ನವೀನ್ ಚಂದ್ರ ಶೆಟ್ಟಿ ಆನೇಕಲ್
ಗರ್ಭಿಣಿ ಹೊಟ್ಟೆಯಲ್ಲಿ ಮಗುವಿನ ಜತೆಗೆ ಭಾರಿ ಗಾತ್ರದ ಗಡ್ಡೆಗಳು ಬೆಳೆದು ಸಾವು ಬದುಕಿನ ಮಧ್ಯೆ ಹೋರಾಟ ನಡೆಸುತ್ತಿದ್ದ ತಾಯಿ ಹಾಗೂ ಮಗುವನ್ನು ಐವರು ವೈದ್ಯರು ಸತತ 2 ತಾಸು ಶಸಚಿಕಿತ್ಸೆ ನಡೆಸಿ ಬದುಕಿಸಿದ್ದಾರೆ.
ಚಂದಾಪುರದ ಅತ್ರೇಯ ಆಸ್ಪತ್ರೆ ವೈದ್ಯರು ಈ ಸವಾಲನ್ನು ಸಮರ್ಥವಾಗಿ ನಿಭಾಯಿಸಿ ತಾಯಿ ಹಾಗೂ ಮಗುವಿಗೆ ಪುನರ್ಜನ್ಮ ನೀಡಿದ್ದಾರೆ. 34 ವರ್ಷದ ಗರ್ಭಿಣಿಯೊಬ್ಬರು ಆಸ್ಪತ್ರೆಗೆ ಚಿಕಿತ್ಸೆಗೆ ಬಂದಾಗ ಸ್ಕಾೃನಿಂಗ್ ವರದಿಯಲ್ಲಿ ದೊಡ್ಡ ಗಡ್ಡೆಗಳಿರುವುದು ಕಾಣಿಸಿಕೊಂಡಿತ್ತು. ಈ ಕುರಿತು ವೈದ್ಯರಾದ ಡಾ.ವಿನುತ, ಡಾ.ಗುರುಪ್ರಸಾದ್, ಡಾ.ಅಕ್ಷಯ್, ಡಾ.ನಾರಾಯಣಸ್ವಾಮಿ, ಡಾ.ದೀಕ್ಷಾ ಅವರು ಚರ್ಚೆ ನಡೆಸಿ ಶಸಚಿಕಿತ್ಸೆ ನಡೆಸಿ ಒಂದೂವರೆ ಕೆಜಿಯಷ್ಟಿದ್ದ ಗಡ್ಡೆಗಳನ್ನು ಹೊರ ತೆಗೆಯುವಲ್ಲಿ ಯಶಸ್ವಿಯಾಗಿದ್ದಾರೆ.
ಸತತ 9 ತಿಂಗಳು ಪರೀಕ್ಷೆ: ಮಹಿಳೆ ಗರ್ಭ ಧರಿಸಿದಾಗಲೆ ಹೊಟ್ಟೆಯಲ್ಲಿ ಗಡ್ಡೆಗಳಿರುವುದು ತಿಳಿದುಬಂದಿತ್ತು. ಡಾ.ವಿನುತ ಅವರು ಪ್ರಕರಣವನ್ನು ಗಂಭೀರವಾಗಿ ತೆಗೆದುಕೊಂಡು 9 ತಿಂಗಳು ಚಿಕಿತ್ಸೆ ನೀಡುತ್ತಾ ಬಂದಿದ್ದರು. ಹೇಗಾದರೂ ಮಾಡಿ ತಾಯಿ ಹಾಗೂ ಮಗುವನ್ನು ಬದುಕಿಸಲು ಪ್ರಯತ್ನ ನಡೆಸಿದ್ದರು. ಈ ರೀತಿಯ ಪ್ರಕರಣಗಳು ಸಾವಿರಕ್ಕೆ ಒಂದು ಕಂಡು ಬರುತ್ತವೆ. ಸಾಮಾನ್ಯವಾಗಿ ಮಹಿಳೆಯರ ಗರ್ಭಕೋಶದ ಒಳ ಹಾಗೂ ಹೊರಭಾಗದಲ್ಲಿ ಸಣ್ಣ-ಸಣ್ಣ ಗಡ್ಡೆಗಳಿರುತ್ತವೆ. ಆದರೆ ಈ ಮಹಿಳೆಯ ಹೊಟ್ಟೆಯಲ್ಲಿ ಆರೇಳು ದೊಡ್ಡ ಗಡ್ಡೆಗಳು ಕಾಣಿಸಿಕೊಂಡಿದ್ದವು. ಈ ರೀತಿಯ ಸಂದರ್ಭದಲ್ಲಿ ಗರ್ಭಕೋಶದಲ್ಲಿ ಮಗುವಿಗೆ ಹೆಚ್ಚು ಒತ್ತಡವಾಗಿ ಗರ್ಭಪಾತ ಆಗುವ ಸಾಧ್ಯತೆಗಳು ಹೆಚ್ಚಿರುತ್ತವೆ. ರಕ್ತಸ್ರಾವವಾಗಿ ತಾಯಿ, ಮಗು ಸಾವನ್ನಪ್ಪುವ ಸಾಧ್ಯತೆಗಳು ಹೆಚ್ಚು. ಇದನ್ನು ಈ ವೈದ್ಯರ ತಂಡ ಸವಾಲಾಗಿ ಸ್ವೀಕರಿಸಿತ್ತು. ವೈದ್ಯರ ಈ ಕಾರ್ಯಕ್ಕೆ ಅನೇಕರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
