ಕಾಳಿ ನದಿಯ ಎಡಭಾಗ ಹಾಗೂ ಟ್ಯಾಗೋರ್ ಕಡಲ ತೀರದ ಉತ್ತರ ತುದಿ ಸೇರುವಲ್ಲಿ ಸುಮಾರು 20 ಎಕರೆಗೂ ದೊಡ್ಡ ಮೈದಾನ ಸೃಷ್ಟಿಯಾಗಿದೆ. ಮಳೆಗಾಲ ಮುಗಿದ ನಂತರ ಸಮುದ್ರ ದಡದಲ್ಲಿ ಮರಳಿನ ದಿಬ್ಬ ಕಾಣಿಸಿಕೊಳ್ಳುವುದು ಸಾಮಾನ್ಯ. ಆದರೆ, ಇತ್ತೀಚಿನ ವರ್ಷದಲ್ಲಿ ಇದೇ ಮೊದಲ ಬಾರಿಗೆ ಇಷ್ಟು ದೊಡ್ಡ ಪ್ರಮಾಣದಲ್ಲಿ ಜಾಗ ಸೃಷ್ಟಿಯಾಗಿದೆ ಎಂಬುದು ಸ್ಥಳೀಯ ಮೀನುಗಾರರ ಅಭಿಪ್ರಾಯ. ಮರಳಿನ ದಿಣ್ಣೆ ಕಾಳಿ ನದಿ ನೀರು ಸಮುದ್ರ ಸೇರುವ ಜಾಗವನ್ನೂ ಆಕ್ರಮಿಸಿ ದೇವಬಾಗವರೆಗೂ ವಿಸ್ತರಣೆಯಾಗಿದೆ. ಇದರಿಂದ ಕಾಳಿ ನದಿ ಹಾಗೂ ಅರಬ್ಬಿ ಸಮುದ್ರದ ನಡುವ ದೋಣಿ ಸಂಚಾರಕ್ಕೂ ಮುಂದೆ ವ್ಯತ್ಯಯ ಉಂಟಾಗುವ ಸಾಧ್ಯತೆ ಇದೆ. ಉಸುಕಿನ ದಿಬ್ಬ ದೊಡ್ಡದಾದರೆ, ಮುಂದೆ ಸಣ್ಣ ಸಣ್ಣ ಮಳೆಗೂ ಪ್ರವಾಹ ಬರಬಹುದು, ಅಥವಾ ಕಾಳಿ ಅಳಿವೆಯ ಬಲಬದಿಗೆ ಖಾಸಗಿ ಭೂಮಿ ಹಾಗೂ ದೇವಬಾಗ ಜಂಗಲ್ ರೆಸಾರ್ಟ್ ಪ್ರದೇಶದಲ್ಲಿ ಸಮುದ್ರ ಕೊರೆತ ಇನ್ನಷ್ಟು ಹೆಚ್ಚುವ ಸಾಧ್ಯತೆ ಇದೆ.
