ಗಣಪತಿ ತಯಾರಕರ ಗೋಳು ಕೇಳುವವರಿಲ್ಲ

ಚಿಂತಾಮಣಿ: ಕರೊನಾ ಎಫೆಕ್ಟ್‌ನಿಂದ ಯುವಕರ ಸಂಘಟನೆಗಳು ದೊಡ್ಡದೊಡ್ಡ ಗಣಪತಿಗಳನ್ನು ಪ್ರತಿಷ್ಟಾಪನೆ ಮಾಡಲು ಹಿಂದೇಟು ಹಾಕಿರುವುದರಿಂದ ದೊಡ್ಡ ಗಣಪತಿಗಳನ್ನು ಕೇಳುವವರಿಲ್ಲದೆ ವ್ಯಾಪಾರಿಗಳು ಮತ್ತು ತಯಾರಕರ ಕಂಗಾಲಾಗಿದ್ದಾರೆ.

ಗಣಪತಿ ಹಬ್ಬಕ್ಕೆ ಒಂದೆರಡು ವಾರಗಳು ಇರುವಾಗಲೇ ಎಲ್ಲೆಡೆ ವಿಘ್ನೇಶ್ವರನ ಥರಾವಾರಿ ಆಕಾರದ ವಿಭಿನ್ನ ಅಳತೆಯ ಮೂರ್ತಿಗಳು ನಗರದ ಪ್ರಮುಖ ವೃತ್ತಗಳಲ್ಲಿ ಮತ್ತು ರಸ್ತೆಗಳಲ್ಲಿ ರಾರಾಜಿಸುತ್ತಿದ್ದವು. ಆದರೆ ಈ ವರ್ಷ ಕರೊನಾದಿಂದ ಗಣಪತಿ ಮೂರ್ತಿ ಕೆಳುವವರಿಲ್ಲವಾಗಿದೆ. ವರ್ಷ ಪೂರ್ತಿ ತಯಾರಿಸಿದ ಗಣಪತಿ ಮೂರ್ತಿಗಳೆಲ್ಲ ಅವುಗಳೆಲ್ಲ ಶೆಡ್ ಸೇರಿವೆ. ಇದರಿಂದ ವ್ಯಾಪಾರಸ್ಥರಿಗೆ ದೊಡ್ಡ ಹೊಡೆತ ಬಿದಿದ್ದೆ.

ಪಿಒಪಿ (ಪ್ಲಾಸ್ಟರ್ ಆಫ್ ಪ್ಯಾರಿಸ್)ಯಲ್ಲಿ ಮೂರ್ತಿಗಳನ್ನು ಕೈಬಿಟ್ಟ ತಯಾರಕರು ದೊಡ್ಡ ದೊಡ್ಡ ಮೂರ್ತಿಗಳನ್ನು ಪೇಪರ್, ಕಚ್ಚಾ ಕಡಲೆ ಹಿಟ್ಟು, ಗೆಣಸು, ಬಿಳಿಯ ರಂಗೋಲಿ ಪುಡಿ ಮಿಶ್ರ ಮಾಡಿ ಇದಕ್ಕೆ ರಸಾಯನಿಕ ಬಣ್ಣಗಳನ್ನು ಬಳಸದೆ ಪೇಪರ್ ಗಣಪತಿಗಳನ್ನು ತಯಾರಿ ಮಾಡಿಕೊಂಡಿದ್ದಾರೆ. ನೆರೆಯ ರಾಜ್ಯಗಳಿಗೆ ಸರಬರಾಜು ಮಾಡೋಣ ಎಂದರೆ ಅಲ್ಲಿಯೂ ಇದೇ ಪರಿಸ್ಥಿತಿ ಇರುವುದರಿಂದ ಮೂರ್ತಿ ತಯಾರಕರು ಸಂಕಷ್ಟ ಎದುರಿಸುತ್ತಿದ್ದಾರೆ.