ಮೂಲ ಮರೆಯಬೇಡಿ: ಬದುಕು ಕಟ್ಟಿಕೊಳ್ಳಲು ಯುವಜನರು ಪರಿಶ್ರಮ ಪಡಬೇಕು. ನೈಪುಣ್ಯತೆ ಗಳಿಸಿಕೊಂಡು ಅವಕಾಶ ಸಿಕ್ಕರೆ ವಿದೇಶಕ್ಕೂ ಹೋಗಿ ಸಾಧನೆ ಮಾಡಬೇಕು. ಆದರೆ ಅಲ್ಲಿಗೆ ಹೋದರೂ ದೇಶ, ರಾಜ್ಯ, ಊರು, ತಂದೆ ತಾಯಿ, ಗುರು ಹಿರಿಯರು, ಕಲಿತ ಸಂಸ್ಥೆಗಳನ್ನು ಮರೆಯಬಾರದು ಎಂದು ಉಪರಾಷ್ಟ್ರಪತಿಯವರು ಕಿವಿಮಾತು ಹೇಳಿದರು. ಹೆಚ್ಚು ಭಾಷೆ ಕಲಿಯಬೇಕು. ಆದರೂ ಕನ್ನಡಿಗರು ಮನೆಯಲ್ಲಿ ಮತ್ತು ಇನ್ನೊಬ್ಬ ಕನ್ನಡಿಗನೊಂದಿಗೆ ಕನ್ನಡದಲ್ಲೇ ಮಾತನಾಡಿ ಎಂದು ಪ್ರೋತ್ಸಾಹಿಸಿದರು. ನಮ್ಮದು ಪ್ರಜಾಪ್ರಭುತ್ವ ದೇಶ. ಭಿನ್ನಾಭಿಪ್ರಾಯ ಸಹಜ. ಆದರೆ, ಅದರ ತೀರ್ಮಾನ ಶಾಂತಿಯುತವಾಗಿಯೇ ಆಗಬೇಕು. ಹಿಂಸೆಗಿಂತಲೂ ಮತದಾನವೇ ಅತೀ ಶ್ರೇಷ್ಠ ಅಸ್ತ್ರ ಎನ್ನುವುದು ಸಾಬೀತಾಗಿದೆ. ಎಲ್ಲರೂ ಆತ್ಮವಿಶ್ವಾಸದಿಂದ, ಸಕಾರಾತ್ಮಕ ಚಿಂತನೆಗಳಿಂದ ಜೀವನ ನಡೆಸಬೇಕು. ನಕಾರಾತ್ಮಕವಾಗಿಯೇ ಯೋಚಿಸುವ, ದಾರಿ ಣತಪ್ಪಿಸುವ ಕೆಲವರಿರುತ್ತಾರೆ. ಅಂಥವರ ಬಗ್ಗೆ ತಲೆಕೆಡಿಸಿಕೊಳ್ಳಬೇಡಿ ಎಂದರು.
