ಸಂಬಂಧಿತ ರೋಗಿ ನಮ್ಮ ಆಸ್ಪತ್ರೆಗೆ ದಿ. 6ರಂದು ಕೋವಿಡ್ ಚಿಕಿತ್ಸೆಗಾಗಿ ದಾಖಲಾದರು. ಅವರ ಸ್ಥಿತಿ ತೀರಾ ಚಿಂತಾಜನಕವಾಗಿದ್ದರಿಂದ ದಿನಾಂಕ 8ರಂದು ವೆಂಟಿಲೇಟರ್ ಚಿಕಿತ್ಸೆಗೆ ಒಳಪಡಿಸಿ, ಸೂಕ್ತ ಕೋವಿಡ್ ಚಿಕಿತ್ಸೆ ನೀಡಲಾಗುತ್ತಿತ್ತು. ರೋಗಿಯ ಸಂಬಂಧಿಕರಿಗೆ ನಿತ್ಯ ಅವರ ಸ್ಥಿತಿ ತಿಳಿಸಲಾಗುತ್ತಿತ್ತು. ರೋಗಿಯ ಕಡೆಯವರಲ್ಲಿ ಹಣ ಇಲ್ಲದಿದ್ದರೂ ವೆಂಟಿಲೇಟರ್ ಹಾಗೂ ಔಷಧಿಯನ್ನು ಆಸ್ಪತ್ರೆಯ ಕಡೆಯಿಂದಲೇ ನೀಡಲಾಗುತ್ತಿತ್ತು. ದುರಾದೃಷ್ಟವಶಾತ್ ದಿ. 22ರಂದು ಸಂಜೆ 7 ಗಂಟೆ ಸುಮಾರಿಗೆ ಚಿಕಿತ್ಸೆ ಫಲಕಾರಿಯಾಗದೆ ರೋಗಿ ನಿಧನರಾದರು. ರೋಗಿಯ ಒಟ್ಟು ಹದಿನೇಳು ದಿನದ ಆಸ್ಪತ್ರೆ ವೆಚ್ಚ 4,13,200 ರೂ.ಗಳಾಗಿತ್ತು. ಇದರಲ್ಲಿ 1,82,000 ರೂ.ಗಳನ್ನು ಸಂಬಂಧಿಕರು ಪಾವತಿಸಿದ್ದರು. ಬಾಕಿ ಉಳಿದ ಹಣ 2,31,200 ರೂ. ಗಳನ್ನು ಪಾವತಿಸಬೇಕಿತ್ತು. ಜೊತೆಗೆ ಔಷಧಗಳ ವೆಚ್ಚ 25,000 ರೂ.ಗಳನ್ನೂ ಭರಿಸಬೇಕಿತ್ತು. ಅವರ ಪರಿಸ್ಥಿತಿ ನೋಡಿ 56 ಸಾವಿರ ರೂ. ಕಡಿಮೆಮಾಡಿ, ಉಳಿದ 2 ಲಕ್ಷ ರೂ.ಗಳನ್ನು ಕಟ್ಟಲು ಸೂಚಿಸಲಾಯಿತು. ಆದರೆ ಸಂಬಂಧಿಕರು ಹಣ ಇಲ್ಲ ಎಂದಿದ್ದರಿಂದ, ಮಾನವೀಯತೆ ದೃಷ್ಟಿಯಿಂದ ಮೊದಲು ಶವ ಸಂಸ್ಕಾರ ಮುಗಿಸಿ ಬನ್ನಿ. ನಂತರ ಮಾತನಾಡೋಣ ಎಂದು ಹೇಳಿದೆವು. ಶವ ಸಾಗಾಟ ಹಾಗೂ ಅಂತ್ಯಸಂಸ್ಕಾರಕ್ಕೆ ಬೇಕಾದ ವೆಚ್ಚ ಸೇರಿದಂತೆ ಅಂದಾಜು ಹತ್ತು ಸಾವಿರ ಆಗುತ್ತದೆ ಎಂದು ವಾಹನ ಸಿಬ್ಬಂದಿ ಹೇಳಿದರೂ, ಅದನ್ನೂ ಆಸ್ಪತ್ರೆಯವರೇ ಕೊಡಲಿ ಎಂದು ಮೃತ ವ್ಯಕ್ತಿಯ ಸಂಬಂಧಿಕರು ಆಸ್ಪತ್ರೆಯ ಸಿಬ್ಬಂದಿ ಮೇಲೆ ಹಲ್ಲೆಗೆ ಮುಂದಾದರು. ಅಂತಿಮವಾಗಿ ಸ್ವಲ್ಪವಾದರೂ ಹಣ ಪಾವತಿಸಿ ಶವವನ್ನು ಸಾಗಿಸಲು ಹೇಳಿದರೂ ಸಂಬಂಧಿಕರು ಕೇಳದೆ ಮರುದಿನ ಶವವನ್ನು ಹಣ ಕೊಡದೆ ತೆಗೆದುಕೊಂಡು ಹೋಗುವುದು ಹೇಗೆ ಎಂಬುದು ತಿಳಿದಿದೆ? ಎಂದು ಅವಾಚ್ಯ ಶಬ್ದ ಬಳಸಿ ಮಾತನಾಡಿದ್ದಲ್ಲದೇ, ಮಾರನೇ ದಿನ ಬೆಳಗ್ಗೆ ನೂರಕ್ಕೂ ಅಧಿಕ ಜನರು ಬಂದು ಆಸ್ಪತ್ರೆಯ ಎದುರು ಗಲಾಟೆ ಮಾಡಿ ಆಸ್ಪತೆಯ ಘನತೆಗೆ ಕುಂದು ತಂದಿದ್ದಾರೆ. ಇದರಲ್ಲಿ ನಮ್ಮ ತಪ್ಪು ಏನೂ ಇಲ್ಲ ಎಂದು ಆಸ್ಪತ್ರೆಯ ಮಾಲೀಕರಾದ ಡಾ. ಪರೀಕ್ಷಿತ್ ಕೋಟಿ ‘ವಿಜಯವಾಣಿ’ಗೆ ಮಾಹಿತಿ ನೀಡಿದ್ದಾರೆ.
