ಆರೋಗ್ಯ ಇಲಾಖೆ ಸಿಬ್ಬಂದಿ ಯಡವಟ್ಟಿನಿಂದ ಧಾರವಾಡ ಜಿಲ್ಲಾ ಆಸ್ಪತ್ರೆ ಲಸಿಕಾ ಕೇಂದ್ರದಲ್ಲಿ ನೂಕುನುಗ್ಗಲು ಉಂಟಾದ ಘಟನೆ ಶನಿವಾರ ನಡೆದಿದೆ. ಅಲ್ಲಿನ ಸಿಬ್ಬಂದಿ ಕೇವಲ 50 ಜನರಿಗೆ, ಅದೂ 2ನೇ ಡೋಸ್ನವರಿಗೆ ಲಸಿಕೆ ನೀಡುವುದಾಗಿ ಹೇಳಿದ್ದರಿಂದ ನೂರಾರು ಜನರು ಕೇಂದ್ರಕ್ಕೆ ಮುಗಿಬಿದ್ದಿದ್ದರು. ಇದರಿಂದ ಕೆಲ ಹೊತ್ತು ಕೇಂದ್ರದ ಬಾಗಿಲು ಹಾಕಲಾಗಿತ್ತು. ಕೂಡಲೆ, ಮಧ್ಯ ಪ್ರವೇಶಿಸಿದ ಪೊಲೀಸರು ಜನದಟ್ಟಣೆ ನಿಯಂತ್ರಿಸಿದರು. ನಿರಾಸೆಗೊಂಡ ಕೆಲ ಜನರು ಕೇಂದ್ರದಿಂದ ಮರಳಿದರು. ಇಷ್ಟೆಲ್ಲ ಅವಾಂತರದ ಬಳಿಕ ಕೋವಾಕ್ಸಿನ್ ಹಾಗೂ ಕೋವಿಶೀಲ್ಡ್ ತಲಾ 500 ಡೋಸ್ ಲಸಿಕೆಗಳನ್ನು ಕೇಂದ್ರಕ್ಕೆ ತರಲಾಯಿತು. ನಂತರ ಸ್ಥಳಕ್ಕೆ ಭೇಟಿ ನೀಡಿದ ಜಿಲ್ಲಾ ಶಸ್ತ್ರಚಿಕಿತ್ಸಕ ಶಿವಕುಮಾರ ಮಾನಕರ್ ಪರಿಶೀಲಿಸಿದರು. ಬಳಿಕ ಮಾತನಾಡಿದ ಅವರು, ಶನಿವಾರ ಹಾಗೂ ಭಾನುವಾರ ರಜೆ ಇರುವ ಕಾರಣಕ್ಕೆ ಜನದಟ್ಟಣೆ ಉಂಟಾಗಿದೆ. ಕೇಂದ್ರಕ್ಕೆ ಆಗಮಿಸಿದ ಜನರ ಮಾಹಿತಿ ಪಡೆಯಲಾಗಿದೆ. ಲಸಿಕೆಗಳೂ ಬಂದಿವೆ. ಹೀಗಾಗಿ ಇಂದು ಕೇಂದ್ರಕ್ಕೆ ಬಂದಿರುವ ಎಲ್ಲ ಜನರಿಗೆ ಲಸಿಕೆ ನೀಡಲಾಗುವುದು ಎಂದರು.
