ಗಡಿಯಾರ ಗೋಪುರದ ಮೇಲೆ ಹಾರಿತು ತಿರಂಗಾ : ಮುಸ್ಲಿಂ ಮುಖಂಡರೊಂದಿಗೆ ಧ್ವಜ ಹಾರಿಸಿದ ಜಿಲ್ಲಾಡಳಿತ, ಡಿಸಿ, ಎಸ್ಪಿ ಕಾರ್ಯಕ್ಕೆ ಮೆಚ್ಚುಗೆ

ಕೋಲಾರ: ಗಡಿಯಾರ ಗೋಪುರದ ಮೇಲೆ ಶನಿವಾರ ಜಿಲ್ಲಾಡಳಿತ ತ್ರಿವರ್ಣ ಧ್ವಜ ಹಾರಿಸಿದೆ. ಇದರೊಂದಿಗೆ 3 ದಿನಗಳಿಂದ ಎದುರಾಗಿದ್ದ ಆತಂಕದ ಪರಿಸ್ಥಿತಿ ತಿಳಿಯಾಗಿದೆ.

ಸಂಸದ ಎಸ್​.ಮುನಿಸ್ವಾಮಿ ಧರಣಿ ಎಚ್ಚರಿಕೆ ನೀಡಿದ್ದರಿಂದ ಎಚ್ಚೆತ್ತುಕೊಂಡ ಜಿಲ್ಲಾಧಿಕಾರಿ ವೆಂಕಟ್​ರಾಜಾ ಮತ್ತು ಪೊಲೀಸ್​ ವರಿಷ್ಠಾಧಿಕಾರಿ ಡಿ.ದೇವರಾಜ್​, ನಗರಸಭೆ ಆಯುಕ್ತ ಪ್ರಸಾದ್​ ಶುಕ್ರವಾರ ಸಂಜೆ ಟವರ್​ ಪ್ರದೇಶಕ್ಕೆ ಭೇಟಿ ನೀಡಿ ಪರಿಶೀಲಿಸಿದ್ದರು. ಮುಸ್ಲಿಂ ಮುಖಂಡರೊಂದಿಗೆ ಚರ್ಚಿಸಿ, ರಾತ್ರಿಯಿಡೀ ನಿಗಾವಹಿಸಿ ಶನಿವಾರ ಬೆಳ್ಳಂಬೆಳಗ್ಗೆ ಬಣ್ಣ ಬಳಿಸುವ ಕಾರ್ಯಕ್ಕೆ ಚಾಲನೆ ನೀಡಿದರು. ಮಧ್ಯಾಹ್ನ 2.40ಕ್ಕೆ ಕ್ರೇನ್​ನಲ್ಲಿ ಜಿಲ್ಲಾಧಿಕಾರಿ ವೆಂಕಟ್​ರಾಜಾ, ಎಸ್ಪಿ ಡಿ.ದೇವರಾಜ್​ ಮತ್ತು ಮತ್ತೊಂದು ಕ್ರೇನ್​ನಲ್ಲಿ ಅಂಜುಮಾನ್​ ಇಸ್ಲಾಮಿಯಾ ಮುಖ್ಯಸ್ಥ ಜಮೀರ್​ ಅಹ್ಮದ್​ ಮತ್ತಿತರರು ಟವರ್​ ಮೇಲೆ ತ್ರಿವರ್ಣ ಧ್ವಜ ಹಾರಿಸಿದರು.

ಈ ಸಂದರ್ಭ ರಾಷ್ಟ್ರಗೀತೆ ಮೊಳಗಿದ್ದು, ಸ್ಥಳದಲ್ಲಿ ನೆರೆದಿದ್ದ ಎಲ್ಲರೂ ಗೌರವ ಸೂಚಿಸಿದರು. ನೂರಾರು ಮುಸ್ಲಿಮರು ಹಿಂದುಸ್ಥಾನ್​ ಹಮಾರಾ ಹೇ, ಭಾರತ ಮಾತೆಗೆ ಜೈ ಎಂಬ ಜೈಕಾರ ಕೂಗಿದರು. ನಗರದ ಇತಿಹಾಸದಲ್ಲಿ ಇದೊಂದು ಐತಿಹಾಸಿಕ ದಿನವಾಗಿ ಉಳಿದುಕೊಳ್ಳುವಂತಾಯಿತು.

