ಬಳ್ಳಾರಿ : ನಗರದ ಹೃದಯಭಾಗದಲ್ಲಿರುವ ಗಡಗಿ ಚೆನ್ನಪ್ಪ ವೃತ್ತದಲ್ಲಿ ನ ಕ್ಲಾಕ್ ಟವರ್(ಗಡಿಯಾರ ಗೋಪುರ)ಕಾಮಗಾರಿ ಕಳೆದ ಎರಡು ವರ್ಷಗಳಿಂದ ಅಮೆಗಾತಿಯಲ್ಲಿ ಸಾಗುತ್ತಿರುವುದಕ್ಕೆ ಸಾರ್ವಜನಿಕರು ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.
ಬಿ. ಶ್ರೀರಾಮುಲು ಜಿಲ್ಲಾ ಉಸ್ತುವಾರಿ ಸಚಿವರಾಗಿದ್ದ ವೇಳೆ ಹಳೆಯ ಗಡಿಯಾರ ಗೋಪುರವನ್ನು ತೆರವುಗೊಳಿಸಿ, ರಾಜ್ಯದಲ್ಲಿಯೇ ಅತಿ ಎತ್ತರದ, ವಿದೇಶಿ ಲಿಬಿನಾನ್ ಮಾದರಿಯ ಗೋಪುರ ನಿರ್ಮಾಣಕ್ಕೆ ಮುಂದಾಗಿದ್ದರು. ಒಟ್ಟಾರೆ ಆರು ತಿಂಗಳ ಅವಧಿಯೊಳಗೆ ಏಳು ಕೋಟಿ ರೂ. ವೆಚ್ಚದಲ್ಲಿ 140 ಅಡಿ ಎತ್ತರದಲ್ಲಿ ಹತ್ತು ಅಂತಸ್ತುಗಳಲ್ಲಿ ಸುಂದರವಾದ ಗೋಪುರ ನಿರ್ಮಿಸುವುದಾಗಿ ಭೂಮಿ ಪೂಜೆ ನೆರವೇರಿಸಿದ್ದರು. ಆದರೆ, ಭೂಮಿಪೂಜೆ ನೆರವೇರಿಸಿದ ಕೆಲ ತಿಂಗಳಲ್ಲಿಯೇ ಬಿಜೆಪಿ ಸರ್ಕಾರ ಅಧಿಕಾರ ಕಳೆದುಕೊಂಡಿತು. ಬಳಿಕ ಕಾಂಗ್ರೆಸ್ ಸರ್ಕಾರ ಅವಧಿಯಲ್ಲಿ ಕಾಮಗಾರಿ ಅಮೆಗಾತಿಯಲ್ಲಿ ಸಾಗಿತು. ನಗರದ ಹೃದಯಭಾಗದಲ್ಲಿ ಆಗಿರುವುದರಿಂದ ನಿತ್ಯವು ಈ ವೃತ್ತದಲ್ಲಿ ಸಂಚಾರ ದಟ್ಟಣೆಯಿಂದ ಕೂಡಿರುತ್ತದೆ. ಆದ್ದರಿಂದ, ಗೋಪುರದ ಸುತ್ತಲೂ ವೃತ್ತ ಅಗಲೀಕರಣಗೊಳಿಸಿ ನಂತರ ನಿರ್ಮಿಸಲಿ ಎಂಬುದು ಸಾರ್ವಜನಿಕರ ಅಭಿಪ್ರಾಯವಾಗಿತ್ತು. ಆದರೆ, ಏಕಾಏಕಿ ಗೋಪುರ ನಿರ್ಮಾಣಕ್ಕೆ ಮುಂದಾಗಿದ್ದರಿಂದ ಸುತ್ತಲೂ ಸ್ಥಳ ತೆರವುಗೊಳಿಸಿಲ್ಲ. ಡಿಸಿ ಕಚೇರಿ, ರೈಲು, ಬಸ್ ನಿಲ್ದಾಣ, ವಾಣಿಜ್ಯ ಮಳಿಗೆಗಳಿಗೆ ರಸ್ತೆ, ಶಾಲಾ ಕಾಲೇಜು, ಆಸ್ಪತ್ರೆ ಹಾಗೂ ವಿವಿಧ ಕಚೇರಿಗಳಿಗೆ ನಿತ್ಯ ಈ ವೃತ್ತದ ಮೂಲಕವೇ ವಾಹನ ಸವಾರರು ಹಾಗೂ ಸಾರ್ವಜನಿಕರು ಸಂಚಾರಿಸಬೇಕಾದ ಅನಿವಾರ್ಯತೆಯಿಂದ ಟ್ರಾಫಿಕ್ ಸಮಸ್ಯೆ ತಪ್ಪಿಲ್ಲ. ಕೇವಲ ಆರು ತಿಂಗಳಲ್ಲಿಯೇ ಪೂರ್ಣಗೊಳಿಸುವುದಾಗಿ ಆರಂಭಿಸಿದ್ದ ಕಾಮಗಾರಿ ಎರಡು ವರ್ಷ ಕಳೆದರೂ ಮುಗಿಯುತ್ತಿಲ್ಲ ಎಂದು ಅಧಿಕಾರಿಗಳ ವಿರುದ್ದ ಸಾರ್ವಜನಿಕರು ಹಿಡಿ ಶಾಪ ಹಾಕುತ್ತಿದ್ದಾರೆ.
