್ಣ ನೀರಾವರಿ ಇಲಾಖಾ ಕಚೇರಿ ನಿರ್ಮಾಣಕ್ಕೆ ಒಂದು ಎಕರೆ ಮತ್ತು ನಿರ್ಮಿತಿ ಕೇಂದ್ರ ಹಾಗೂ ಯುವಕ ತರಬೇತಿ ಕೇಂದ್ರ ನಿರ್ಮಾಣಕ್ಕೆ 1.30 ಎಕರೆ ( ಈ ಪೈಕಿ ಸರ್ಕಾರ ನಿಗದಿಪಡಿಸಿದ ಕಿಮ್ಮತ್ತು ಕಟ್ಟದ ಕಾರಣ ನಿರ್ಮಿತಿ ಕೇಂದ್ರಕ್ಕೆ ಮಂಜೂರಾಗಿದ್ದ 1.30 ಎಕರೆ ಜಾಗ ಹಾಗೇ ಉಳಿದಿದೆ) ಸೇರಿ ಒಟ್ಟು 13.30 ಎಕರೆ ಕೆರೆ ಅಂಗಳವನ್ನು ಎಲ್ಎನ್ಡಿ (ಟಿಪಿಟಿ) ಸಿಆರ್ 119/ 2001&02 ಏ.18 2005ರಲ್ಲಿ ಅಂದಿನ ಜಿಲ್ಲಾಧಿಕಾರಿ ಎಂ.ಬಿ.ದ್ಯಾಬೇರಿ ಮಂಜೂರು ಮಾಡಿದ್ದರು. ಮಂಜೂರಾದ ಭೂಮಿಯನ್ನು 2 ವರ್ಷಗಳ ಒಳಗೆ ಉದ್ದೇಶಿತ ಬಳಕೆಗೆ ಉಪಯೋಗಿಸದಿದ್ದರೆ ಮಂಜೂರಾತಿ ತಂತಾನೆ ರದ್ದಾಗುತ್ತದೆ ಎಂಬ ಷರತ್ತು ವಿಧಿಸಲಾಗಿತ್ತು. ಈ ಪೈಕಿ ಕೆಎಎಸ್ಆರ್ಟಿಸಿ ಮತ್ತು ಎಪಿಎಂಸಿ ಇಲಾಖೆಗಳು ಷರತ್ತಿಗನುಗುಣವಾಗಿ ಮಂಜೂರಾದ ಭೂಮಿಯಲ್ಲಿ ಕಟ್ಟಡ ನಿರ್ಮಿಸಿ, ಬಳಸುತ್ತಿವೆ. ಆದರೆ ನಗರಸಭೆಗೆ ಮಂಜೂರಾಗಿರುವ 3 ಎಕರೆ ಭೂಮಿ ಪೈಕಿ ಒಂದು ಬದಿ ಖಾಸಗಿ ಬಸ್ ನಿಲ್ದಾಣ ನಿರ್ಮಿಸಿ ಉಳಿದಿರುವುದನ್ನು ಖಾಲಿ ಬಿಟ್ಟಿರುವುದು, ಮತ್ತು ನಿರ್ಮಿತಿ ಕೇಂದ್ರಕ್ಕೆ ಮಂಜೂರಾಗಿದ್ದ 1.30ಎಕರೆ ಹಾಗೂ ಸಣ್ಣ ನೀರಾವರಿ ಇಲಾಖೆಗೆ ಮಂಜೂರಾಗಿದ್ದ 1 ಎಕರೆ ಭೂಮಿ (ಕೆರೆ ಅಂಗಳ ) ಈಗಲೂ ಖಾಲಿ ಉಳಿದಿದೆ. ಇದನ್ನು ಖಾಲಿ ಬಿಟ್ಟರೆ ಚೆನ್ನಾಗಿ ಕಾಣಲ್ಲ ಎಂಬ ಉದ್ದೇಶಕ್ಕೋ, ಏನೊ? ನಗರಸಭೆ ಚರಂಡಿ ಮತ್ತು ರಾಜ ಕಾಲುವೆಯ ತ್ಯಾಜ್ಯ ನೀರನ್ನು ಯಥೇಚ್ಚವಾಗಿ ಕೆರೆ ಅಂಗಳಕ್ಕೆ ಹರಿಸಲಾಗುತ್ತಿದೆ. ಪರಿಣಾಮ ಇಡೀ ಕೆರೆ ಅಂಗಳ ಕಡುಗಪ್ಪು ನೀರಿನಿಂದ ಭರ್ತಿಯಾಗಿದೆ. ನೀರಿನ ಮೇಲ್ಮೆಯೇ ಕಾಣದಷ್ಟು ದಟ್ಟವಾಗಿ ಪಾಚಿ ಬೆಳೆದಿದೆ. ಎಪಿಎಂಸಿ ಮಾರುಕಟ್ಟೆಗೆ ಹೋಗುವವರು ಈ ಪ್ರದೇಶದಲ್ಲಿ ಮೂಗು ಮುಚ್ಚಿಕೊಂಡು ಓಡಾಡುವಂತಾಗಿದೆ.