ಮುಸ್ಲಿಂ ಯುವಕರ ಅಸಮಾಧಾನ: ಬೆಳಗ್ಗೆಯಿಂದ ಅಂಜುಮಾನ್​ ಇಸ್ಲಾಮಿಯಾ ಮುಖಂಡರೊಂದಿಗೆ ಡಿಸಿ ಮತ್ತು ಎಸ್ಪಿ ಸ್ಥಳದಲ್ಲೇ ಉಳಿದುಕೊಂಡಿದ್ದರು. ಕ್ಲಾಕ್​ ಟವರ್​ಗೆ ಸಂಪರ್ಕ ಕಲ್ಪಿಸುವ ಬೆಂಗಳೂರು ಕಡೆಯಿಂದ ಬರುವ ಮಾರ್ಗ, ಹೊಸ ಬಸ್​ ನಿಲ್ದಾಣ ಮತ್ತು ದೊಡ್ಡಪೇಟೆ ಕಡೆ ಸಂಚರಿಸುವ ಮಾರ್ಗ ಹಾಗೂ ಟೇಕಲ್​, ಬಂಗಾರಪೇಟೆ ಹೋಗುವ ಮಾರ್ಗಗಳಲ್ಲಿ ಬ್ಯಾರಿಕೇಡ್​ಗಳನ್ನು ಹಾಕಿ ಹೊರಗಿನಿಂದ ಬರುವವರನ್ನು ತಡೆದು ಬೇರೆ ಮಾರ್ಗಗಳಲ್ಲಿ ಕಳುಹಿಸಿಕೊಡಲಾಗುತ್ತಿತ್ತು. ಬಣ್ಣ ಬಳಿಯುವವರು ಟವರ್​ ಮೇಲಿದ್ದ ಹಸಿರು ಧ್ವಜ ಮತ್ತು ಸ್ಟಾರ್​ ಇದ್ದ ಧ್ವಜಕಟ್ಟುವ ಪೈಪ್​ ತೆರವುಗೊಳಿಸಿದಾಗ 200 ಮೀಟರ್​ ದೂರದಲ್ಲಿ ಸಹಸ್ರಾರು ಮುಸ್ಲಿಂ ಯುವಕರು ಕಿರುಚಾಡತೊಡಗಿದರು. ಎಚ್ಚೆತ್ತುಕೊಂಡ ಪೊಲೀಸರು ಜನರನ್ನು ಚದುರಿಸಿದರು. ಮುಖಂಡರ ಮನವಿ ಮೇರೆಗೆ ಸ್ಟಾರ್​ ಚಿಹ್ನೆಯಿದ್ದ ಪೈಪನ್ನು ಹಾಗೇ ಬಿಡುವಂತೆ ಜಿಲ್ಲಾಧಿಕಾರಿ ಸೂಚಿಸಿದರು. ನಂತರ ಪರಿಸ್ಥಿತಿ ತಿಳಿಯಾಯಿತು. ಇದೊಂದು ಘಟನೆ ಹೊರತುಪಡಿಸಿದರೆ ಮುಸ್ಲಿಂ ಮುಖಂಡರೇ ಶಾಂತ ರೀತಿಯಿಂದ ಇರಬೇಕೆಂದು ಎಲ್ಲರಿಗೆ ಹೇಳುತ್ತಿದ್ದುದು ಕಂಡುಬಂದಿತು. ಸ್ಥಳದಲ್ಲಿ 500ಕ್ಕೂ ಹೆಚ್ಚು ಪೊಲೀಸರನ್ನು ನಿಯೋಜಿಸಲಾಗಿತ್ತು.

ಧರಣಿ ಎಚ್ಚರಿಕೆ ನೀಡಿದ್ದ ಸಂಸದ: ಸಾರ್ವಜನಿಕ ಸ್ಥಳದಲ್ಲಿರುವ ಗಡಿಯಾರ ಗೋಪುರದ ಮೇಲೆ ಧರ್ಮದ್ವಜ ಹಾರಾಡುತ್ತಿದ್ದುದು ಹಲವರ ಅಸಮಾಧಾನಕ್ಕೆ ಕಾರಣವಾಗಿತ್ತು. ಇದೇ ವಿಷಯವಾಗಿ ಸಂಸದ ಮುನಿಸ್ವಾಮಿ 3 ದಿನದ ಹಿಂದೆ ಧ್ವನಿ ಎತ್ತಿ, ರಾಷ್ಟ್ರ ಧ್ವಜ ಹಾರಿಸುವ ತನಕ ಧರಣಿ ನಡೆಸುವುದಾಗಿ ಹೇಳಿದ್ದರು. ಶುಕ್ರವಾರದಿಂದ ಧರಣಿ ನಡೆಸಲು ಜಿಲ್ಲಾಡಳಿತಕ್ಕೆ ಮನವಿ ಸಲ್ಲಿಸಿದ್ದರು. ಆದರೆ ಪರಿಸ್ಥಿತಿ ಸೂಕ್ಷ$್ಮತೆ ಅರಿತಿದ್ದ ಎಸ್ಪಿ ಡಿ.ದೇವರಾಜ್​ ಧರಣಿಗೆ ಅವಕಾಶ ನೀಡದೆ, ಜಿಲ್ಲಾಧಿಕಾರಿ ಜತೆ ಚರ್ಚಿಸಿ 2 ದಿನದಲ್ಲಿ ತ್ರಿವರ್ಣ ಧ್ವಜ ಹಾರಿಸುವ ಭರವಸೆ ನೀಡಿದ್ದರು. ಅದರಂತೆ ಜಿಲ್ಲಾಡಳಿತ ಟವರ್​ನ 74 ವರ್ಷಗಳ ಇತಿಹಾಸದಲ್ಲಿ ಮೊದಲ ಬಾರಿಗೆ ರಾಷ್ಟ್ರಧ್ವಜ ಹಾರಾಡುವಂತೆ ಮಾಡಿದರು.

ಮಾ.28ರವರೆಗೆ ನಿಷೇಧಾಜ್ಞೆ: ಹೈಕೋರ್ಟ್​ನಲ್ಲಿ ಹಿಜಾಬ್​ ತೀರ್ಪು ಹಿನ್ನೆಲೆಯಲ್ಲಿ ಜಿಲ್ಲಾಧಿಕಾರಿಗಳು ಮಾ.21ರವರೆಗೆ ನಿಷೇಧಾಜ್ಞೆ ಜಾರಿಗೊಳಿಸಿದ್ದು, ಟವರ್​ನಲ್ಲಿ ಧ್ವಜಾರೋಹಣ ನೆರವೇರಿದ ಹಿನ್ನೆಲೆಯಲ್ಲಿ ನಗರದಲ್ಲಿ ಮಾತ್ರ ಮಾ.28ರವರೆಗೆ ನಿಷೇಧಾಜ್ಞೆ ಜಾರಿಗೊಳಿಸಿ ಜಿಲ್ಲಾಧಿಕಾರಿ ಆದೇಶ ಹೊರಡಿಸಲಿದ್ದಾರೆ ಎಂದು ಎಸ್ಪಿ ದೇವರಾಜ ಮಾಹಿತಿ ನೀಡಿದರು.