ಸಿದ್ದೇಶ್ವರ ಶ್ರೀಗಳ ಅಗಲಿಕೆಯಿಂದ ಜಿಲ್ಲೆಯ ಆಧ್ಯಾತ್ಮ ಲೋಕ ಮೌನವಹಿಸಿದೆ.
ಜಾತಿ, ಮತಕ್ಕೆ ಸೀಮಿತವಾಗಿರದೇ ಅದ್ವೈತದ ಪ್ರತಿಪಾದಕರಾಗಿ, ಆಧ್ಯಾತ್ಮ ಕ್ಷೇತ್ರವನ್ನು ಶ್ರೀಮಂತಗೊಳಿಸಿದ ವಿಜಯಪುರ ಜಿಲ್ಲೆಯ ಜ್ಞಾನ ಯೋಗಾಶ್ರಮದ ಸಿದ್ದೇಶ್ವರ ಶ್ರೀಗಳ ಅಗಲಿಕೆಗೆ ಜಿಲ್ಲೆಯ ಜನ ಕಂಬನಿ ಮಿಡಿದಿದ್ದಾರೆ. ಸೋಮವಾರ ಸಂಜೆ ಶ್ರೀಗಳು ಲಿಂಗೈಕ್ಯರಾಗಿದ್ದು, ಶಿಕ್ಷಣ ಸಂಸ್ಥೆಗಳು, ಪತ್ರಕರ್ತರ ಸಂಘ, ಜಿಲ್ಲೆಯ ಮಠಾ„ೀಶರು, ಜಿಲ್ಲಾ ಮುಖಂಡರು ಸಂತಾಪ ಸೂಚಿಸಿದ್ದಾರೆ.
ಗದಗ ನಗರಕ್ಕೂ ಸಿದ್ದೇಶ್ವರ ಶ್ರೀಗಳಿಗೂ ಗುರು ಶಿಷ್ಯರ ಸಂಬಂಧವಿತ್ತು. ಅವರ ಪ್ರವಚನದಿಂದ ಗದಗ ಜಿಲ್ಲೆಯಲ್ಲಿ ಆದ್ಯಾತ್ಮಿಕ ಪರಿಸರ ಬೆಳೆದು ಹೆಮ್ಮರವಾಗಿಯಿತು. ಶಾಂತಿ, ಸಹಬಾಳ್ವೆ ನಲೆಗೊಂಡಿತು. ತೊಂಟದಾರ್ಯ ಮಠ, ಮುಂಡರಗಿ ಅನ್ನದಾನೇಶ್ವರ, ಮುಂಡರಗಿ ತಾಲೂಕಿನ ಡೋಣಿ ನಂದಿವೇರಿ ಮಠ ಸೇರಿದಂತೆ ಹಲವು ಮಠಗಳೊಂದಿಗೆ ಆತ್ಮಿಯತೆ ಹೊಂದಿದ್ದ ಶ್ರೀಗಳ ನಡುವೆ ಪರಸ್ಪರ ಗೌರವ ಇತ್ತು.
ಗದಗ ತಾಲೂಕಿನ ಹುಲಕೋಟಿಯಲ್ಲಿ 1996ರಲ್ಲಿ, ನಗರದ ಜಿಲ್ಲಾ ಕ್ರೀಡಾಂಗಣ 2005ರಲ್ಲಿ ಒಂದು ತಿಂಗಳು, ಮತ್ತು ಮುಳಗುಂದ ಪಟ್ಟಣದ ಮಹಾಂತ ಶಿವಯೋಗಿ ಕಲಾಭವನದಲ್ಲಿ ಒಂದು ದಿನದ ಪ್ರವಚನ, ಮುಳಗುಂದ ಪಟ್ಟಣದಲ್ಲಿ 2006ರ ನ.25 ರಿಂದ ಡಿ16 ರ ವೆರಗೆ 21 ದಿನಗಳ ಕಾಲ ಪ್ರವವಚನ ಯಶಸ್ವಿಗೊಂಡಿದ್ದು ಇತಿಹಾಸ. ಅದಲ್ಲದೇ ರೋಣ, ನರಗುಂದ, ಲಕ್ಷ್ಮೇಶ್ವರ ಪಟ್ಟಣದಲ್ಲಿ ಶ್ರೀಗಳು ಪ್ರವಚನ ನೀಡಿದ್ದಾರೆ.
ಮಾಜಿ ಶಾಸಕ ಡಿ.ಆರ್. ಪಾಟೀಲ, ಗದಗ ಎಪಿಎಂಸಿ ಮಾಜಿ ಅಧ್ಯಕ್ಷ ಸಿ.ಬಿ. ಬಡ್ನಿ ಜತೆಗೆ ಸಿದ್ದೇಶ್ವರ ಶ್ರೀಗಳಿಗೆ ಆತ್ಮಿಯತೆ ಇತ್ತು. 1994ರಲ್ಲಿ ಹುಬ್ಬಳಿ ಕೃಷಿ ಉತ್ಪನ್ನ ಮಾರುಕಟ್ಟೆಗೆ ಬಸವೇಶ್ವರ ಪ್ರಾಂಗಣ ಎಂದು ನಾಮಕರಣ ಕಾರ್ಯಕ್ರಮದಲ್ಲಿ ಮಾಜಿ ಶಾಸಕ ಡಿ.ಆರ್. ಪಾಟೀಲರು ಮೊದಲ ಬಾರಿಗೆ ಸಿದ್ದೇಶ್ವರ ಶ್ರೀಗಳ ದರ್ಶನ ಪಡೆದು, ಅವರ ಪ್ರವಚನದ ಪ್ರಭಾವಕ್ಕೊಳಗಾಗಿ ಗದಗ, ಹುಲಕೋಟಿಗೆ ಪ್ರವಚನಕ್ಕೆ ಕರೆಸಿದ್ದರು ಎಂಬುದು ವಿಶೇಷ.
