ಮುಂಬೈ ನಗರದಲ್ಲಿ ನೆಲೆಸಿದ್ದ ಹುಬ್ಬಳ್ಳಿ ಮೂಲದ ವಿಜಯಕುಮಾರ ಕಾಳಗೆ (63) ಸೋಮವಾರ ಹೃದಯಾಘಾತದಿಂದ ನಿಧನರಾಗಿದ್ದರು. ಅವರ ಅಂತ್ಯಕ್ರಿಯೆಯನ್ನು ಹುಬ್ಬಳ್ಳಿಯಲ್ಲಿ ನೆರವೇರಿಸಲು ನಿರ್ಣಯಿಸಿದ್ದ ಕುಟುಂಬಸ್ಥರು, ಮೃತದೇಹವನ್ನು ಹುಬ್ಬಳ್ಳಿಗೆ ತರುತ್ತಿದ್ದರು. ಮಂಗಳವಾರ ನಸುಕಿನ ಜಾವ 3 ಗಂಟೆಗೆ ನಿಪ್ಪಾಣಿಯ ಕೊಗನೋಳಿ ಚೆಕ್ಪೋಸ್ಟ್ ಬಳಿ ಮೃತದೇಹವಿರುವ ವಾಹನವನ್ನು ಸಿಬ್ಬಂದಿ ತಡೆದರು. ಕುಟುಂಬದವರು ಪೊಲೀಸರಿಗೆ ಪರಿಪರಿಯಾಗಿ ಕೇಳಿಕೊಂಡರು. ಆದರೆ, ಸರ್ಕಾರದ ಆದೇಶದ ಹಿನ್ನೆಲೆಯಲ್ಲಿ ಮಹಾರಾಷ್ಟ್ರದಿಂದ ರಾಜ್ಯ ಪ್ರವೇಶಿಸಲು ಅನುಮತಿ ಇಲ್ಲದ್ದರಿಂದ ಪೊಲೀಸರು ಗಡಿ ದಾಟಲು ಅವಕಾಶ ನೀಡಲಿಲ್ಲ. ಆದರೆ, ರಾಜ್ಯದ ಗಡಿಭಾಗದಲ್ಲಿ ಅವರ ಅಂತ್ಯಕ್ರಿಯೆ ನೆರವೇರಿಸಲು ಅನುಮತಿ ನೀಡಿದರು.
